Majburiy mehnatga qarshi targʻibot ishlari kuchaytirilmoqda

Paxta yigʻim-terimi davomida majburiy mehnatga yoʻl qoʻymaslik hamda terimchilar uchun munosib mehnat va dam olish sharoitlarini yaratilishda mutasaddi tashkilotlar ustidan  qatʼiy nazoratni taʼminlash boʻyicha tashkil qilingan ishchi guruh tuman hududida boʻldi.

22-sentyabr kuni tumanimizga tashrif buyurgan ushbu ishchi guruh aʼzolari dastlab tuman hokimligida hokim oʻrinbosarlari, hokimlik masʼul xodimlari, boʻlimlar, korxona-tashkilotlar rahbarlari ishtirokida yigʻilish oʻtkazdilar.

Ishchi guruh tarkibiga hududlarni oʻrganish koʻlamini kengaytirish maqsadida Qoraqalpogʻiston Respublikasi Joʻqorgʻi Kengesi, Xalq deputatlari viloyat Kengashi deputatlari, Bandlik boshqarmalari, Kasaba uyushmalari tashkilotlari birlashmalari, hududdagi jamoat tashkilotlari vakillari va jurnalistlar jalb etilgan edi. Xususan, Oliy Majlis Qonunchilik palatasi Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi aʼzosi Abdulla Ruzmetov, Oliy Majlis Qonunchilik palatasi Agrar va suv xoʻjaligi masalalari qoʻmitasi aʼzosi Zafar Abdirimov, Bandlik va mehnat munosabatlari vazirligi huzuridagi Mehnat organlari xodimlari malakasini oshirish Respublika kurslari direktori Umar Sultonov, Aviatsiya xodimlari kasaba uyushmasi Respublika kengashi tashkiliy ishlar boʻyicha bosh mutaxassisi Abduvohid Yuldashev, Nukus davlat pedagogika instituti matbuot kotibi, “Karinform.uz” rasmiy veb-sayti muharriri (bloger) Islam Matekovlar ishchi guruh aʼzolari tarkibiga kiritildi.

Respublika ishchi guruhi aʼzolari tumanda Oʻrtaqalʼa ovulidagi “Erkin Rasulov asalchi“ hamda “Maqsad Haytakov”, Doʻrman ovulidagi “Beshboyev Qurbangʻaliy”, Choykoʻl ovulidagi “Choykoʻl-Doʻstlik”, Oq oltin ovulidagi “Yakubova Gavhar”, Toʻlqin ovulidagi “Amad Toʻrayev” fermer xoʻjaliklaridagi pahta dalalarida boʻlib, karantin qoidalariga rioya etgan holda oʻrganish ishlarini olib bordilar.

Masʼullar oʻrganish ishlari davomida qator masalalarga alohida eʼtibor qaratdilar. Xususan, fermerlar, klasterlar, Bandlik va mehnat munosabatlari vazirligi, uning quyi tuzilmalari hamda xususiy bandlik agentliklaridan boshqa tashkilotlarni paxta yigʻim-terimi mavsumi davomida terimchilarni jalb qilish ishlariga aralashuviga yoʻl qoʻymaslik, majburiy mehnat holatlariga butunlay barham berish boʻyicha tushuntirish ishlari olib borildi. Ishchi guruh aʼzolari tomonidan korxona, tashkilotlar oʻz xodimlarini uyushgan holda paxta yigʻim-terimi ishlariga jalb qilish amaliyotini toʻliq bekor qilish, paxta yigʻim-terimi ishlariga Ichki ishlar, Favqulodda vaziyatlar, mudofaa xodimlari, harbiy xizmatchilar va akademiya kursantlarini umuman jalb etmaslik kabilarga alohida eʼtibor qaratilishi kerakligi aytib oʻtildi.

Shuningdek, mutasaddilar oʻrganish jarayonida terimchilar bilan belgilangan tartibda mehnat shartnomalarining imzolanganligi, terimchilarni terim haqini oshirgan holda ragʻbatlantirish choralarining koʻrilganligi, bunda hukumat qarori bilan belgilangan terim summasiga klasterlar va fermerlarning ichki imkoniyatlaridan kelib chiqqan holda, qoʻshimcha ragʻbatlantirish ishlarining tashkil etilganligi, terim pullarining oʻz vaqtida, daromad soligʻi olinmasdan, byudjetdan tashqari pensiya jamgʻarmasiga sugʻurta badallari hisoblanmagan holda tarqatilayotganligini oʻrgandilar.

Shu bilan birga, korxona-tashkilotlarda xodimlardan oʻrniga terimchi jalb qilish uchun pul yigʻish ishlariga yoʻl qoʻyilmayotganligini, pandemiya sharoitini inobatga olib, paxta yigʻim-terimi ishlarini sanitariya va gigiyena qoidalariga rioya qilgan holda tashkillashtirilganligini hamda boshqa hududlardan kelib, terimda ishtirok etayotgan terimchilar uchun munosib mehnat va dam olish sharoitlari yaratilganligini qatʼiy nazoratga oldilar.Taʼkidlash kerakki, bugungi kunda mamlakatimizda inson hayoti va faoliyatining barcha sohalarida majburiy mehnatning oldini olish va unga toʻliq barham berishga doir aniq hamda amaliy chora-tadbirlar amalga oshirilmoqda. Bunday amaliy ishlar oʻtgan yillarga qaraganda hozirgi kunda majburiy mehnat koʻrinishlari va bunday koʻngilsiz holatlar asta-sekin pasayib borishiga xizmat qilmoqda.

Charos Arslonova, tuman hokimligi Axborot xizmati rahbari.