MOʻL HOSIL YeTIShTIRILIShIGA HISSA QOʻShAYoTGANIMIZDAN MAMNUNMIZ

Qishloq xoʻjaligi ekinlaridan moʻl va sifatli hosil olish, tarmoqni ilgʻor usullar asosida rivojlantirishda sohaning moddiy-texnik bazasini mustahkamlash, mashina-traktor parklarini zamonaviy texnika va agregatlar bilan taʼminlash muhim oʻrin tutadi.

Tumanimizda qishloq xoʻjaligi mahsulotlarini yetishtirishda samarali faoliyat olib borayotgan bizning “Yoʻldosh Oʻrozboyev” MMTP joriy yilgi paxta rejasini amalga oshirishda eng ilgʻorlardan biri boʻldi. MMTP hududimizdagi 19 ta fermer xoʻjaliklariga rejadagi hosilni yetishtirishda sifatli xizmat koʻrsatib kelmoqda. Bugungi kunda “Yoʻldosh Oʻrozboyev” MMTP xizmat koʻrsatuvchi fermer xoʻjaliklarida 888 gektar ekin maydoniga chigit ekilib, 2055 tonna paxta hosili yetishtirildi, reja 110 foizga bajarildi. Bizning MMTP xizmat koʻrsatadigan fermer xoʻjaliklarida paxta ekin maydonlarining har gektariga 750 kg. mineral va organik oʻgʻitlar sarflandi. Paxta yigʻim-terim ishlarida 476 nafar fermer xoʻjaliklari ishchi xodimlari, 884 nafar uyushmagan aholi, jami 1360 nafar terimchilar ishtirok etdilar.

MMTP tarkibida koʻplab zamonaviy hamda sifatli xizmat koʻrsatadigan texnikalar mavjud. Xususan, 24 dona kultivator, 15 dona paxta ekish seyalkalari, yuqori unumli 3 dona “Orion” rusumli traktor, 10 dona “Belorus MTZ-80” rusumli, 1 dona “Belorus-1221”, 2 dona “Magnum”, 3 dona yangi “TD5-110” rusumli traktorlar, 3 dona “Klass dominator” bugʻdoy yanchiydigan kombaynlar, 50 dona traktor tirkamalari paxta yetishtiruvchi fermer xoʻjaliklariga chigit ekilgandan to hosil yigʻib-terib olingunga qadar boʻlgan davrda samarali xizmat koʻrsatib kelmoqda.

Biz mehnat jamoamiz bilan mamlakatimiz qishloq xoʻjaligi sohasining yanada taraqqiy etishiga, tumanimiz paxta rejasining ortigʻi bilan bajarilishiga oʻz hissamizni qoʻshayotganimizdan mamnunmiz.

Qurbongʻali Beshboyev, “Yoʻldosh Oʻrozboyev” MMTP raisi.