IQTIDORLI ShOGIRD

Iqtidorsiz insonning oʻzi boʻlmaydi. Faqat kichik yoshdan oilada kattalar, ota-ona va taʼlim muassasalarida ustozlar yaqindan koʻmak berishsa, har qanday boladagi isteʼdod yanada shakllanib, rivojlanadi va yuzaga chiqadi.
Behruz Jumamurodov ham bolalikdan sanʼatga, musiqaga ixlosi boshqachaligini namoyon qila boshladi. Ayniqsa, ovuldagi 29-sonli maktabga 1-sinfga oʻqishga borganidan soʻng, tadbirlarda qoʻngʻiroqday ovozi bilan ashulalar ijro etib, iqtidor egasi ekanligini koʻrsatdi. Behruzdagi isteʼdodni allaqachon payqagan ota-onasi maktabdagi ustozlar tavsiyasi bilan Qangli madaniyat markazida tashkil etilgan rubob toʻgaragiga olib borishdi.
Madaniyat markazida estrada va rubob yoʻnalishlari boʻyicha 30 nafardan ziyod bolaga sanʼat sirlarini oʻrgatayotgan toʻgarak rahbarlari Behruzni dastlab qaysi sanʼat turiga koʻproq qiziqishini aniqlab olishdi. Uning oʻzi ham musiqa asbobini chalishga, ham qoʻshiq aytishga qiziqishini aytib, rubob toʻgaragini tanladi va ustozi Olimboy Yeshimbetovdan sanʼat sirlarini, mahoratini oʻrgana boshladi.
- Behruz iqtidorli boʻlish bilan birga intiluvchan, tirishqoq, – deydi “Qangli” madaniyat markazining rubob toʻgaragi rahbari O.Yeshimbetov. – Eshitish, qabul qilish, oʻzlashtirish darajasi juda yaxshi. Qisqa fursat ichida rubob chalishni oʻrganib oldi. Oʻzi musiqa chalib, oʻzi qoʻshiq aytadi. U eng iqtidorli shogirdim.
“Qangli” madaniyat markaziga ovul hududidagi 5 ta maktab, 8 ta aholi punktidan sanʼatsevar yoshlar tashrif buyurib, iqtidorlarini rivojlantiradi. Markaz mudiri,  murabbiylar D.Endirboyev,  O.Yeshimbetovlar ularning isteʼdodlarini shakllantirish, yuzaga chiqarish maqsadida astoydil shugʻullanishadi. Murabbiylar ularning sahnaga chiqishlariga, ovuldagi bayram tadbirlari, tuman markazida oʻtkaziladigan katta tadbirlarda yaxshi kuy va qoʻshiqlari bilan qatnashishlariga imkoniyat yaratib, qiziqishlarini yanada orttiradi. Ayniqsa, markazdagi toʻgaraklarning havaskor yoshlari tomonidan tayyorlangan bayram dasturlari, tomoshalari bayramlarga fayz bagʻishlash bilan birga aholiga koʻtarinki kayfiyat, bayram ruhini bagʻishlaydi.
Behruz ham mana shunday tadbirlarda ishtirok etib, oʻzini tanitdi. Toʻgarak mashgʻulotlarida oʻrgangan 15 tacha kuy va qoʻshiqlardan “Chamanda gul”, “Gullar raqsi”, “Oʻrganamiz-oʻrgatamiz” kabi qoʻshiqlari allaqachon oʻz muxlislarini topdi. Oʻtgan yillar davomida “Isteʼdod shou” tanlovining hududiy bosqich gʻolibi boʻldi. Tuman Madaniyat markazida oʻtkazilgan choraklik hisobot kontsert dasturlarida ham faollik koʻrsatdi. “Mustaqillik farzandlarimiz” onlayn koʻrik-tanlovida esa yakka ijrochilik yoʻnalishi boʻyicha ham faxrli 1-oʻrinni egalladi. Shuningdek, mustaqilligimizning 29 yilligiga, Oʻqituvchi va murabbiylar kuniga bagʻishlab oʻtkazilgan onlayn kontsert dasturlarida oʻzining sevib ijro etadigan qoʻshiqlari bilan ishtirok etib, ustozlari, ota-onasi va muxlislarining mehrini, eʼtiborini qozondi.
Yosh isteʼdod egasi Behruz Jumamurodov sanʼat yoʻliga endi qadam qoʻydi. Soz sehri chulgʻagan koʻnglida kuy va qoʻshiqqa havas bor. U kelajakda sanʼat sohasida davom etishni maqsad qilgan. Oʻzi intilishda davom etsa, shu bilan birga ustozlari, ota-onasi uni qoʻllab-quvvatlasa, albatta, maqsadiga yetadi va Amudaryodan yetishib chiqqan isteʼdodli sanʼatkorlar safi yana koʻpayadi.

O. Xudoyberganova.