KUZGI BUGʻDOY SIFATLI PARVARISh QILINMOQDA
Mamlakatimizda boshoqli don ekinlari hosildorligini oshirishda agrotexnologiyaning ilgʻor usullarini qoʻllash bilan bir qatorda gʻalla yetishtiruvchilarni ragʻbatlantirish borasida amalga oshirilayotgan chora-tadbirlar tufayli don mahsulotlari yetishtirish hajmi yil sayin oshirilishiga erishilmoqda. Bunda yerlarning ekishga sifatli tayyorlanishi, urugʻlikning belgilangan muddatlarda ekilishi, mineral oʻgʻitlarning meʼyorida sarflanishi ham muhim omil boʻlmoqda.
Qaratilayotgan eʼtibor, gʻalla ekilgan maydonlarda yuqori hosil yetishtirgan fermer xoʻjaliklariga davlat xaridi uchun yetkazib berilgan don xarid narxiga 25 foizgacha ustama narx qoʻllanilayotganligi tufayli gʻallachilik yuqori daromadli sohaga aylanmoqda. Natijada tumanimiz fermer xoʻjaliklari ijarachilari ham boshoqli don ekinlaridan yuqori hosil yetishtirishga intilmoqdalar.
Oʻrta qalʼa ovulidagi koʻptarmoqli Gulmurod Boboniyozov rahbarlik qilayotgan “Yergulobod” fermer xoʻjaligining paxtachilik, baliqchilik, chorvachilikdan tashqari 13 gektar gʻalla maydoni ham mavjud. Hozir ushbu maydonlarga ekilgan bugʻdoy urugʻlari bir tekis unib chiqib, yashil gilam tusiga kirgan. Ekish barobarida har gektar hisobiga 200 kilogrammdan fosfor mineral oʻgʻiti berilganligi tufayli bugʻdoy nihollari yaxshi rivojlanayapti.
2020-yil hosili uchun ekilgan 12 gektar gʻalla maydonidan oʻtgan mavsumda davlat xaridi uchun 36 tonna “qirmizi” don topshirilgan, jami hosildorlik 45 tsentnerdan oshishiga erishilgan edi. Gʻallachilikdan kelgan daromad tufayli xoʻjalik ishchilarining ham, xoʻjalikning ham iqtisodi yuksaldi.
Tumanimizda xalqimizning rizq-roʻzi boʻlgan gʻalla yetishtirishga masʼuliyat bilan yondoshib, ekin maydonlaridan samarali foydalanayotgan fermer xoʻjaliklari koʻp. Qilichboy ovulida faoliyat yuritayotgan Otaxon Qurboniyozov rahbarligidagi “Amirxon” fermer xoʻjaligi shularning biri hisoblanadi. Oʻtgan yili gʻallachilikdan moʻl daromad olingan ushbu xoʻjalikda joriy yilda 118 gektar paxta maydonidan paxta topshirish yillik kontraktatsiya shartnomasi ortigʻi bilan ado etildi. Tumanda birinchilar qatorida paxta topshirish yillik rejasini bajargan azamatlar 11 gektar yerga 2021-yil hosili uchun gʻalla ekib, tekis nihol olishga ham erishdilar. Hozir ushbu maydonlarda bugʻdoy maysalari yam-yashil boʻlib, koʻzni quvontirib turibdi.
Eʼtiborli jihati, Oʻzbekiston Respublikasi Prezidentining 2020-yil 6-martdagi “Gʻalla yetishtirish, xarid qilish va sotishga bozor tamoyillarini keng joriy etish chora-tadbirlari toʻgʻrisida”gi Qaroriga muvofiq shu yildan boshlab, davlat buyurtmasi asosida boshoqli don yetishtirish amaliyotining bosqichma-bosqich bekor qilinayotganligi, gʻalla xarid qilish va sotishda bozor tamoyillarini keng joriy etish nazarda tutilayotganligi, dehqonlarning mehnat unumdorligini oshirish va manfaatdorligini taʼminlashga eʼtibor qaratilayotganligi gʻallachilikni daromadli sohaga aylantirishga asos boʻlayotir.
Natijada – hozirgi kunda tumanimizning barcha fermer xoʻjaliklarida ham gʻalla ekilgan maydonlarda tekis nihol olishga erishilib, parvarishlash agrotexnika qoidalari asosida olib borilayapti. Amalga oshirilayotgan bu kabi samarali chora-tadbirlar 2021-yilda gʻalla maydonlari hosildorligi yuqori boʻlishiga zamin yaratadi.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
