OZODALIK VA OBODLIK INSON SALOMATLIGI GAROVIDIR

Tumandagi ovul va mahallalar hududlarini obodonlashtirish, ijtimoiy soha obʼektlarining sanitariya holatini yaxshilash, aholining sanitariya madaniyatini yanada oshirish maqsadida tuman DSENM tomonidan qator ishlar amalga oshirilmoqda.

Joriy yilning 3 oyi davomida tuman DSENM tomonidan ishlab chiqilgan chora-tadbirlar rejasi asosida mahallalardagi ishchi guruh bilan hududlarda obodonlashtirish ishlarini tashkil etish, tumandagi mavjud koʻp qavatli turar joy binolari sanitariya holatini yaxshilash, xonadonlarda ozodalikni saqlash, koʻchalarni va hududlarni, oqar suv manbalarini uy-roʻzgʻor chiqindilari bilan ifloslamaslik, har bir xonadonda mevali va manzarali daraxt hamda uy oldida gul koʻchatlarini ekishni tashkil etish, uylarning fasad qismini oqlash, oshxona va hojatxonalarni sanitariya talablari darajasida saqlash, aholi oʻrtasida har xil yuqumli kasalliklarning kelib chiqishining oldini olish borasida tumandagi 28216 ta xonadonlarda DSENM, tibbiyot xodimlari, mahalla faollari ishtirokida sanitariya targʻibot ishlari olib borilmoqda.

Nazorat davomida aniqlangan kamchiliklarni bartaraf qilish maqsadida har bir korxona, tashkilot va muassasa rahbarlariga, oʻzini-oʻzi boshqarish organlariga hamda tumandagi koʻp qavatli turar joylarda istiqomat qiluvchi fuqarolarga DSENMning chiqish xatlari bilan tegishli tavsiyalar berildi. Yuqumli kasalliklarning kelib chiqishining oldini olishga qaratilgan sanitariya talabnomalari tarqatildi. Shunga qaramasdan koʻp qavatli turar joylarda obodonlashtirish, koʻkalamzorlashtirish, xonadonlarning sanitariya holatini yaxshilash hamda turar-joy binosining tevarak-atroflarida sanitariya tozalash ishlari yetarli darajada yoʻlga qoʻyilmayotganligi aniqlanmoqda.

DSENM mutaxassislari tomonidan berilgan tavsiyalarning bajarilishi yuzasidan oʻrganishlar natijasida atrof-muhitni, ochiq suv havzalarini maishiy chiqindilar bilan ifloslagan, shuningdek sanitariya qoida va meʼyorlari talablariga rioya qilmagan 47 nafar shaxslarga nisbatan Oʻzbekiston Respublikasi MJtKning 53-moddasi asosida maʼmuriy javobgarlik ishlari qoʻzgʻatilib, jarimaga tortildi, yoʻl qoʻyilgan kamchiliklarni bartaraf qilish choralari koʻrilmoqda.

Oʻzbekiston Respublikasi Vazirlar Mahkamasining 2013-yil 3-dekabrdagi "Respublika aholi punktlarida sanitariya jihatdan tozalash tizimini rivojlantirish va takomillashtirish toʻgʻrisida”gi Qaroriga asosan mahallalarda, aholi punktlarida va koʻp qavatli uylar atrofida chiqindi yigʻish maydonchalari qurilishi 2014-2015 yillar dasturiga kiritilgan boʻlib, hozirgi kunda tuman obodonlashtirish boshqarmasi tomonidan qurilish ishlari boshlab yuborildi.

DSENM mutaxassislari tomonidan hududlardan sanitariya-gigiyena laboratoriyasiga vodoprovod suvidan 131 namuna olinib, 60 tasi, quduq suvidan 87 namuna olinib, 61 tasi, atrof-muhitdan 30 namuna olinib, 10 tasi, tuproq namunalaridan 18 ta namuna olinib, 2 tasi, ochiq suv havzalaridan 16 ta namuna olinib, 9 tasi, oziq-ovqat mahsulotlaridan 375 ta namuna olinib, 19 tasi sanitariya-gigiyena talablariga toʻgʻri kelmasligi aniqlanib, talabga javob bermaganligi uchun tegishli chora-tadbirlar koʻrilmoqda.

Biz ekologik toza muhitni oʻzimiz yaratmagunimizcha turli yuqumli kasalliklardan qutula olmaymiz. Buning uchun bizga va farzandlarimizga yetarli ekologik bilim, ekologik madaniyat kerak. Bolalarimiz ekologik tushuncha va bilimni, tartib-intizomni eng avvalo ota-onasidan oladi, soʻngra maktabgacha taʼlim muassasalari, umumtaʼlim maktablari, oliy taʼlim muassasalari va qolaversa, hayot maktabidan oladi. Ekologik bilim va madaniyat sanitariya madaniyati bilan oʻzaro uzviy bogʻlanib, uygʻunlashib ketgan bilim va madaniyatdir.

Oilada sogʻlom farzandlarni tarbiyalashda sogʻlom muhitni shakllantirish, har bir xonadonda obodonlashtirish, tozalikka rioya qilish, hududlarga mevali va manzarali daraxt hamda gul koʻchatlari ekish, koʻcha va mahallalarni obod qilish asosiy vazifadir. Chunki har bir xonadon ozodaligi va obodligi inson salomatligi garovidir.

T.Boboniyozov,

tuman DSENM bosh shifokori, xalq deputatlari tuman Kengashi deputati.

(Foto - http://uza.uz/)