“SAVODXONLIK BAYRAMI” MAVZUSIDA OChIQ DARS BOʻLIB OʻTDI

Boshlangʻich taʼlimning inson hayotidagi oʻrni beqiyos. Murgʻak bolajonlarning qoʻllariga ruchka tutqazib yozishni oʻrgatish, ularni ilm dunyosi sari yetaklash, oson jarayon emas. Aynan shu davrdagi berilgan sifatli taʼlim-tarbiya ularning qanday inson boʻlib yetishishida muhim rol oʻynaydi. Oʻqituvchi darslar jarayonida oʻz bilimi, malaka, koʻnikmalarini turli mashgʻulotlar orqali yetkazadi.

Yurtimizda taʼlim-tarbiya tizimida amalga oshirilayotgan islohotlar haqiqiy maʼnoda yosh avlodni ham jismonan, ham maʼnan barkamol insonlar etib tarbiyalashga xizmat qilmoqda, oʻquvchilarga boshlangʻich sinflarda mustahkam ilm poydevori qoʻyilishiga zamin yaratmoqda.

Qilichboy ovulida faoliyat yuritayotgan 69-sonli maktabning boshlangʻich sinf oʻqituvchisi Dilnoza Bobojonovaning sohada mehnat faoliyatini boshlaganiga 18-yil toʻldi. Bu vaqt orasida u toʻrt marta hudud jajji oʻgʻil-qizlarini  1-sinfga qabul qilib olib, sifatli boshlangʻich taʼlim berdi va yuqori sinflarga kuzatib qoʻydi.

U joriy yangi oʻquv yilida yana 1-sinflarni oʻqita boshladi. Oʻtgan toʻrt oy mobaynida sinfidagi 27 nafar jajji bolajonlarga ilk saboq berib, Alifbeni oʻzlashtirishlariga, sanashni, hisoblashni oʻrgatishga erishdi.

Yaqinda shu munosabat bilan va dekabr boshlangʻich sinflar fan oyligi doirasida Dilnoza Bobojonova oʻzi taʼlim berayotgan sinf oʻquvchilariga “Alifbe bayrami” mavzusida ochiq dars oʻtdi.

Ochiq darsda alifbedagi harflarni mukammal oʻrganib, chinikam oʻquvchiga aylangan jajji oʻgʻil-qizlar chiroyli kiyinib, boshlariga har biri hal xil harflar shaklini kiyib doska oldida saf tortib turdilar.

Ustoz ularga ochiq dars mazmuni va maqsadini tushuntirdi. Shundan soʻng, oʻquvchilardan alifbe kitobini oʻqib tugatgani munosabati bilan “Savodxonlik bayrami” mavzusidagi ochiq darsga qanday tayyorgarlik koʻrganini soʻradi. Oʻquvchilar har biri oʻquv yili boshlanganidan beri oʻrgangan harflarini sheʼriy ifodalab berdilar.

Davraga “Alifbe” kitobi kirib keldi va oʻquvchilar bilimini sinovdan oʻtkazuvchi savollar, topshiriqlar berdi. Zehni oʻtkir bolajonlarning javoblaridan qoniqish hosil qilgan ilk savod beruvchi kitob sahifalaridagi bilimlarni chuqur oʻzlashtirgani uchun bolajonlarga minnatdorchilik bildirdi.

Oʻquvchilar ilm oʻrganishning ahamiyatini ulugʻlovchi, maktab, baxtiyor bolalik, ona Vatan haqida sheʼrlar, maqollar aytib, savodxonligini namoyish etishdi. Bundan ustozi Dilnoza Bobojonova cheksiz xursand boʻldi.

Shunisi eʼtiborliki, mamlakatimizda koronavirus pandemiyasi tufayli oʻrnatilgan tartib-qoidaga koʻra ulkan bayram shaklida, maktab miqyosida, ota-onalar ishtirokida oʻtkaziladigan “Savodxonlik bayrami” tadbiri joriy yilda mazkur sinfda ochiq dars shaklida, faqat sinf oʻquvchilari ishtirokida oʻtkazildi.

Oʻquvchilar puxta tayyorgarliklar koʻrganligi tufayli ochiq dars ularda unutilmas taassurotlar qoldirdi.

O.RAJABOVA.