NAVROʻZ BAYRAMI MUNOSABATI BILAN AMUDARYo TUMANI HOKIMI S.YOʻLDAShEVNING TUMAN XALQIGA TABRIGI

Qadrli yurtdoshlar!

Biz orziqib kutgan bahor, yasharish va yangilanish ramzi boʻlgan Navroʻzi olam qutlugʻ qadami bilan oʻlkamizga kirib kelmoqda.

Ming yillar davomida maʼnaviy hayotimizning koʻrk-u ziynati boʻlib kelayotgan bu ajoyib, xosiyatli bayram bugun qalblarimizga yanada cheksiz quvonch va zavq bagʻishlamoqda. Navroʻzi olam xalqimiz, davlatimiz va jamiyatimiz hayotida alohida ahamiyatga ega boʻlib, eng qadimiy va navqiron ayyom sifatida katta shodiyona bilan nishonlanadi.

Ushbu ayyom bilan Sizlarni, Siz orqali butun tumanimiz ahlini chin qalbimdan samimiy muborakbod qilaman. Hayotingiz bahor tongidek tiniq, baxtli va farovon boʻlsin! Sharqona Yangi yilimiz – Navroʻzi olamning qadami qutlugʻ va barakali kelsin!

Navroʻz tilga olinishi bilan ulugʻ hazrat Alisher Navoiyning: “Har tuning qadr oʻlubon, har kuning boʻlsin Navroʻz!” degan goʻzal bir satrlari yodimizga tushadi. Biz ushbu satrlarni nainki har galgi Navroʻzda, balki yilimizning har bir kunida tilga olamiz, ana shu ezgu tilak bilan yashab, mehnat qilamiz. Necha ming yillik tarixga ega boʻlgan Navroʻz bayrami kunlarida bu ohorli satrlar yanada balandroq jaranglaydi.

Navroʻz kuni dalasiga urugʻ sochgan dehqon, bogʻ-rogʻiga oro bergan bogʻbon, elga rizq-roʻz, roʻshnolik tilab, sumalakka uringan onaxonlar tilidan tushmaydigan bu ezgu tilak xalqimiz tarixiy xotirasining, bebaho maʼnaviy davlatining betakrorligidan dalolatdir.

Ona zaminda yashillanish, yasharish va yashnatish damlari boshlanayotir. Dillarda shukronalik tuygʻusi bilan ulugʻ niyatlarga oshno yashayotgan xalqimiz oʻtgan yilgi Navroʻzdan bu yilgi Navroʻzgacha sinovli damlarni boshidan kechirdi. Hamisha bagʻri keng, qalbi mehr-muhabbatga, samimiyatga toʻla xalqimiz koronavirus pandemiyasini ham sabr-matonati bilan yengib chiqishiga ishonamiz. Sovid-19 bilan kurashda necha yuzlab el-yurt fidoyilari – shifokorlar, sanʼatkorlar, davlat va jamoat arboblari, millat onalari erta vafot etdilar. Yoʻqotishlar, sinovlar qarshisida jasorat va matonat namunalarini koʻrsatgan xalqimiz ming shukurki, yana Navroʻzga yetishdi.

Yurtimizning har bir goʻshasi bugun qutlugʻ va Yangi kun – Navroʻz taraddudida. Necha ming yillik tarixiy xotiralarni, boqiy qadriyatlar, urf-odat va anʼanalarni, milliy oʻzlikni oʻzida mujassam etgan Navroʻziy udumlardan maʼnaviy oziq olgan koʻp millatli xalqimizning hamjihatligi har bir qalbga xotirjamlik bagʻishlaydi.

Navroʻz kunlarida necha ming yillik anʼana va qadriyatlarimizni yangidan kashf etamiz, qanday buyuk tarix, qanday buyuk madaniyat vorislari ekanimizni yana bir bor anglaymiz va bundan qalblarimiz gʻurur va iftixorga toʻladi. Xayr-u saxovat, bagʻrikenglik kabi xislatlar bu ayyom chogʻida yanada yaqqolroq namoyon boʻladi.

Keksalarning duosini olish, yetim-yesirlarning boshini silash, muhtoj va koʻngli yarim odamlarga beminnat yordam berish kabi yuksak fazilatlar Navroʻz ayyomida yana bir bor oʻz tasdigʻini topadi.

Bugun nafaqat mamlakatimiz, balki tumanimizning har bir ovuli va mahallasida, har bir xonadonda Navroʻz bilan bogʻliq anʼanalar, bayramona tadbirlar boshlanib, bu tadbirlarda butun xalq ishtirok etayotgani qalblarimizga quvonch bagʻishlaydi.

Qadrli yurtdoshlar!

Oʻtgan yilgi Navroʻzdan 2021-yil Navroʻzigacha tumanimizda namunaviy loyihalar asosida umumiy qiymati 6 mlrd. 593 mln. soʻm boʻlgan 2 ta koʻp qavatli, 48 ta xonadonli uy-joylar qurildi.

2021-yil “Yoshlarni qoʻllab-quvvatlash va aholi salomatligini mustahkamlash yili”da kelajak avlodga koʻrsatilayotgan eʼtibor va gʻamxoʻrlikning mantiqiy davomi sifatida namunaviy loyihalar asosida yana 3 ta koʻp qavatli 72 ta xonadonli uylar qurilishi va oʻz egalariga topshirilishi kutilmoqda.

Eng quvonarlisi, joriy yilda Amudaryo ustidan oʻtadigan temir yoʻl va avtomobil yoʻli qoʻshma koʻprigi qurilish ishlari boshlab yuborildi. Yangidan qurilishi boshlangan ushbu koʻprikning uzunligi 412,7 metr, balandligi 11,5 metr, kengligi 8,5 metrni tashkil qiladi va shu bilan bir qatorda 79 km. uzunlikda “Shovot-Gurlan-Jumurtov-Qoraoʻzak” temir yoʻl liniyasi barpo etiladi.

Aziz yurtdoshlar !

Tun va kun tenglashgan ushbu damlardan boshlab Yangi kun – yangi yil boshlanadi. Oilasi, elu-yurtning rizqini oʻylab, qadrdon dalasiga yoʻl olayotgan zahmatkash bobo dehqonlarimizning bahori boshlanadi.

Yilimiz qutlugʻ kelib, daryolarimiz suvga, xirmonlarimiz hosilga toʻlishini koʻrmoq har birimizga nasib qilsin.

Muhtaram otaxon va onaxonlar!

Munis opa-singillar!

Xalqimizning ishonchi va tayanchi boʻlgan navqiron yoshlar!

Sizlarni yana bir bor elimizga kirib kelayotgan Navroʻzi olam bilan chin qalbimdan tabriklayman. Navroʻzdan keyin boshlanajak sharqona yangi yilda har bir xonadonga, yurtimizga tinchlik-xotirjamlik, baxtu-saodat, obodlik va farovonlik yor boʻlsin!

Navroʻzi olam barchamizga muborak boʻlsin!

Cultonboy YOʻLDAShEV, Amudaryo tumani hokimi.