QORAQALPOGʻISTON RESPUBLIKASI KONSTITUTsIYaSINING 28 YILLIGI MUNOSABATI BILAN OChIQ DARS OʻTKAZILDI

Umumtaʼlim maktablarining boshlangʻich sinflarida oʻtkaziladigan ochiq dars-mashgʻulotlari nafaqat oʻquvchilarning yangi mavzu boʻyicha bilim va koʻnikmalarini, balki oʻqituvchining ham mahoratini oshirish imkonini beradi. Chunki, oʻqituvchi ochiq darsga tayyorgarlik jarayonida zamonaviy texnologiyalardan foydalanib, dars mavzusining oʻquvchilarga tushunarli boʻlishi uchun bor mahoratini ishga soladi, slaydlar orqali mavzuni toʻla ochishga harakat qiladi va savol-javoblar uslubidan foydalanib, darsni mukammallashtiradi. Qoʻshimcha adabiyotlardan foydalangan holda oʻz tajribasini ham boyitadi.

Joriy yilning 9-aprel sanasida 38-sonli maktabning 3 “A” sinfida tajbirali oʻqituvchi Raʼno Avazmurodova tomonidan Qoraqalpogʻiston Respublikasi Konstitutsiyasi qabul qilinganining 28 yilligi munosabati bilan “Konstitutsiya – mening baxtim” mavzusida ochiq dars-mashgʻuloti oʻtkazildi. 35 yillik pedagogik tajribaga ega boʻlgan tajribali boshlangʻich sinf oʻqituvchisi Raʼno  Avazmurodova maktab pedagogika jamoasininggina emas, balki tuman XTBga qarashli umumtaʼlim maktablarining boshlangʻich sinflar oʻqituvchilari orasida ham oʻziga xos obroʻga ega pedagoglardan sanaladi. U har bir darsini oʻquvchilarda kreativ faollikni oshirish, bolaning dunyoqarashini shakllantirishda zamon taraqqiyotiga mutanosib usullardan foydalangan holda oʻquvchilarni yoshligidanoq jamiyatdagi ijobiy oʻzgarishlarga oʻz shaxsiy munosabatini bildira olish, erkin fikrlash ruhida tarbiyalashga harakat qiladi.

“Konstitutsiya - mening baxtim” mavzusidagi ochiq darsda 27 nafar oʻquvchi, 38-sonli maktab rahbarlari va oʻqituvchilar ishtirok etishdi. Ushbu mavzuda tashkillashtirilgan ochiq darsning maqsadi va undan kutiladigan natijalar, avvalo, oʻquvchilarning oʻzlari tugʻilib-oʻsgan muqaddas zamin haqidagi tushunchalarini yanada boyitish, Qoraqalpogʻiston Respublikasining mamlakat iqtisodiy, ijtimoiy, maʼnaviy-madaniy hayotida tutgan oʻrni va ahamiyati, shuningdek, davlat madhiyasi, davlat ramzlari, Qoraqalpogʻiston Respublikasining Asosiy Qonuni – Konstitutsiyasida belgilab qoʻyilgan huquq va burchlar xususida oʻquvchilarga keng tushuntirishlar berish orqali ular qalbida vatanparvarlik, xalqparvarlik, millatlararo totuvlik tuygʻularini yanada mustahkamlash hamda huquqiy bilimlarini oshirishga qaratilgani bilan muhim ahamiyatga egadir.

Dars  jarayonida oʻqituvchi Oʻzbekiston ichra suveren Respublika – Qoraqalpogʻiston Respublikasi Konstitutsiyasining mazmun-mohiyati, uning har bir moddasining xalqimiz hayotida tutgan oʻrni xususida slaydlar orqali oʻquvchilarga batafsil maʼlumotlar berdi. Shundan soʻng “Konstitutsiya – mening baxtim” mavzusida oʻquvchilarning kreativ fikrlash qobiliyatini sinovdan oʻtkazish maqsadida Qoraqalpogʻistonning oʻz davlat madhiyasi, davlat ramzlari yuzasidan oʻquvchilarga savollar berdi. “Davlat madhiyasining muallifi kim?”, “Madhiyaning mazmun-mohiyati, gʻoyasi haqida nimalarni bilasiz?”, “Davlat ramzlari nimani ifodalaydi?” kabi savollarga oʻquvchilar oʻz javoblarini, sodda va tushunarli qilib ifodalab berdilar.

Darsning “Konstitutsiya bilimdonlarini aniqlaymiz” deb nomlangan qismi yanada qiziqarli taassurotlarga boy boʻldi. Bunda oʻquvchilar guruhlarga boʻlingan holda konstitutsiya boblari va moddalari boʻyicha bir-birlariga savollar berib, sinfdosh sinfdoshning bilimini sinovdan oʻtkazish imkoniyati yaratildi. Bolalar har bir moddaning xalqimiz hayotida tutgan oʻrni haqida maʼlumotlar berishib, savol-javoblar asnosida biri-biridan oʻrgandilar va biri-biriga oʻrgatdilar. Har bir savol javobsiz qolmaganidan ayon boʻldiki, ochiq dars oʻz oldiga qoʻygan reja va maqsadni toʻla-toʻkis ado etdi.

Dars-mashgʻulot jarayonida oʻquvchilar oʻqituvchi bilan birgalikda Konstitutsiya moddalarining inson hayotida tutgan oʻrnini hayotiy misollar tariqasida ifodalashga harakat qildilar va Qoraqalpogʻiston Respublikasi Konstitutsiyasining ahamiyatini toʻla anglab yetdilar.

Ochiq dars tahlilida maktab direktori Bahrom Boltaboyev, oʻquv ishlari boʻyicha maktab direktorining oʻrinbosari Oybek Bobojonovlar R.Avazmurodova tomonidan tashkillashtirilgan mazkur dars-mashgʻulotini keng ommalashtirish, maktabning barcha boshlangʻich sinflarida ham aynan ana shunday mavzuda ochiq darslar tashkil etish yuzasidan oʻz fikrlarini bildirdilar. Shu bilan birga Raʼno Avazmurodovaning dars oʻtish mahoratiga, intiluvchan va tashabbuskorligiga yuqori baho berdilar. Dars tahliliga bagʻishlangan qisqa fikr almashuv jarayonida ochiq darsni kuzatib borgan maktab oʻqituvchilari ham R.Avazmurodovaning muvaffaqiyatli dars oʻtganini taʼkidladilar.

Shuningdek, pandemiya sharoitida farzandlarining dars-mashgʻulotlarini toʻliq oʻzlashtirishlarida fidoyilik koʻrsatgani, onlayn darslarni uzluksiz tashkil etgani uchun bir guruh ota-onalar R.Avazmurodovaga minnatdorchilik bildirdilar.

R.YOʻLDOShEVA.