JISMONIY TARBIYa FAN OYLIGI DOIRASIDA SPORT TADBIRLARI OʻTKAZILDI

Yoshlar hayotini tubdan oʻzgartirib, qalblarida olam-olam orzular uygʻotgan 5 ta muhim tashabbuvning biri ularning boʻsh vaqtlarini mazmunli oʻtkazish, sportga keng jalb etgan holda, bu boradagi qobiliyatlarini rivojlantirishga koʻmaklashishdan iboratdir. Soha mutaxassislari tomonidan amalga oshirilayotgan saʼy-harakatlar tufayli soʻnggi yillarda sportga qiziquvchi va sport bilan shugʻullanuvchi yoshlar ham, turli xil sport toʻgaraklari soni ham keskin oshdi.
Tumanimizdagi 36-sonli umumtaʼlim maktabida ham koʻplab sport toʻgaraklari faoliyati yoʻlga qoʻyilgan boʻlib, bu toʻgaraklarda 1-sinfdan 11-sinfgacha boʻlgan oʻquvchi-yoshlar oʻzlari qiziqqan yoʻnalishlar boʻyicha shugʻullanishlari uchun barcha sharoitlar yaratilgan.

Xususan, jismoniy tarbiya fani oyligi doirasida “Sportni sev, sport bilan yasha!” shiori ostida biri-biridan qiziqarli  sport musobaqalari, viktorina savollari, sport turlari boʻyicha sinflararo bellashuvlar oʻtkazildi.

Fan oyligi doirasida oʻtkazilgan “Pahlavon Mahmud izdoshlari” shiori ostida oʻtkazilgan pahlavon bolalar musobaqalarida 11-sinf oʻquvchilari Joʻrabek  Ahmedov 1-oʻrinni, Abdulla Yoʻldoshev 2-oʻrinni, 9-sinf oʻquvchisi Temur Bobojonov va 8-sinf oʻquvchisi Ogʻabek Yoʻldoshev 3-oʻrinni egallashdi.

Shuningdek, fan oyligi doirasida “Chaqqonlik va epchillik – gʻoliblikka eltadi” shiori ostida oʻtkazilgan stol tennisi musobaqalari ham taassurotlarga boy boʻldi. 8-10-sinflar sportsevar yoshlari oʻrtasida oʻtkazilgan futbol boʻyicha musobaqalar esa maktabimizning iqtidorli charm toʻp ustalarini kashf etdi. Har bir sinf oʻquvchilaridan iborat jamoalar oʻrtasida kechgan qizgʻin musobaqalarda 1-oʻrin 10 “V” sinf oʻquvchilari jamoasiga, 2-oʻrin 10 “B” sinfga, 3-oʻrin esa 11 “B” sinf futbolchilar jamoasiga nasib etdi.

Fan oyligi doirasida oʻtkazilgan barcha tadbirlar oylik yakunida umumlashtirildi. Sinflararo musobaqalar tashkil etildi, oʻquvchilarning yil davomida jismoniy tarbiya fanidan olgan bilim va koʻnikmalari boʻyicha oʻquv yilining 4-chorak yakunlari chiqarildi. Gʻoliblar va aʼlochi oʻquvchilar ragʻbatlantirildi.

Soliyboy YOʻLDOShEV, Omonboy QURBONBOYeV, 36-sonli maktabning jismoniy tarbiya fani oʻqituvchilari.