“Yilning eng yaxshi tarbiyachisi” kasbiy koʻrik tanlovining tuman bosqichi oʻtkazildi

Mamlakatimizda maktabgacha taʼlim muassasalari tarbiyachilarining kasb mahoratini takomillashtirish, ularning ilgʻor pedagogik texnologiyalar, xususan, innovatsion usullardan samarali foydalanish boʻyicha ilgʻor pedagogik tajribalarini ommalashtirish, kadrlar salohiyatini, pedagog kadrlar bilan ishlash samaradorligini oshirish maqsadida “Yilning eng yaxshi tarbiyachisi” kasbiy koʻrik tanlovi oʻtkazib kelinmoqda.

Tumanimizda ham barcha maktabgacha taʼlim tashkilotlari pedagog tarbiyachilarni jalb qilgan holda ushbu koʻrik tanlovni oʻtkazish anʼanaga aylangan. Joriy yil ham tumanimizdagi eng ilgʻor pedagog, tarbiyachilarni aniqlash, pedogogik mahorat hamda tajribalarni almashish maqsadida “Yilning eng yaxshi tarbiyachisi” kasbiy koʻrik tanlovining tuman bosqichi oʻtkazildi. Tanlovning hududiy bosqichida 51 ta maktabgacha taʼlim tashkilotlari pedagoglari ishtirok etdilar. Hududiy bosqichda eng namunali 6 ta maktabgacha taʼlim tashkilotlari tarbiyachilari koʻrik tanlovning tuman bosqichiga saralab olindi.

Koʻrik tanlovning tuman bosqichi bellashuviga tuman Maktabgacha taʼlim boʻlimi mutaxassisi Gʻayrat Muratov, 40-sonli maktabgacha taʼlim tashkiloti direktori Sharifa Seyitova, 5-sonli maktabgacha taʼlim tashkiloti direktori Hafiza Oʻrazimbetova, 23-sonli maktabgacha taʼlim tashkiloti direktori Zaynab Ernafasova, 51-sonli maktabgacha taʼlim tashkiloti direktori Gulnoza Qurbonboyevalar hakamlik qildilar hamda tanlov ishtirokchilarini oqilona baholab bordilar.

Iqtidorli, izlanuvchan tarbiyachilar kasbiy koʻrik tanlovning tuman bosqichida beshta qiziqarli shartlar asosida sinovdan oʻtkazildilar. Dastlab ishtirokchilar “Salomlashish va tanishtirish” shartida qiziqishlari, tarbiyachilik faoliyati, kelgusidagi maqsad hamda rejalari haqida maʼlumotlar berdilar. Tanlovning ikkinchi shartida hakamlar hayʼatiga tanlov ishtirokchisining pedogogik faoliyati aks ettirilgan “Internet portfolio”si taqdim etildi. Uchinchi shartda koʻrik tanlov ishtirokchisining maktabgacha taʼlim tashkilotidagi faoliyati, ijtimoiy hayotdagi ishtiroki, shaxsiy yutuqlari va tashkil etgan turli mashgʻulotlari, toʻgaraklari jamlangan videorolik yigʻilganlar eʼtiboriga havola qilindi.

Tanlovning har bir sharti oʻzi xos tarzda, juda qiziqarli, baxs-munozaraga boy tarzda oʻtdi. Ishtirokchilar gʻoliblikni qoʻlga kiritish maqsadida bor mahoratlarini ishga soldilar. Ayniqsa, ishtirokchilarning pedagogik faoliyati mobaynida erishgan yutuqlariga bagʻishlangan toʻrtinchi shart barchada katta taassurot qoldirdi. Ushbu shartda tarbiyachilarimizning oʻquv-uslubiy, ilmiy, maʼnaviy-maʼrifiy ishlarini aks ettiruvchi materiallari va ijodiy ishlari, faxriy yorliq hamda diplomlari, shuningdek, xalqaro loyihalar hamda dasturlardagi ishtiroki yigʻilganlar eʼtiboriga namoyish qilindi. Yakuniy beshinchi shart erkin mavzu sharti boʻlib, bu shartda ishtirokchilar oʻzlarining ijodiy qobiliyatlarini namoyon qildilar. Bir-biridan ajoyib va murosasiz kechgan shartlarni hakamlar 5 ballik tizimda baholab bordilar.

“Yilning eng yaxshi tarbiyachisi” kasbiy koʻrik tanlovining tuman bosqichida 42-sonli maktabgacha taʼlim tashkiloti tarbiyachisi Feruza Oʻrazmetova “Eng yaxshi metodist tarbiyachi”, 1-sonli maktabgacha taʼlim tashkiloti tarbiyachisi Mohira Bozorboyeva “Eng yaxshi ijodkor tarbiyachi”, 10-sonli maktabgacha taʼlim tashkiloti tarbiyachisi Oʻrazgul Berdimuratova “Innovatsion va axborot texnologiyalarini qoʻllaydigan eng yaxshi tarbiyachi” nominatsiyalari, shuningdek, 24-sonli maktabgacha taʼlim tashkiloti tarbiyachisi Sharofat Rajabova “Eng yaxshi gʻoya muallifi”, 38-sonli maktabgacha taʼlim tashkiloti tarbiyachisi Shohida Rahimova “Mohir qoʻl ustasi” nominatsiyalari gʻoliblari boʻldilar. Koʻrik-tanlov yuqori malakali tarbiyachilarni aniqlash hamda ularni ragʻbatlantirishga, ularning pedagogik mahorati va ijodiy qobiliyatlarini rivojlantirishga, pedagogik faoliyatning nufuzini yanada oshirishga, kasbiy faoliyatda sogʻlom raqobat hamda ijodkorlik muhitini yaratishga xizmat qilishi, shubhasiz.

Charos Arslonova, tuman hokimligi Axborot xizmati rahbari.