“Adolat” sotsial-demokratik partiyasidan Oʻzbekiston Respublikasi Prezidentligiga nomzod Bahrom Abduhalimovning ishonchli vakili amudaryolik saylovchilar bilan uchrashdi

6-oktyabr kuni Amudaryo tumanidagi 82-sonli maktabda “Adolat” sotsial-demokratik partiyasidan Oʻzbekiston Respublikasi Prezidentligiga nomzod Bahrom Abduhalimovning ishonchli vakili amudaryolik saylovchilar bilan uchrashdi.

Mazkur uchrashuvda “Adolat” sotsial-demokratik partiyasi Qoraqalpogʻiston Respublikasi Kengashi raisi Nurlibay Qaypbergenov, “Adolat” sotsial-demokratik partiyasining Amudaryo tumani Kengashi raisi Oʻktam Yoʻldoshev, partiya faollari, deputatlar, hamkor tashkilotlar vakillari hamda Olmazor mahallasi faollari, nuroniylar, saylov yoshidagi fuqarolar qatnashishdi.

Tadbirni “Adolat” sotsial-demokratik partiyasi Qoraqalpogʻiston Respublikasi Kengashi raisi Nurlibay Qaypbergenov ochib berdi. Shundan soʻng, “Adolat” sotsial-demokratik partiyasidan Prezidentlikka nomzod Bahrom Abduhalimovning Qoraqalpogʻiston Respublikasidagi ishonchli vakili, Qoraqalpoq gumanitar fanlar ilmiy-tadqiqot instituti direktori Aymurad Alniyazov soʻzga chiqib,  yigʻilganlarni nomzodning tarjimai holi, faoliyati va saylovoldi dasturi bilan yaqindan tanishtirdi. 

Partiya tomonidan koʻrsatilgan nomzodning Saylovoldi dasturida  koʻplab masalalarga adolatli yechimlar berilgani,  sohalar kesimida istiqbolli taklif va tashabbuslar ilgari surilganligi taʼkidlandi.

Nomzodning Saylovoldi dasturida xalq deputatlari mahalliy Kengashlarning rolini kuchaytirish,  ijro hokimiyati faoliyati  ustidan  jamoatchilik nazoratini oʻrnatish, barcha darajadagi davlat hokimiyati va boshqaruvi organlariga vatanparvar, professional va fidoyi insonlar kelishini taʼminlash kabilarga eʼtibor qaratilgani aytib oʻtildi. Shuningdek, jinoyatchilikka, poraxoʻrlikka, taʼmagirlikka, zoʻravonlikka qarshi murosasiz kurashish, adolatli  va mustaqil sud-huquq tizimini yaratish ishlarini davom ettirish, sudni tom maʼnoda adolat qoʻrgʻoniga aylantirish kabi asosiy masalalar  diqqat markazidan joy olganligi taʼkidlandi.

Undan tashqari, aholi bandligini taʼminlash, ayniqsa, yoshlar uchun yangi ish oʻrinlari yaratish, milliy va  tarixiy qadriyatlarimizga asoslangan “Jamiyatda yurish-turish odob-axloq qoidalari”ni yaratish va joriy etish, aholini sifatli tibbiy xizmat bilan taʼminlash, fuqarolar orasida tibbiy madaniyatni shakllantirish  kabi masalalarning dasturdan joy olganligi  alohida eʼtirof etildi.

Muloqotlar jarayonida ishonchli vakil nomzodning oʻz dasturida taʼlim, ilm-fan rivojlanishi uchun ustuvor maqsadlarni gʻoya sifatida kiritganligi ham taʼkidlanib, dasturdan oʻrin olgan bu boradagi muhim maqsadlar bilan uchrashuvga yigʻilgan saylovchilar tanishtirildi.

Shu oʻrinda, dunyoda kechayotgan shiddatli raqobatga faqat zamonaviy ilm-fan, yuqori texnologiyalar va innovatsiya yutuqlarini keng joriy etish orqali munosib javob berish, adolatli jamiyat va adolatparvar davlat barpo etishda partiya taʼlim, ilm-fan va innovatsiyaning ahamiyatini oshirish choralarini koʻrilishi kerakligiga alohida toʻxtalib oʻtildi.

Buning uchun taʼlim va ilm-fan bilan shugʻullanuvchilarga bepul uy-joy taklif qilinishi, ilm-fanni moliyalashtirishga sarflanadigan mablagʻ 2030-yilda yalpi ichki mahsulotning 2 foiziga qadar oshishi, uni davlat byudjetidan moliyalashtirishni bosqichma-bosqich taʼminlash zarurligi qayd etildi.

Uchrashuv davomida Saylovoldi dasturida  koʻzda tutilgan masalalar boʻyicha nomzodning ishonchli vakiliga berilgan savollarga atroflicha va batafsil javoblar qaytarildi.

Soʻzga chiqqan saylovchilar tomonidan nomzodning saylovoldi dasturidagi ustuvor vazifalar qoʻllab-quvvatlandi va barcha saylovda faol qatnashishga, partiyadan koʻrsatilgan nomzodga ovoz berishga chorlandi.

Ozoda Xudoyberganova.