Variativ sinfidagi barcha bitiruvchilari yuz foiz talaba boʻlgan 56-sonli maktabda seminar oʻtkazildi

Bugungi kunda mamlakatimizda barcha sohalar qatori taʼlim sohasini rivojlantirishga ham alohida eʼtibor berilayapti. Shu boisdan ham yurtimizda “Yangi Oʻzbekiston – maktab ostonasidan, taʼlim-tarbiya tizimidan boshlanadi” degan gʻoya asosida keng koʻlamli islohotlar amalga oshirilayapti. Bular maktab taʼlimini tubdan yaxshilash va uning sifatini oshirish, muallimlarga munosib sharoit yaratish borasidagi ishlarda yaqqol koʻrinib turibdi.

Oʻzbekiston Respublikasi Prezidentining 2019-yil 29-apreldagi Farmoni bilan tasdiqlangan Oʻzbekiston Respublikasi Xalq taʼlimi tizimini 2030-yilgacha rivojlantirish kontseptsiyasini  2019-yilda amalga  oshirishning yoʻl xaritasida belgilangan bandlarini amalga oshirish maqsadida 2019-yilning 28-dekabrida Xalq taʼlimi vazirining “Umumiy oʻrta taʼlim maktablarida variativ oʻquv rejalarni tajriba-sinovdan oʻtkazish toʻgʻrisida”gi buyrugʻi qabul qilingan edi. Ushbu buyruq asosida mamlakatimizning bir qancha umumtaʼlim maktablarida variativ sinflar tashkil etildi.

Joriy yilning 8-oktyabr kuni 56-sonli maktabda mazkur maktabda faoliyat yuritayotgan ilgʻor oʻqituvchilarining variativ oʻquv rejalari asosida oʻqitish borasidagi tajribalarini ommalashtirishga bagʻishlangan seminar oʻtkazildi.

Aytish joizki, tumanimizdagi 56-sonli maktabning matematika fani oʻqituvchisi Azimboy Saparboyev tumanimizda birinchilardan boʻlib variativ sinf tashkil etishning tashabbuskori boʻldi.

Bugungi kunda maktabda Azimboy Saparboyevning shogirdlaridan Xushnud Chorshamov va Nafosat Tilovboyevalar ham variativ sinflarda dars oʻtish jarayonlarini yanada takomillashtirish yoʻlida astoydil harakat qilmoqdalar.

Bu tashabbuskor oʻqituvchilarning oʻquvchilarga yangicha uslubda taʼlim berish borasidagi harakatlari tahsinga sazovor boʻlmoqda. Ularning fidoyiliklari tufayli 2020-2021 oʻquv yili yakuniga koʻra umumiy oʻrta taʼlim maktablarida variativ oʻquv rejalar asosida tashkil etilgan sinflar oʻquvchilarining oliy oʻquv yurtlariga qabul qilinishi  borasidagi reyting natijalariga koʻra 56-sonli maktab Qoraqalpogʻiston Respublikasida birinchi oʻrinni egalladi.

Maktabning matematika fani oʻqituvchisi Azimboy Saparboyev, fizika fani oʻqituvchisi Xushnud Chorshamov hamda ona tili va adabiyot fani oʻqituvchisi Nafosat Tilovboyevalarning oʻquv jarayonini tashkil etishda oʻquvchi manfaatlarini inobatga olish, oʻquv jarayonini kompetentsiyaviy  yondashuv  asosida tashkil etish, oʻquv jarayonini oʻquvchilarning individual  xohishlariga muvofiq variativ oʻquv rejalar asosida tashkil etish, oʻquvchilarning oliy taʼlim muassalariga kirishda imtihon topshiradigan fanlarni chuqur oʻrganishlariga sharoitlar yaratish borasidagi harakatlari yaxshi natijalarni berdi.

Bunga maktabda tashkil etilgan variativ sinflar bitiruvchilaridan 94 foizining oliy taʼlim muassasalariga oʻqishga kirganligi yaqqol misol boʻla oladi.

Mazkur ilgʻor oʻqituvchilarning tajribalarini ommalashtirishga bagʻishlab oʻtkazilgan seminarda tuman xalq taʼlimi  boʻlimi xodimlari va umumtaʼlim maktablari oʻqituvchilari ishtirok etdilar.

Seminar ishtirokchilari dastlab maktabda tashkil etilgan variativ sinflarda dars oʻtish jarayonlari bilan tanishdilar va matematika fani  oʻqituvchisi Azimboy Saparboyev, ona tili va adabiyot fani oʻqituvchisi Nafosat Tilovboyeva hamda fizika fani oʻqituvchisi Xushnud Chorshamovlarning  dars oʻtish uslublarini oʻrgandilar.

Shundan keyin seminarning ikkichi qismi boshlanib, uni tuman Xalq taʼlimi boʻlimi taʼlim sifati monitoringi bosh inspektor-metodisti Rashan Xolmurodov kirish nutqi soʻzlab ochdi va olib bordi.

Seminarda 56-sonli umumtaʼlim maktabining matematika fani oʻqituvchisi, Oʻzbekiston Respublikasi Xalq taʼlimi aʼlochisi, “Qoraqalpogʻiston Respublikasida xizmat koʻrsatgan xalq taʼlimi xodimi” faxriy unvoni  sohibi Azimboy Saparboyev va fizika fani oʻqituvchisi, Qoraqalpogʻiston Respublikasi Xalq taʼlimi aʼlochisi Xushnud Chorshamovlar soʻzga chiqishib, variativ sinflarda oʻqitish yuzasidan oʻzlarining ish tajribalari haqida gapirdilar.

Shundan keyin 21-sonli maktab direktori Tursunboy Doʻschonov va 50-sonli maktab direktori Alisher Eshniyozovlar soʻzga chiqishib, maktabda tashkil etilgan variativ sinflar va ularning oʻqituvchilari faoliyatiga katta baho berdilar, bu yerdagi ilgʻor tajribalarni tumandagi barcha oʻrta taʼlim muassasalariga keng yoyish boʻyicha oʻz taklif va istaklarini bildirdilar.

Seminar yakunida maktab direktori, Qoraqalpogʻiston Respublikasi Xalq taʼlimi aʼlochisi Arzigul Xudoyberganova soʻzga chiqib, maktab oʻqituvchilarining ish tajribalarini ommalashtirishga qaratayotgan eʼtibori uchun tuman Xalq taʼlimi boʻlimi rahbariyatiga oʻz minnatdochiligini bildirdi va maktab jamoasining variativ sinflar faoliyati bilan tanishishni, bu yerdagi oʻqituvchilarning ish tajribalarini oʻrganishni xohlovchilar uchun doimo yordamga tayyor ekanligini maʼlum qildi.

Shu bilan 56-sonli maktab oʻqituvchilarining variativ oʻquv rejalari asosida faoliyat koʻrsatadigan sinflarni tashkil etish va oʻqitish borasidagi tajribalarini ommalashtirishga bagʻishlagan seminar oʻz ishini yakunladi.

A.JUMANIYoZOV, maktabning ijodiy-madaniy masalalar boʻyicha targʻibotchisi.