Ingliz tili fani boʻyicha ochiq dars oʻtkazildi

Bugungi kunda mamlakatimizda xorijiy tillarni oʻqitish orqali yosh avlodni ona Vatanga muhabbat va sadoqat, qadimiy va boy merosimizga iftixor tuygʻusi, milliy va umuminsoniy qadriyatlar ruhida tarbiyalashga alohida eʼtibor qaratilib bu borada samarali ishlar qilinmoqda. Yoshlarning chet tillarni mukammal oʻrganishlari, barcha sohalarda chet tilini bilgan holda oʻzlarini namoyon eta olishlari uchun zarur shart-sharoitlar va imkoniyatlar yaratilib, ularning xorijiy tilda ogʻzaki va yozma nutqlarini rivojlantirishga yoʻnaltirilgan tizimli ishlar tashkil etilmoqda.

Taʼlim muassasalarida taʼlim oluvchilarning chet tilida fikr yuritishlari, erkin nutqni amalga oshira olish qobiliyatlarini rivojlantirish, intellektual faoliyatini shakllantirish, chet tilini tez va oson oʻrganishlariga alohida eʼtibor qaratilib, dars jarayonlari oʻquvchilarning mustaqil izlanishlariga yoʻnaltirilgan holda tashkil etilmoqda. Bu borada zamonaviy taʼlim metodlaridan samarali foydalangan holda oʻtkazilayotgan ochiq darslar muhim ahamiyat kasb etmoqda.

Amudaryo tumani Xalq taʼlimi boʻlimiga qarashli 30-sonli umumtaʼlim maktabida ingliz tili fani boʻyicha oʻtkazilgan ochiq darsda oʻquvchilarning chet tili boʻyicha bilimlari yanada boyitildi. Maktabning 6-sinf oʻquvchilari uchun tashkil etilgan dars mashgʻulotida “What is in the fridge?” mavzusida oʻquvchilarda yangi bilimlar hosil qilindi.

Maktabning ingliz tili fani oʻqituvchisi Nargiza Qurbanboyeva ushbu ochiq darsga astoydil tayyorgarlik koʻrgani dars jarayonida yaqqol namoyon boʻldi. Ochiq darsda tuman Xalq taʼlimi boʻlimi inspektor metodisti Rayhon Yakubova, ingliz tili fani metodisti Farida Shamsiddinova hamda maktabning turli fan oʻqituvchilari ishtirok etdilar hamda ingliz tili fani oʻqituvchisi Nargiza Qurbanboyevaning pedogogik mahorati bilan tanishdilar.

Ochiq dars jarayonida dastlab oʻquvchilardan uyga berilgan vazifalari soʻraldi, soʻngra elektron doska orqali yangi mavzu yuzasidan tushunchalar berildi. Oʻqituvchi ochiq darsda ham anʼanaviy ham zamonaviy taʼlim metodlaridan, innovatsion pedogogik texnologiyalardan, turli koʻrgazmali qurollardan hamda tarqatma materiallardan foydalandi.

Ochiq darsning oʻquvchilarni kichik guruhlarga ajratgan holda, oʻyin texnologiyalaridan foydalanib tashkil etilgani oʻquvchilarning darsga boʻlgan qiziqishlarini yanada oshirib, ularning mashgʻulotda faol ishtirokini taʼminladi. 

Aytish kerakki, bugungi kunda mamalakatimizda chet tillarni oʻqitishning sifatini oshirish va yanada samarali usullarini taʼlim jarayoniga tadbiq qilish, chet tillari boʻyicha ilmiy-tadqiqot ishlarini yanada rivojlantirish, ilmiy salohiyatli mutaxassislarni tayyorlash taʼlim sohasidagi dolzarb masalalaridan biri hisoblanadi. Mamlakatimiz taʼlim tizimida ilmiy-nazariy jihatdan asoslangan, chet tillarni oʻqitishda nutqiy muloqotga yoʻnaltirilgan yangi pedagogik texnologiyalarni yorituvchi va informatsion texnologiyalar bilan jihozlangan darsliklar, oʻquv-qoʻllanmalarni yaratish va oʻquv jarayoniga joriy etib, xorijiy til taʼlimini yanada takomillashtirish milliy taʼlim dasturining asosiy maqsadi hisoblanadi.

Yoshlarga chet tillarini mukammal tarzda oʻrgatishda oʻqituvchilarga katta masʼuliyat yuklatilgan boʻlib, ulardan oʻz ustida muntazam ishlash, dars jarayonlariga ijodiy yondashish, doimo bilim, koʻnikma va malakalarini oshirib borish talab etiladi.

Tumanimizdagi 30-sonli maktabda ingliz tili fani boʻyicha tashkil etilgan ochiq darsda oʻqituvchi Nargiza Qurbanboyevaning oʻz kasbiga boʻlgan mehri hamda ishiga boʻlgan masʼuliyati bilan ochiq darsda ishtirok etganlarda iliq taassurot qoldirdi. 

Charos Arslonova.