2-sonli maktabni 2001-yilda tamomlagan sinfdoshlar 20-yildan keyin yana maktabda uchrashdilar

Bolalik damlarini qoʻmsab, olis yillar xotiralari ogʻushida yashashning gashti oʻzgacha. Buni bolalikdagi doʻstlari bilan diydorlashgan insonlar juda yaxshi bilishadi. Begʻuborlik, rostgoʻylik, samimiylikdan charogʻon bolalik damlari ana shunday diydorlashuv lahzalarida eski qadrdonlarni bir-birlariga yanada yaqinlashtiradilar. Oʻrtadagi mehr-oqibat tuygʻulari qadrdon doʻstlar diydoridan bahramand dillarga yanada samimiylik, joʻshqinlik bagʻishlaydi.

Tumanimizdagi 2-sonli umumtaʼlim maktabini 2001-yilda bitirgan, 1984-yilda tugʻilgan sobiq sinfdoshlarning 20-yildan keyingi “Diydor shirin” deb nomlangan uchrashuv marosimi ham nafaqat sobiq sinfdosh doʻstlar, balki ularning ustozlari uchun ham haqiqiy bayramona kayfiyat bagʻishladi.

Xuddi oʻquvchi darsga oshiqqani kabi sobiq sinfdosh doʻstlar erta tongdanoq qadrdon maktab ostonasiga qadam qoʻydilar. Bolalik davrlaridagi kabi bundan 20-yil avval taʼlim-tarbiya olgan, ustozlarining maroqli dars-mashgʻulotlarini tinglab, taʼsirlangan sinfxonalariga kirib, oʻzlari uchun aziz partalarga oʻtirib, ustozlarini kutdilar. Sobiq sinf rahbarlari Yangiboy Allamberganov hamda Sobir Qodirovlar sinf jurnalini ochib, yoʻqlama qilishdi. Sobiq oʻquvchilarining xotiralarini sinovdan oʻtkazib, ularga savollar berishdi.

Shundan soʻng, “Diydor shirin” tadbirining maʼnaviy-maʼrifiy, adabiy-musiqiy qismi boshlandi.

Unda maktab direktori Anvar Allamberganov soʻzga chiqib, sobiq sinfdoshlarni diydorlashuv kechasi munosabati bilan samimiy tabrikladi. Shu bilan birga sobiq sinfdoshlarning hayotda erishgan va erishayotgan yutuqlari haqida quvonib soʻz yuritdi.

Oʻz navbatida sobiq sinfdosh doʻstlar ham bir-birlariga oʻz hayotlaridagi oʻzgarishlar, ezgu ishlari haqida gapirishib, erishayotgan yutuqlarida ustozlarining hissasi kattaligini, ularning oʻgit va nasihatlari ular uchun hayotda hamisha muhimligini taʼkidladilar.

Oʻzlari taʼlim-tarbiya olgan, begʻubor bolalik xotiralariga guvoh qadrdon maktab, sinfxonalarga bir-bir kirib, olis yillardagi joʻshqin yoshlik, oʻsmirlik, bolalik  damlariga qaytib, ustozlar suhbatidan yana bir bora bahramand boʻldilar. Shundan soʻng, sobiq sinfdosh doʻstlar oʻzlariga ilk saboq berib, oq-qorani tanitgan birinchi ustozlari, marhuma Roza Abuovani eslab, uning porloq xotirasi uchun Qurʼon oyatlaridan tilovatlar qildilar.

Bugungi kunda hayot gashtini surayotgan aziz ustozlari Hanifa Rajabova, sobiq matematika fani oʻqituvchisi Gulmirza Ahmedov va boshqa aziz ustozlariga sovgʻalar berishdi. Fayzli dasturxon yozilib, kuy-qoʻshiqlar ogʻushida samimiyat hurmat-ehtirom, eʼtibor qulf urgan “Diydor shirin” uchrashuvi davomida sobiq sinfdoshlar oʻzlari uchun hamisha qadrli hayot hikmatlarini oʻrgatgan aziz ustozlari hamda hamisha muqaddas ilm maskani – 2-sonli  maktab maʼmuriyati uchun mebel sovgʻa qildilar.

Uchrashuv tadbiri yakunida sobiq ustozlar va sobiq sinfdosh doʻstlar “Diydor shirin” uchrashuv kechasini tashkil etgan Botir Ismoilov, Dilshod Matsipov, Shuhrat Sultonov, Shukurullo Matyoqubov, Javlonbek Yusupov, Joʻrabek Sobirov hamda Ruslan Sobirovlarga chin dildan minnatdorchilik bildirdilar.

“Diydor shirin” uchrashuv tadbiri sobiq sinfdoshlar oʻrtasidagi doʻstlik va qadrdonlik pishtalarini yanada mustahkamladi.

Robiya YOʻLDOShEVA.