TOSh YoP OVULIDA “MUSTAHKAM OILA – JAMIYaT TAYaNChI” DEB NOMLANGAN PSIXOLOGIK SEMINAR OʻTKAZILDI

Amudaryo tumanining Tosh yop ovulida bir guruh faol nuroniylar, boy hayotiy tajribaga ega moʻʼtabar onaxonlar va ibratli qaynonalar, namunali oilalar vakillari va yoshlarni jalb qilgan holda psixologik seminar tashkil etildi.

Joriy yil 25-fevral kuni boʻlib oʻtgan ushbu seminarda tuman hokimining xotin-qizlar masalalari boʻyicha maslahatchisi Goʻzal Soburova, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva, Ichki ishlar boʻlimining Xotin-qizlar masalalari boʻyicha katta inspektori Gavhar Utemuradova va 27-sonli maktab psixologi Mavluda Toʻrayeva, Tosh yop ovul fuqarolar yigʻini raisi Gulshod Sobirovalar qatnashishdi.

Seminarda dastlab tumanda oʻtgan davrdagi oilalar oʻrtasidagi ajralishlar, har bir ajralish tufayli begunoh goʻdaklar yetim boʻlib qolayotganligi, xotin-qizlar tomonidan yoʻl qoʻyilayotgan turli salbiy holatlar barchani jiddiy tashvishga solayotgani toʻgʻrisida soʻz yuritildi. Shuningdek, oila hayotning abadiyligini, avlodlarning davomiyligini taʼminlaydigan, muqaddas urf-odatlarimizni saklaydigan, shu bilan birga, kelajak nasllar qanday inson boʻlib yetishishiga bevosita taʼsir koʻrsatadigan tarbiya oʻchogʻi ekanligi toʻgʻrisidagi fikrlar bayon qilindi.

Tuman hokimining xotin-qizlar masalalari boʻyicha maslahatchisi, Mahalla va oilani qoʻllab-quvvatlash boʻlimi boshligʻi oʻrinbosari Goʻzal Soburova ham soʻzga chiqib, oilada sogʻlom muhitni yuksaltirish, ajdodlarimizning oila masalasidagi maʼnaviy-axloqiy meroslarini targʻib qilish, erta, yaqin qarindoshlar oʻrtasidagi nikohning salbiy oqibatlari, qaynona va kelin munosabatlarini mustahkamlashga koʻmaklashish kerakligi toʻgʻrisida oʻz mulohazalarini aytib oʻtdi.

Seminar davomida tuman Ichki ishlar boʻlimining Xotin-qizlar masalalari boʻyicha katta inspektori Gavhar Utemuradovalar Prezidentimizning 2021-yil 19-maydagi “Zoʻrlik ishlatishdan jabr koʻrgan xotin-qizlarni reabilitatsiya qilishga oid qoʻshimcha chora-tadbirlar toʻgʻrisida”gi Qarori mazmun-mohiyati hamda tazyiqqa uchragan xotin-qizlarni himoya qilish, ularning buzilgan huquqlarini tiklash, ularga nisbatan zoʻravonlik holatlarining oldini olish, ayollar tadbirkorligini qoʻllab-quvvatlash, gender tenglikni taʼminlash va xotin-qizlarni jamiyatdagi mavqeini yanada oshirishga qaratilgan chora-tadbirlarning amaldagi ijrosi xususida soʻz yuritdi.

Shuningdek, maʼruzachilar ijtimoiy jihatdan ogʻir ahvolda boʻlgan oilalarni oʻz vaqtida aniqlab, ularga ijtimoiy, huquqiy va maʼnaviy yordam koʻrsatish, huquqbuzarlik sodir etishga moyil shaxslarni oʻz vaqtida aniqlab, ular bilan manzilli profilaktik ishlarni tashkil etish, har bir sodir etilgan huquqbuzarlikning sabab va sharoitlarini chuqur oʻrganish va tahlil qilish maishiy zoʻravonlikning oldini olish borasidagi muhim qadam ekanligini eʼtirof etishdi. Malakali psixologlar tomonidan bu kabi salbiy holatlarning oldini olish yuzasidan amaliy mashgʻulotlar oʻtkazildi.

Seminar yakunida ishtorkchilarga kofe-breyk tashkil qilindi. Tadbir savol-javoblar asosida mazmunli oʻtdi.

Gavhar ChIMBAYChIYeVA, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori.