DORILOMON KUNLAR QADRI

Mustaqillik toʻgʻrisida soʻz ketganida: mustaqillik bizga nima berdi, kecha kim edig-u bugun kim boʻldik, kabi savollar xayolimizni chulgʻab oladi. Beshak, mustaqillik bizga erkin nafas va yangi farovon hayot ato etdi. Yaqin oʻtmishga nazar soladigan boʻlsak, bizning xalqimiz tahqirlangan, insoniy shaʼni va qadr-qimmati toptalgan, Respublikamiz esa agrar va qoloq hudud edi. Bugun esa har tomonlama rivojlangan, har bir soha taraqqiy topgan, barkamol farzandlari iqtidorlari bilan dunyoni lol qoldirayotgan, yuksak maʼnaviyatli, hur millatga aylandik. Istiqlolga erishishimiz natijasi oʻlaroq, asrlar silsilasida oʻz mahobatini yoʻqotmay kelayotgan muqaddas qadamjolarimiz, masjid-u madrasalarimiz qayta boʻy tikladi. Yurtimizga kelayotgan sayyohlarning soni kundan-kunga ortib borayotganligi buning yorqin misolidir.

Bugun Oʻzbekistonimiz mustaqilligi yigirma uch yoshda. Mana shu qisqa fursat ichida xalqimizning moddiy va maʼnaviy ahvoli tubdan oʻzgarib ketdi. Yurtimiz tanib boʻlmas darajada chiroy ochib, bugun dunyo ahli havas qilgulik darajada yuksalib bormoqda. Albatta, bu oʻzgarishlar, bu yuksalishlar zamirida istiqlol bergan ulkan imkoniyatlar yotadi.

Mustaqillik toʻgʻrisida yozganimda yuragimda faxr va iftixor tuygʻulari joʻsh uradi. Sababi istiqlolning bizning, mening taqdirimdagi oʻrni beqiyosdir!

Iftixor shulki, bugun qaysi bir manzilga bormang, u yerda yangilanish va bunyodkorlikning guvohi boʻlamiz.

Obod manzillardagi hurlik nafasidan bahra olib, ilm olishga boʻlgan ishtiyoqimiz, sevgan sohamizga boʻlgan muhabbatimiz va muxtasar qilib aytganda, yashashga boʻlgan ixlosimiz yanada ortadi.

Bugun jonajon Oʻzbekistonimiz mustaqilligining yigirma uch yilligi munosabati bilan yurtimizdagi barcha shaharu qishloqlarda bayram shukuhi kezmoqda. Har bir yurtdoshimiz koʻnglida ozod elning farzandi ekanligidan gʻururlanish kabi tuygʻular kechayotganligiga yana bir karra guvoh boʻlamiz.

Mustaqillik toʻgʻrisida koʻp gapirish mumkin, ayniqsa istiqloldan keyin bizning milliy bayramlarimiz qayta tiklandi. Buyuk bobokalonlarimiz ilmiy merosini oʻrganish baxtiga erishdik.

Dunyodagi ayrim davlatlarda notinchlik hukm surayotgan bir paytda, biz, har birimiz mana shu dorilomon kunlarning qadriga yetib va dilimizda shukronalik hissi bilan yashashimiz kerak.

Taniqli yozuvchimiz Oʻ.Hoshimov shunday yozadi: "Bir gal ancha olis safarga chiqishga toʻgʻri keldi.

Avval Germaniyaga uchdik. Undan Amerikaga. Soʻng Shveytsariyaga. Keyin Angliyaga. Nihoyat Londondan Toshkentga uchadigan boʻldik. Havo kemasiga oʻtirishimiz bilan osoyishta va yoqimli ovoz yangradi: assalomu alaykum, xonimlar va janoblar! Sizlarni Oʻzbekiston havo yoʻllari milliy aviakompaniyasi nomidan muborakbod etamiz!

Rostini aytsam, koʻzimdan yosh chiqib ketdi. Bu soʻzlar mening tilimda, ona tilimda jarangladi! Vatanimdan minglab chaqirim narida, tagʻin yuzlab xorijiy yoʻlovchilar oʻtirgan kemada!

Aqalli mana shu holatning oʻzi uchun istiqlolga ming bora taʼzim qilishga tayyorman!”

Bunday holatlarga hozirgi kunda har birimiz, har kuni duch kelamiz. Shuning uchun ham biz Oʻzbekistondek kelajagi buyuk yurt farzandi ekanligimizdan faxrlanamiz.

Yoshi ulugʻ otaxonu-onaxonlarimizning ezgu niyatlar ila qoʻllarini duoga ochib, elga tinchlik tilayotganini koʻrib, duoingiz ijobat boʻlsin deymiz! Shu mustaqil yurtimizning tinchligi, osoyishtaligi uchun oʻzimiz ham masʼul ekanligimizni chin dildan his qilamiz.

Eng ulugʻ, eng aziz bayramimiz qutlugʻ boʻlsin, azizlar!

Aziza MADRAHIMOVA,

Mangʻit Iqtisodiyot kasb-hunar kolleji 3-bosqich oʻquvchisi.