QUMYoP MFYDA TUMAN TIBBIYoT BIRLAShMASI BOSh ShIFOKORI AHOLI SOGʻLIGʻINI SAQLASh BOʻYIChA OLIB BORILAYoTGAN IShLAR XUSUSIDA HISOBOT BERDI

Shu yilning 18-martida davlatimiz rahbari Shavkat Mirziyoyev tibbiyot xodimlari bilan boʻlgan ochiq muloqotida fidoyilik bilan mehnat qilayotgan shifokorlar mehnatiga yuksak baho berish barobarida sohada hali qilinishi kerak boʻlgan vazifalarga ham keng toʻxtalgan edi.

Ayni kunlarda mamlakatimizning barcha hududlarida boʻlgani kabi tumanimizda ham “Tibbiyotdagi islohotlar – inson qadri uchun” mavzusidagi ochiq muloqotda belgilab berilgan dolzarb vazifalarning ijrosiga qaratilgan saʼy-harakatlar olib borilmoqda.

Tuman Tibbiyot birlashmasida bu borada “Yoʻl xarita” ishlab chiqilib, shu asosda koʻpgina chora-tadbirlar amalga oshirilmoqda. Shunga koʻra, joriy yilning 23-aprelida Qumyop mahallasida tuman Tibbiyot birlashmasi bosh shifokori Faxriddin Abdullayev aholi sogʻligʻini saqlash borasida mahallada olib borilayotgan ishlar yuzasidan hisobot berdi.

Tadbirga mahalla faollari, nuroniylar va tibbiyot xodimlari ishtirok etdilar. 39-sonli maktab faollar zalida boʻlib oʻtgan tadbirni mahalla fuqarolar yigʻini raisi Jumaboy Matyoqubov ochdi va olib bordi.

Tuman Tibbiyot birlashmasi bosh shifokori kun tartibidagi masala yuzasidan soʻzga chiqdi. U oʻz maʼruzasida mahallada sogʻliqni saqlash borasida olib borilayotgan ishlarga keng toʻxtaldi.

Taʼkidlanganidek, tuman markazidan olisda joylashgan Qangli ovuli hududidagi Qumyop mahallasi aholisiga tibbiy xizmatdan foydalanishda qulaylik yaratish uchun konteyner qoʻyilib, 3 ta aholi punktlaridagi 1921 nafar aholiga xizmat koʻrsatish yoʻlga qoʻyilgan.

Qumyop mahallasida jami 4341 nafar aholi istiqomat qiladi. Ularga Qangli ovulida joylashgan Qangli oilaviy shifokorlik punkti orqali birlamchi tibbiy xizmat koʻrsatiladi. Mahallaning eng olis hududi ushbu punktdan 14 kilometr masofada joylashganligi uchun joriy yilning 1 choragida tuman Tibbiyot birlashmasining koʻp tarmoqli poliklinikasi tor doira mutaxassislari ishtirokida mahallaning chekka hududlarida tibbiy koʻriklar oʻtkazildi. Tibbiy koʻriklarga jami 4221 nafar aholi qamrab olindi. Koʻriklar davomida 17 ta xonadonda uyda yotib qolgan nogironligi bor bemorlar aniqlanib, tibbiy tekshiruvdan oʻtkazildi.

Shuningdek, tekshiruvlar davomida 3 nafar fuqaroda oʻt-tosh kasalligi aniqlanib, ular jarrohlik amaliyoti bilan davolandi. Hududdagi 39-sonli, 61-sonli, 74-sonli maktablar oʻquvchilari, 44-sonli maktabgacha taʼlim tashkiloti tarbiyalanuvchilari 100 foiz tibbiy koʻrikdan oʻtkazildi.

2021-yilgi xatlov natijasiga koʻra Qumyor mahallasi boʻyicha 583 nafar aholi dispanser nazoratida turadi. Shularning 86 nafari nogironligi boʻlgan fuqarolar boʻlib, tibbiyot xodimlari ulardan muntazam xabar olib turadi. Joriy yilda mahallada 20 nafar chaqaloq dunyoga keldi. Bolalar, onalar oʻlimi qayd etilmadi. Shu yilning oʻtgan uch oyida jami 238 nafar bolalar profilaktik emlandi.

Bosh shifokor hisobotidan soʻng tuman hokimi oʻrinbosari Mahmud Shermetov, tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, Qangli oilaviy shifokorlik punkti mudiri Zamira Saparova, Qumyop mahalla fuqarolar yigʻini raisi Jumaboy Matyoqubovlar kun tartibidagi masala yuzasidan oʻz fikr-mulohazalarini bildirdilar.

Mahalla fuqarolaridan Rayhon Yusupova, Sapargul Eshmonova, Robigʻa Gʻoyibnazarovalar aholiga koʻrsatilayotgan tibbiy xizmatdan mamnunligini izhor etdilar.

Shuningdek, tuman Tibbiyot birlashmasi bosh shifokorli Faxriddin Abdullayev ishtirokchilarni qiziqtirgan savollarga batafsil javoblar berdi hamda kelgusida tibbiy xizmat hajmi va sifatini yanada yaxshilash chora-tadbirlarini koʻrilishini maʼlum qildi.

Yigʻilishda tuman Tibbiyot birlashmasi bosh shifokorining Oʻzbekiston Respublikasi Prezidentining tibbiyot xodimlari bilan uchrashuvda belgilab bergan vazifalarini Qumyop mahallasida ijro qilish boʻyicha amalga oshirayotgan ishlari qoniqarli deb topildi.

O.RAJABOVA.