69-sonli umumtaʼlim maktabida “Maktab kubogi” uchun bellashuvlar oʻtkazildi

Har jihatdan yetuk, intellektual rivojlangan, bilimli va tafakkur olami keng yoshlarni tarbiyalash pedagog xodimlarning asosiy maqsadi sanaladi.

Shu maqsadda Amudaryo tumanidagi umumiy oʻrta taʼlim maktablarida faoliyat yuritayotgan fidoiy oʻqituvchilar har bir oʻquvchining qobiliyatlarini rivojlantirish, isteʼdod va bilimini yuzaga chiqarishga intilib astoyidil mehnat qilib kelmoqdalar.

Qolaversa, Oʻzbekiston Respublikasi Prezidentining “Yoshlar bilan ishlash tizimini samarali tashkil etish, madaniyat, sanʼat, sport, axborot texnologiyalari, kitob oʻqishga qiziqishini oshirish boʻyicha “Besh muhim tashabbus”dan kelib chiqib, pedagoglar tomonidan turli tadbirlar va bellashuvlar oʻtkazilib kelinmoqda.

Shunday bellashuvlardan biri Amudaryo tumani Xalq taʼlimi boʻlimiga qarashli 69-sonli umumtaʼlim mktabida maktab direktori Dilshod Babaniyozov tashabbusi bilan tashkil etildi.

Maktab kubogi uchun barcha fanlardan oʻtkazilgan makur bellashuvlarda maktabda taʼlim olib kelayotgan jami 714 nafar oʻquvchidan 500 ga yaqin oʻquvchi qatnashib oʻz bilim va salohiyatini sinovdan oʻtkazdilar.

Gʻolib boʻlgan oʻquvchilar “Eng yaxshi futbol jamoasi”, “Eng yaxshi atletika gʻolibi”, “Eng yaxshi biologiya bilimdoni”, “Eng yaxshi kimyogar”, “Eng yaxshi fizika bilimdoni”, “Eng yaxshi ona tili bilimdoni”, “Eng yaxshi chet tili bilimdoni” va boshqa nominatsiyalari boʻyicha taqdirlandilar.

Oʻquvchilar oʻrtasida bunday bellashuvlarning oʻtkazilishi ular oʻrtasida hamjihatlik, doʻstona muhitni qaror toptirish bilan birgalikda isteʼdod va qobiliyatlarini yanada rivojlantirishga, oʻz ustida yanada koʻproq ishlashga chorlaydi.

Shu oʻrinda aytish kerakki, tumanimizda faoliyat yuritayotgan 69-sonli maktab jamoasi oʻquvchilarga har tomonlama oʻrnak boʻlib, ularga sifatli taʼlim bilan birgalikda yuksak insoniy fazilatlarga asoslangan tarbiya ham berib kelmoqdalar.

Oʻqituvchilar va oʻquvchilar oʻrtasidagi doʻstona munosabatning namunali tarzda yoʻlga qoʻyilganligini oʻquvchilar yuzidagi mamnunlik ifodasi va tabassumlaridan ilgʻab olish qiyin emas.

Maktabda faoliyat yuritayotgan xodimlar oʻrtasidagi sogʻlom raqobat muhiti maktabdagi oʻquvchilarning bilim salohiyati oshishiga va yuqori marralarni egallashlarida muhim omil boʻlib xizmat qilmoqda.

2021-2022 oʻquv yilida maktabda taʼlim sifatini oshirish boʻyicha samarali ishlar amalga oshirildi. Ushbu sayʼ-harakatlarning natijasi oʻlaroq fanlar olimpiadasida ona tili fani oʻqituvchisi Saida Najmatdinovaning 9-sinf oʻquvchisi Rustamova Sarvinoz, qoraqalpoq tili fani oʻqituvchisi Mahbuba Sariyevaning 10-sinf oʻquvchisi Rahimboyeva Dinora, nemis tili fani oʻqituvchisi Boltayeva Moʻtabarning 10-sinf oʻquvchisi Rahimboyeva Sevinchoy, 11-sinf oʻquvchisi Ollanazarov Ravshanbeklar Qoraqalpogʻiston Respublikasi bosqichida faol qatnashib sovrinli oʻrinlarni qoʻlga kiritdilar.

Shuningdek, tumanimizda sektorlar kesimida oʻtkazilgan futbol va mini futbol musobaqalarida ham maktab oʻquvchilari faol qatnashidilar. Bundan tashqari, sportning boshqa turlari boʻyicha oʻtkazilayotgan musobaqalarda maktab oʻquvchilari epchillik hamda uddaburonlik qobiliyatlarini namoyon qilib, sovrinli oʻrinlarni qoʻlga kiritishmoqda.

Maktabdagi oʻquvchilar tarbiyasi, ularga berilayotgan bilim va koʻnikmalar maktabning maʼnaviy-maʼrifiy ishlar boʻyicha direktor oʻrinbosarlari Dilshod Boltayev, Joʻrabek Tajimurodov, oʻquv ishlari boʻyicha direktor oʻrinbosari Jahongir Jumanovlar tomonidan doimiy nazoratda boʻlganligi sabab 69-maktab tumanimizdagi namunali maktablar safidan joy olgan.

 Shu oʻrinda aytish kerakki, yosh avlodga qaratilayotgan hurmat va eʼtibor har qachongidan ham kuchaygan. Sababi, ertangi kunning umidlari boʻlgan yoshlar davlat rivojlanishi va taraqqiyotini belgilovchi muhim ijtimoiy qatlam sanaladi.

Shunday ekan, har bir yosh avlodning barkamol shaxs boʻlib voyaga yetishlarida maktabgacha taʼlim, umumiy oʻrta taʼlim va Oliy taʼlim jipsligi muhim ahamiyat kasb etadi.

F.Eshimbetova