2-sonli kasb-hunar maktabida “Ochiq eshiklar kuni” boʻlib oʻtdi

Oʻzbekiston Respublikasi Prezidentining 2019-yil 6-sentyabrdagi “Professional taʼlim tizimini yanada takomillashtirishga doir qoʻshimcha chora-tadbirlar toʻgʻrisida”gi Farmoniga asosan Amudaryo xizmat koʻrsatish va servis kasb-hunar kolleji negizida Amudaryo tumani 2-sonli kasb-hunar maktabi qayta tashkil qilingan edi.

Mazkur oʻquv yurtida jismonan sogʻlom, ruhan va aqlan rivojlangan, mustaqil fikrlaydigan, Vatanga sodiq, qatʼiy hayotiy nuqtai nazarga ega yoshlarni tarbiyalash, ularning ijodiy va intellektual salohiyatini qoʻllab-quvvatlash va roʻyobga chiqarish, hamda bitiruvchilarni xususiy tadbirkorlik sohasiga jalb etish maqsad qilingan boʻlib, bu boradagi ishlar izchillik bilan amalga oshirilmoqda.

Kasb-hunar maktabida 24 nafar oʻqituvchi va 13 nafar ishlab chiqarish taʼlim ustalari oʻquvchilarga taʼlim va tarbiya berib kelmoqdalar.

20-may kuni 2-sonli kasb-hunar maktabida “Ochiq eshiklar kuni” boʻlib oʻtdi. “Ochiq eshiklar kuni”ga Amudaryo tumani hududidagi barcha umumtaʼlim maktablardan 9-sinfni tugatayotgan oʻquvchilar hamda ularning ota-onalari tashrif buyurishdi.

Tadbir mehmonlariga kasb-hunar maktabida taʼlim olayotgan oʻquvchi yoshlarning amaliyot davrida tayyorlagan asbob-uskunalari, uy-roʻzgʻor buyumlari, panjara eshiklari, mayishiy texnika vositalari, pishiriq va qandolot, tikuvchilik mahsulotlari koʻrgazmaga qoʻyildi.

Shuningdek, koʻrgazmada “Besh muhim tashabbus” ijrosi asosida tashkil qilingan toʻgaraklar faoliyatidan lavhalar namoyish qilindi.

Oʻquvchilar tomonidan namoyish qilingan sport chiqishlari, tasviriy sanʼat hamda kitobxonlik koʻrgazmalari, badiiy chiqishlar tadbir ishtirokchilarida katta tassurot qoldirdi.

Maʼlumot uchun aytish kerakki, kasb-hunar maktabida avtomobillarni taʼmirlash chilangari, avtomobil yurish qismlariga texnik xizmat koʻrsatish va taʼmirlash chilangari, tikuvchi, payvandlovchi, gaz va suv isteʼmol nazoratchi operatori, oshpaz, qandolatchi, hamda axborot vositalari mashinalari va kompyuter tarmoqlari operatori yoʻnalishlari boʻyicha oʻquvchilar taʼlim olishmoqda.

Kasb-hunar maktabiga 2022-2023 oʻquv yili uchun 7 ta yoʻnalishga avtomobil dvigatellarini tashxislash va taʼmirlash, avtomobil elektr va elektron jihozlariga xizmat koʻrsatish, tikuvchilik, payvandlovchi, gaz va suv isteʼmol nazoratchi operatori, oshpaz-qandolatchi, axborot vositalari mashinalari va kompyuter tarmoqlari operatori yoʻnalishlari boʻyicha 210 nafar oʻquvchini qabul qilish rejalashtirmoqda.

“Ochiq eshiklar” kunida malakali ustozlar tomonidan 9-sinf bitiruvchilari va ularning ota-onalariga ushbu yoʻnalishlarda olib boriladigan taʼlim dasturlari yuzasidan batafsil maʼlumot berildi.

Shu oʻrinda aytish kerakki, Respublikamizning boʻylab faoliyat yuritayotgan 339 ta kasb-hunar maktablarining barchasida kelgusida ishlash va oliy taʼlim muassasalariga hujjat topshirish huquqini beradigan davlat namunasidagi diplom beriladi.

Bilim olish bilan birgalikda kasb-hunar egallab, oʻzining tadbirkorlik faoliyatini yoʻlga qoʻyishni istovchi oʻgʻil-qizlarni 2-sonli kasb-hunar maktabi oʻz bagʻriga chorlaydi.

F.Eshimbetova.