IQTIDORLI OʻQUVChILARNI RAGʻBATLANTIRISh – TAʼLIM SAMARASINI OShIRADI

Mamlakatimiz taʼlim tizimidagi islohotlar, fan olimpiadalari, turli musobaqalar, oʻquv yurtlarida tashkil etilayotgan koʻrik-tanlovlar yoshlarimizning oʻz isteʼdodlarini namoyon etishlariga xizmat qilmoqda. Ushbu imkoniyatlardan samarali foydalanayotgan yosh avlod yutuqlarga erishib, dunyoga tanilmoqda va yurt kelajagiga, taraqqiyotiga daxldorligini anglagan holda shunga munosib, komil insonlar boʻlib ulgʻayishga harakat qilishmoqda.
Men koʻp yillardan 38-sonli maktabda ingliz tili fanidan dars berib kelmoqdaman. Oʻquvchilarimizning til oʻrganishga boʻlgan qiziqishlari yildan-yilga ortib bormoqda. Chunki bugungi kun yoshlari til bilsa dunyoni tanishini anglab yetishmoqda.

Oʻquvchilarning qiziqishlariga qarab, maktabimizda toʻgaraklar tashkil qilganmiz, darslarni ham yangi pedagogik texnologiyalar va uslublardan foydalangan holda oʻtkazmoqamiz. Men taʼlimda samaradorlikka erishish, oʻquvchi-yoshlarning qiziqishlarini yanada oshirish maqsadida doim ularni faxriy yorliqlar va tashakkurnomalar bilan ragʻbatlantirib boraman.
Mazkur oʻquv yili tugashi arafasida ham oʻzim rahbarlik qilayotgan 7-“B” sinf oʻquvchilarining yil davomidagi  baholari, reyting natijalari asosida 1-,2-,3-oʻrinlarni aniqladim. Yil yakuni koʻrsatkichlariga koʻra,  eng aʼlochi va namunali oʻquvchilardan Rayhonoy  Qurbonboyeva 1-oʻrin, Sarvinoz Fayzullayeva, Nursaule Nurekeshova, Kamron Rustamboyev va Dinora Tursunboyevalar 2-oʻrin, Dinora Fayzullayeva va Mashhura Tursunboyeva 3-oʻrin deb topildilar.

Shu munosabat bilan oʻtkazilgan taqdirlash marosimida maʼnaviy-maʼrifiy ishlar boʻyicha direktor oʻrinbosari Nazokat Yusupova ishtirok etdi va oʻquvchilarni tabriklab, kelgusi yildagi oʻqishlariga muvaffaqiyat tiladi. Yilni muvaffaqiyatli, aʼlo baholarga yakunlab, jamoat ishlarida faol qatnashgan ushbu oʻquvchilarga va ularning ota-onalariga tashakkurnomalar, sovgʻalar topshirdi.

Nodira Qurbonboyeva,

38-sonli maktab oʻqituvchisi.