OQ OLTINLIKLAR SARBALAND XIRMON BUNYoD ETIShMOQDA

Ayni kunlarda barcha joylarda boʻlgani kabi Amudaryo tumanidagi fermer xoʻjaliklari dalalarida ham paxta yigʻim-terimi avjida. Mohir terimchilar erta bahordan to yoz oxirigacha astoydil parvarish qilingan gʻoʻzadan yetishtirilgan moʻl hosilni yigʻib-terib, sarbaland xirmon bunyod etish, oilalariga daromad keltirish maqsadida astoydil harakat qilishmoqda.

Oq oltin ovulidagi Rashid Qutlimurodov raislik qilayotgan “Saparboy Qodir” fermer xoʻjaligi ham tumanda birinchilardan boʻlib paxta yigʻim-terimiga kirishgan edi. Xoʻjalikda 48 gektar yerda “Mangʻit-1” navli paxta yetishtirildi. Bugunga kelib ushbu xoʻjalik dalalaridan 40 tonnadan ziyod birinchi navli paxta terib olindi. Hosildorlik gektaridan 30 tsentnerni tashkil qilmoqda. Xoʻjalik terimchilari bir kunda 6-8 tonna hosil topshirib, tumanimiz “oq oltin” xirmoni yuksalishiga munosib hissa qoʻshishmoqda.

Terimchilarga bepul tushlik qilib berilmoqda. Terim ilgʻorlari fermer xoʻjaligi tomonidan alohida ragʻbatlantirib borilmoqda. Bu ragʻbat hasharchi-yu terimchilarga yanada koʻproq kuch-gʻayrat, shijoat bagʻishlamoqda.

Joriy yilda tumanimizda paxta xom ashyosi yetishtiruvchi fermer xoʻjaliklari uchun barcha sharoitlar yaratildi. Urugʻlik chigit, mineral oʻgʻit, yonilgʻi-moylash mahsulotlari oʻz vaqtida dala boshiga yetkazilib berildi. Fermer xoʻjaliklari texnika taʼminoti yaxshilandi. Chigit zamonaviy seyalkalar yordamida yerga qadaldi. Ana shu omillar va suvdan oqilona foydalanish, fermer xoʻjaligi dalalarida mehnat qilgan dehqonlarimizning fidokorona mehnati evaziga dalalarda moʻl hosil toʻplashga erishildi.

Hozirda tumanimiz dalalarida halol mehnat hamda katta xarajat evaziga yetishtirilgan paxta hosilini qisqa muddatlarda va sifatli yigʻib-terib olish ishlari qizgʻin davom etmoqda.

Klaster korxonasi – masʼuliyati cheklangan jamiyat shaklidagi “Amudaryotex” xorijiy korxonasi tomonidan 352 ta fermer xoʻjaligi bilan shartnoma tuzilgan boʻlib, chigit ekilgan maydon 13900 gektarni tashkil qiladi. Ushbu paxta dalalarida hosildorlikni 32,2 tsentnerga, yalpi hosilni 44 ming 755 tonnaga yetkazish moʻljallangan.

Tumanda 2022-yil paxta yigʻim-terimi mavsumiga puxta tayyorgarlik koʻrish va uni optimal muddatlarda amalga oshirish maqsadida chora-tadbirlar dasturi ishlab chiqildi. Shunga koʻra 290 ta terim otryadlari tashkil qilindi. Terim otryadlariga tajribali xoʻjalik faollaridan iborat otryad rahbarlari tayinlandi. Terimchilarga oʻz vaqtida terim pullarini berib borishni tashkil qilish maqsadida bank xodimlari biriktirildi.

Otryadlarga jami 23 ming 266 nafar terimchilar jalb qilingan boʻlib, ular ayni mavsum davomida terimga koʻmaklashishmoqda. Shundan 9283 nafarini paxta toʻqimachilik va fermer xoʻjaligi ishchilari, 13983 nafarini uyushmagan aholi tashkil qiladi.

Paxta yigʻim-terim ishlarida 260 ta paxta tashish texnikalari, 535 ta tirkamalar, 580 ta tarozi, 580 ta qozon-oʻchoq, 580 ta samovar, 870 ta suv saqlash baklari, 52108 ta etaklardan foydalanilmoqda. Terimchilar mavsum boshidan 19-sentyabrgacha tumanimiz paxta xirmoniga 6206 tonnadan ortiq paxta topshirishga muvaffaq boʻlishdi.

Barcha hududlarda boʻlgani kabi “Saparboy Qodir” fermer xoʻjaligi paxtazorlarida terim ishlari ayni avjida. Ilgʻor terimchilardan Gavhar Boltaboyeva, Xolida Pasiyeva, Nargiza Oʻrozboyeva, Sayyora Haydarova, Shahlo Shomurodova, Shohida Eriyeva, Muhabbat Quvvatboyeva va boshqalar terim surʼatini kun sayin oshirib, xoʻjalik xirmonini yuksaltirishga munosib hissa qoʻshishmoqda va barchaga oʻrnak boʻlishmoqda.

Dastlabki dovondan oshib, yanada yuksak xirmon barpo etish istagida paxta terimini jadal davom ettirayotgan “Saparboy Qodir” fermer xoʻjaligi kabi xoʻjaliklar soni tumanimizda kundan-kunga ortib bormoqda.

O.Xudoyberganova.