JORIY YILNING OʻTGAN 9 OYIDA TEZ TIBBIY YoRDAM BOʻLIMI 37744 NAFAR BEMORGA TEZ TIBBIY YoRDAM KOʻRSATDI

Mamlakatimizda sogʻliqni saqlash tizimini rivojlantirish, fuqarolarning sogʻliqni saqlashga doir huquqlarining davlat tomonidan kafolatlanishini taʼminlash, fuqarolarda sogʻlom turmush tarzini shakllantirish, aholi barcha qatlamlarining tibbiy xizmatdan foydalanishi uchun sharoit yaratish borasida kompleks chora-tadbirlar amalga oshirilmoqda.

Sohada amalga oshirilayotgan islohotlar tez tibbiy yordam koʻrsatish sifati yaxshilanishi, hayot uchun xavf tugʻdiruvchi holatlarda bemorlarga tezkor tibbiy yordam berish imkonini berayapti.

Amudaryo tumani tibbiyot birlashmasining tez tibbiy yordam boʻlimi tuman aholisiga zarurat tugʻilganda kecha-yu kunduz uzluksiz tez tibbiy yordam koʻrsatmoqda. Buning uchun 15 ta brigada faoliyati yoʻlga qoʻyilgan boʻlib, chaqiruv boʻlgan hududga eng yaqin joylashgan brigada chaqiruvga tezkor yoʻnaltiriladi. Bu amaliyot sogʻligʻi xavf ostida qolgan bemorga qisqa fursatda tibbiy yordam koʻrsatilishini taʼminlaydi.

Chaqiriqlarni qisqa “103” liniyasi orqali berish yoʻlga qoʻyilgan. Dispetcher xonasida manitor oʻrnatilgan. Bu boʻlimning barcha avtomashinalariga sunʼiy yoʻldosh orqali kuzatuv tizimi oʻrnatilganligi tufayli harakatlanishini onlayn kuzatib borish imkonini beradi. Shu tariqa chaqiruvga tez tibbiy yordam xodimlari tezkor yetib boradi.

Tumanimiz aholisiga tez tibbiy yordam koʻrsatishda 37 nafar asosiy va 54 nafar oʻrindosh shifokorlar, 141 nafar oʻrta tibbiyot xodimlari mehnat qilishmoqda. Shifokorlarning 52 nafari malaka toifasiga ega. Chaqiruvga oʻz vaqtida yetib borishida 15 ta avtomashinalar xizmatidan foydalaniladi. Boʻlim reanimobil avtomashinasi, umumtarmoq brigadalar mashinalari kerakli asbob-uskunalar, jihozlar bilan taʼminlangan.

Shuningdek, boʻlimda tez tibbiy yordam koʻrsatilishi uchun 41 nomdagi dori preparatlari bilan taʼminlangan.

Boʻlim tibbiyot xodimlarining chaqiruv boʻlganda bemorga birinchi tez va sifatli tibbiy yordam koʻrsatishi uchun barcha sharoitlar yaratilgan. Bundan unumli foydalanib, xalqimiz sogʻligʻini saqlash yoʻlida fidoyilik bilan mehnat qilmoqdalar.

Joriy yilimizning oʻtgan 9 oyi davomida boʻlimimizga 38 ming 5 ta murojaatlar kelib tushdi. Shundan 37 ming 741 nafar bemorga tez tibbiy yordam koʻrsatilgan.

Jami chaqiriqlarning 914 tasi baxtsiz hodisalar, 1909 tasi shoshilinch chaqiriqlar, 16337 tasi shoshilinch boʻlmagan chaqiriqlar, 1472 tasi tugʻruq va homiladorlar patalogiyasi boʻyicha chaqiriqlar, 19 tasi esa shifoxonadan shifoxonaga tashishlarni tashkil etadi.

Boʻlimda 1889 nafar bemorga ambulator yordam koʻrsatildi. Har bir chaqiriqqa sarflangan dori-darmon 6416 soʻmlikdan ziyodni tashkil etadi.

Bizning boʻlimimiz shifokorlari zimmasidagi vazifa juda masʼuliyatli: tezkor tibbiy yordamga muhtoj insonga aniq tashxis qoʻyib, tez tibbiy yordam koʻrsatish. Bu yoʻlda bor kuch va imkoniyatlarimizni sarflayveramiz.

K.ShABAYeV, tuman Tibbiyot birlashmasi tez tibbiy yordam boʻlimi mudiri.