KONSTITUTsIYaMIZNING 30 YILLIK BAYRAMI KENG NIShONLANDI

Yurtimizda har yili 8-dekabr – Oʻzbekiston Respublikasi Konstitutsiyasi qabul qilingan kun umumxalq bayrami sifatida keng nishonlanadi. Bu yil Konstitutsiyamiz qabul qilinganiga 30-yil toʻldi.

Oʻtgan davr mobaynida davlatimizning xalqaro maydonda oʻz oʻrnini topishi, barcha sohalarda keng koʻlamli islohotlarni amalga oshirish va yuksak marralarga erishish, xalqimiz uchun hech kimdan kam boʻlmagan farovon hayot barpo etishda asosiy qonunimiz – Oʻzbekiston Respublikasi Konstitutsiyasi mustahkam huquqiy asos boʻlib xizmat qildi.

Amudaryo tumanida ham Bosh Qomusimizning 30 yilligi keng nishonlanib, sana munosabati bilan “Konstitutsiya – qomusimiz” deb nomlangan katta tadbir oʻtkazildi.

7-dekabr kuni tuman Madaniyat markazining kontsertlar zalida boʻlib oʻtgan tadbirda tuman hokimi Sultonboy Yoʻldoshev, sektorlar rahbarlari, hokim oʻrinbosarlari va tegishli davlat organlari masʼullari, deputatlar, keng jamoatchilik vakillari qatnashdi.

Tadbirda tuman hokimi Sultonboy Yoʻldashev nutq soʻzlab, barchani bayram bilan tabrikladi. Tuman hokimi Konstitutsiyaga tayangan holda Prezidentimiz rahbarligida Yangi Oʻzbekistonni barpo etish boʻyicha keng koʻlamli islohotlar amalga oshirilayotgani, oʻtgan yillar davomida davlatimiz va jamiyatimiz hayotida juda katta yangilanishlar roʻy berayotgani, Asosiy Qonunimizda belgilanganidek, xalq manfaatining hamma narsadan ustunligi, erkinlik va ochiqlik, qonun ustuvorligi tamoyillari nafaqat Konstitutsiyamizda, balki amalda ham davlatimiz siyosatining asosiy yoʻnalishiga aylangani xususida soʻzladi.

Tadbir davomida turli sohalarda mehnat qilib, tumanning ijtimoiy-iqtisodiy rivojiga munosib hissa qoʻshib kelayotgan bir qator fidoyilarga “Konstitutsiyaning 30 yilligi” koʻkrak nishoni tantanali ravishda topshirildi.

Darhaqiqat, Konstitutsiyamizdagi “Xalq davlat hokimiyatining birdan-bir manbaidir” degan tamoyildan kelib chiqib aholi bilan doimiy muloqot qilish davlat idoralarining bosh vazifasi etib belgilandi. Davlat organlari rahbarlari fuqarolar oldida hisobot beradigan, ularning muammolarini tinglab, hal qiladigan samarali tizim yoʻlga qoʻyildi. Davlat organlari faoliyatida ochiqlik va oshkoralik amalda taʼminlanib, muhim qaror va qonunlar loyihalari muhokamalarida fuqarolarimiz ham faol ishtirok etmoqda. Byudjet mablagʻlaridan foydalanish, davlat xaridlari va boshqa koʻplab masalalar boʻyicha muhim koʻrsatkichlar jamoatchilikka ochiq taqdim qilinmoqda.

Yurtimizda aholining ehtiyojmand qatlamlarini himoya qilish, kambagʻallikni qisqartirish, hududlarni izchil rivojlantirish borasida tizimli ishlar qilinmoqda. Shu maqsadda joriy etilgan “Temir daftar”, “Ayollar daftari”, “Yoshlar daftari”, shuningdek “mahallabay” va “xonadonbay” ishlash tizimlari bugungi kunga kelib dastlabki ijobiy natijalarini bermoqda.

Tumanimizda ham ijtimoiy himoya daftarlariga kiritilgan jami 602 nafar ishsiz fuqaroga joriy yil boshidan beri 2,4 mlrd. soʻmlik subsidiyalar ajratilib, bandligi taʼminlandi. “Oilaviy tadbirkorlikni rivojlantirish” dasturi doirasida 3 090 nafar fuqaroga salkam 51 mlrd. soʻmlik kreditlar ajratildi.

Birgina “Inson qadrini ulugʻlash va faol mahalla yili” deb eʼlon qilingan joriy yilda jami 77 ta obʼektlarda 112,3 mlrd. soʻmlik qurilish-taʼmirlash ishlari amalga oshirilmoqda. Bularning barchasi Konstitutsiyamizda belgilab qoʻyilgan insonparvar tamoyillarning hayotiy ifodasidir.

Tadbirning tantanali qismi yakunlanganidan soʻng, tuman Madaniyat boʻlimi tomonidan tayyorlangan kontsert dasturi namoyish etildi. Dastur davomida ijro etilgan Vatan, tinchlik va inson qadri haqidagi sheʼr hamda qoʻshiqlar, yosh havaskorlar ijrosidagi dilrabo raqslar tadbirga yanada fayz kiritdi va barchaga koʻtarinki kayfiyat baxsh etdi.

Tuman hokimligining Axborot xizmati.