Amudaryo tumani hokimi Sultonboy Yoʻldashevning Yangi yil bayrami munosabati bilan tuman ahliga tabrigi

Assalomu alaykum, qadrli yurtdoshlar!

Betakror diyorimizda Yangi yil shukuhi kezib yurgan shu kunlarda Siz azizlarni, Sizlar orqali barcha amudaryoliklarni, yurtdoshlarimizni bayram bilan qutlashdan mamnunman!

Xalqimiz har yil yakunida joriy yilda qoʻlga kiritilgan yutuqlar va erishilgan natijalarni sarhisob qilib, kelgusi yilga yangi rejalar tuzishga odatlangan. Yakuniga yetayotgan yilni tahlil qilar ekanmiz, 2022-yil mamlakatimiz tarixida oʻziga xos iz qoldiradigan davr boʻldi, desak yanglishmagan boʻlamiz. Islohotlarning yangi bosqichi sifatida joriy yil boshida Prezidentimiz Farmoni bilan 2022-2026-yillarga moʻljallangan Yangi Oʻzbekistonning taraqqiyot strategiyasi tasdiqlandi.

Amudaryo tumanida ham inson qadrini yuksaltirish va iqtisodiyotimizni jadal rivojlantirish borasida yil davomida tizimli ishlar amalga oshirildi. Jumladan, mahalla instituti faoliyatining samaradorligini oshirish maqsadida 49 ta ovul va mahallalarimizda hokim yordamchilari, xotin-qizlar faollari va yoshlar yetakchilari ish boshladi.

Hududlarda aholini tadbirkorlikka keng jalb qilish maqsadida oilaviy tadbirkorlikni rivojlantirish dasturi doirasida 3 ming 477 nafar fuqaroga jami 72,2 mlrd. soʻm imtiyozli kreditlar ajratildi. Aholining yashash sharoitlarini yaxshilash maqsadida Prezidentimizning birgina 2022-yil 25-oktyabrdagi qaroriga muvofiq tumanimiz hududida umumiy qiymati 22 milliard 209 million soʻmlik qurilish-taʼmirlash ishlari amalga oshirilmoqda.

2022-yilda tuman boʻyicha barcha manbalar hisobidan 77 ta obʼektlarda umumiy qiymati 112,7 mlrd. soʻmlik qurilish-taʼmirlash va rekonstruktsiya ishlari amalga oshirildi. Hududlarimizga 4,7 km uzunlikda piyodalar va salomatlik yoʻlakchalari qurildi, 4 ta mahallaning markaziy koʻchalariga koʻcha yoritkichlari oʻrnatildi. 71 km uzunlikdagi mahalliy ahamiyatdagi va ichki yoʻllar taʼmirlanib, Gulzor mahallasi hududida 5 ta 5 qavatli uy-joylar qurib bitkazildi va foydalanishga topshirildi.

2022-yil davomida tumandagi 3 ta maktab hamda 5 ta davlat, 3 ta oilaviy nodavlat maktabgacha taʼlim tashkilotlari binolari rekonstruktsiya qilinib, 3 ta maktab binolari joriy taʼmirlandi. Yaratilgan sharoitlar va sohaga berilayotgan eʼtibor tufayli umumtaʼlim maktablarida 4 ming 64 nafar oʻqituvchi 38 ming 476 nafar oʻquvchiga sifatli taʼlim-tarbiya berib kelmoqda. Tuman boʻyicha bogʻcha yoshidagi bolalarni qamrab olish koʻrsatkichi 71 foizga yetdi.

Aholiga koʻrsatilayotgan tibbiy xizmat sifatini oshirish maqsadida Toʻlqin, Qizilcholi ovullaridagi oilaviy shifokorlik punktlari hamda 71-sonli oilaviy poliklinika binolari taʼmirlandi. 15 mlrd. soʻm mablagʻ evaziga 90-oʻrinli yangi  tugʻruq boʻlimi binosini qurish ishlari davom etmoqda.

Dehqon va fermerlarimizning fidokorona mehnatlari evaziga joriy yilda 12 ming 832 tonna don, 44 ming 844 tonna paxta hosili olindi. Dehqon va tomorqa xoʻjaliklarida yetishtirilgan minglab tonna gʻalla, sabzavot va poliz ekinlari, mevalar hamda boshqa qishloq xoʻjaligi mahsulotlari bozorlarimiz toʻkinligi, narx-navoning barqarorligini taʼminlashda muhim ahamiyat kasb etmoqda.

Qadrli yurtdoshlar!

Muhtaram Prezidentimiz yaqindagina Oliy Majlis va Oʻzbekiston xalqiga Murojaatnomasida kelgusi yilga “Insonga eʼtibor va sifatli taʼlim yili” deb nom berib, 2023-yildagi ustuvor yoʻnalishlarni belgilab berdilar.

Kelgusi yilda ham tumanimizda aholining yashash sharoitlarini yaxshilash, yangi ish oʻrinlarini yaratish, taʼlim sifati va samaradorligini yangi bosqichga olib chiqish va hududlarni har tomonlama rivojlantirish boʻyicha qator ishlarni amalga oshirish rejalashtirilmoqda.

Aziz yurtdoshlar!

Fursatdan foydalanib, barchangizni kirib kelayotgan Yangi yil bayrami bilan chin qalbimdan tabriklayman! 2023-yil xalqimiz farovonligi hamda jonajon Vatanimiz rivoji yoʻlida tub burilishlar roʻy beradigan yil boʻlishiga tilakdoshman.

Yangi yilda koʻngillarimizni xotirjamlik, xonadonlarimizni tinchlik-osoyishtalik, dasturxonlari-mizni toʻkinlik, ozod va obod yurtimizni fayz va baraka tark etmasin!

Yangi yilingiz muborak boʻlsin, aziz yurtdoshlar!