“Buyuk siymolar” nomli adabiy kecha boʻlib oʻtdi

Mana oradan besh asrdan ortiq vaqt oʻtibdiki, ulugʻ mutafakkir bobolarimiz, soʻz mulkining sultoni Alisher Navoiy hamda shoh va shoir Zahiriddin Muhammad Boburning boy maʼnaviy merosi butun dunyoni hayratga solib, insonlar qalbiga, ongu shuuriga ezgulik, insonparvarlik, saxovat va mehr-muruvvat nurini taratib kelmoqda.

Shu kunlarda yurtimizda Alisher Navoiy tavalludining 582 hamda Zahiriddin Muhammad Bobur tavalludining 540 yilligi keng nishonlanmoqda. Amudaryo tumani Axborot-kutubxona markazida boʻlib oʻtgan “Buyuk siymolar” nomli adabiy kecha ham Alisher Navoiy va Zahiriddin Muhammad Bobur hayoti va ijodiga bagʻishlandi.

Tadbirda soʻzga chiqqanlar har ikki ijodkor dunyo adabiyoti tarixida juda katta oʻrin tutishini, xalqparvar davlat arbobi sifatida jamiyatda tutgan yuksak mavqei jihatidan ham, ilm-fan, madaniyat va sanʼat, adabiyot ahliga koʻrsatgan homiyligi jihatidan ham oʻxshashi yoʻq siymo ekanligini, ular bugun oʻzbek xalqining milliy iftixoriga, adabiy, maʼnaviy kamolot timsoliga aylanganligini taʼkidladi.

Tadbirda Axborot-kutubxona markazining kitobxonlari, 3-sonli umumtaʼlim maktabining faol oʻquvchilari oʻzlarninig tayyorlab kelgan sahna koʻrinishlari, raqsalari bilan ishtirok etishdi.

Tadbir doʻstona va koʻtarinki ruhda boʻlib oʻtdi.

Axborot kutubxona markazi tomonidan tashkil qilingan koʻrgazma oʻquvchilarda oʻzgacha qiziqish va taassurot qoldirdi.

Sababi, Bobur hayotini toʻlaqonli aks ettiruvchi “Boburnoma”, XV-XVI asrlarda zamonasining mashhur shoirlari tomonidan yozilgan qoʻlyozmalarning nusxalari oʻquvchilarni XV asr tomon yetakladi.

Tadbir davomida oʻquvchilar 12 yoshidan boshlab davlatni boshqargan buyuk sarkardaning Alisher Navoiydan keyingi betakror siymo ekanligini yanada teran his qildilar. Oʻtkazilgan ushbu tadbir orqali Boburning hayot yoʻli, boshidan kechirgan qiyinchiliklari va undan chiqargan xulosalari oʻquvchilarga har tomonlama oʻrnak va namuna boʻldi desak, adashmagan boʻlamiz. Oʻquvchilar tadbirda Zahriddin Muhammad Bobur va Alisher Navoiy ijodidan namunalar oʻqishdi. Gʻazal va ruboiylarning maʼnolari sharxladilar.

Shundan soʻng, mumtoz kuy va qoʻshiqlar ijro etishib, raqslarga tushishdi.

Navoiy va Boburning hayoti va ijodini oʻrganar ekanmiz, ular umri davomida xalqqa xizmat qilib, bunyodkorlik, yaratuvchanlik ishlarida shaxsiy ibrat koʻrsatganini yanada yorqinroq bilib olamiz. Ular barcha asarlarida ana shu ezgu gʻoyalarni targʻib etdi.

Xalqimiz maʼnaviy dunyosining yuksalishiga ulkan hissa qoʻshgan ikki buyuk shaxs – Alisher Navoiy va Zahiriddin Muhammad Bobur tavalludi munosabati bilan tashkil etilgan tadbirda kitobxon yoshlar va umumtaʼlim maktabi oʻquvchilari oʻzaro fikr almashib ikki buyuk siymoning boy meʼrosidan bahramand boʻldilar.

Tadbir yakunida badiiy kechada ishtirok etgan barcha oʻquvchilar faxriy yorliq va esdalik sovgʻalari bilan taqdirlanishdi.

Tuman hokimligining Axborot xizmati.