QILIChBOY OVULIDA SUMALAK SAYLI OʻTKAZILDI

Oʻlkamizga fasllar kelinchagi boʻlgan bahor tashrif buyurishi bilan yoshi ulugʻ onaxonlar, kayvoni ayollar sumalak sayllarini boshlab yuborishadi. Sumalak sayli – Navroʻz bayramining uzviy bir qismi, milliy va umuminsoniy qadriyatlarga esh boʻlgan tadbirdir. Sumalak Navroʻzning shoh taomi hisoblanib, xushxoʻr va tansiq taom hisoblanadi.

Amudaryo tumanidagi ovul va mahallalarda ham qadimdan birdamlik, ahillik hissini tarbiyalab kelgan sumalak sayllari boshlab yuborildi. Xuddi shunday tadbir Qilichboy ovulida ham boʻlib oʻtdi.

Ovuldagi 83-sonli maktabda boʻlib oʻtgan ushbu sumalak saylida maktab jamoasi bilan birga ovul ayol-qizlari ham faol ishtirok etdilar. Erta tongdan maktab hovlisiga katta doshqozonlar keltirildi. Oʻtinlar gʻamlanib, suvlar keltirildi, qizlar va kelinchaklar tekis unib chiqqan bugʻdoy maysalarini keli-kelisoplarda tuyib, onaxonlarga yetkazib berib turishdi.

Ularga bugʻdoyni maromiga yetkazib undirgan maktabdagi yoshi katta ayollardan biri boʻlgan Sayyora opa Yoʻldosheva boshchilik qildi. Qozon qaynagunicha Qilichboy ovul fuqarolar yigʻini xotin-qizlar faoli Sohiba Sobirova hamda maktab direktori Dilafroʻz Ismoilovadan boshlab, maʼnaviyat va maʼrifat masalalari boʻyicha direktor oʻrinbosari Anorgul Xolimbetova, oʻquv ishlari boʻyicha direktor oʻrinbosari Muhayyo Oʻrozmetova, oʻqituvchilar Muqaddas Ollaberganova, Gulandom Shomurodova hamda maktabning boshqa oʻqituvchilari, oʻquvchilar barcha-barchasi faol qatnashishdi. Qozonga bugʻdoy shirasi quyilib, bir maromda qaynay boshlagach, bahoriy kayfiyat boshlangan sumalak sayli oʻyin-kulgularga ulanib ketdi.

Biz bilamizki, asrlar osha yashab kelayotgan sumalak sayli kabi milliy qadriyat va anʼanalarimiz xalqimizning qadim tarixi va ruhiyati bilan chambarchas bogʻliq. Ushbu goʻzal udumlarda tabiatdagi oʻzgarishlar, fasllar almashinuvi, eʼtiqodiy qarashlar va ajdodlarimiz koʻnglidan kechuvchi his-tuygʻular oʻzining ifodasini topgan. Hozirgidek qadimda ham sumalakni asosan ayollar tayyorlashgan. Sumalak tayyorlashni oʻziga xos marosim qilib oʻtkazishgan. Qozon atrofida suhbatlar qurilib, hikoyalar, ertaklar, rivoyatlar va latifalar aytilgan.

Shu kuni qilichboyliklar ham taom tayyor boʻlguncha qoʻshiqlar kuylab, raqslarga tushishdi, laparlar aytib xursandchilik qilishdi. Yoshi ulugʻlardan turli rivoyatlar tinglab, ertalabgacha boʻlgan vaqtlarini mazmunli oʻtkazishdi. Qoʻni-qoʻshnilar bilan birgalikda taom pishirib, bir qozonda tayyorlangan ovqatni hammalari baham koʻrishdi.

Sayilga kelganlar uchun maktabda betakror isteʼdod sohibasi, joʻshqin va sermazmun ijotkor, hamisha porloq yulduz Zulfiya Isroilova tavalludining 108 yilligiga bagʻishlangan tadbir ham tashkil etildi. Atoqli shoira tavalludiga bagʻishlangan "Hamisha porloq yulduz" nomli ushbu davra suhbati va adabiy-badiiy kecha davomida maktabning oʻqituvchi va oʻquvchilari shoira hayoti va ijodi haqida soʻzlab berdilar. Oʻquvchilar shoiraning sheʼrlaridan namunalarni chiroyli, ifodali aytib, barchaga yanada koʻtarinki kayfiyat baxsh etishdi. Mazmunli oʻtgan tadbir hammaga juda manzur boʻldi.

Maktab hovlisida tashkil etilgan sumalak sayli esda qolarli, taassurotlarga boy tarzda oʻtdi. Sumalak koʻpchilikning mehnati bilan maromiga yetib, juda shirin boʻlib pishdi.

Ozoda Xudoyberganova.