INTILUVChAN TADBIRKOR

Mamlakatimizda bugungi kunda ayollar tadbirkorligini rivojlantirishga qaratilayotgan eʼtibor va imtiyozlar Amudaryo tumanidagi «Tamara Textile» masʼuliyati cheklangan jamiyati rahbari Tamara Yusupova kabi aniq maqsadi tomon dadil intilayotgan faol ayollarga yanada kuch-gʻayrat bagʻishlaydi.

Asl tadbirkor kishilar doimo oʻz ishbilarmonligi bilan farovonlikka erishgan. Faqat oʻzlarinigina emas, balki el-yurt taraqqiyotiga va farovonligiga hissa qoʻshayotgan insonlar safi kengayib borayotgani yanada quvonarli.

Shiddat bilan rivojlanib borayotgan zamon odamlardan davr bilan hamnafas boʻlishni, tengma-teng qadam tashlash uchun doim izlanishni, oʻqib-oʻrganishni talab qilmoqda. Biz hikoya qilmoqchi boʻlgan tadbirkor ayol – Amudaryo tumanining Qilichboy ovulida tugʻilib-oʻsgan, ayni kunda tikuvchilik sohasida katta biznesiga ega Tamara Yusupovadir. U 2009-yilda tikuvchilik boʻyicha tadbirkorlik faoliyatini boshlagan. Shijoatli, ilgʻor, qadamidan oʻt chaqnaydigan ayollarni koʻrsam, Toʻmaris avlodi ekanligimizdan gʻururlanaman. Tamara Yusupova bilan tanishganim sayin yuqoridagi fikr xayolimga keladi.

Davlatmiz rahbarining ayollar tadbirkorligi va ishbilarmonligini qoʻllab-quvvatlash maqsadida joriy etayotgan imkoniyatlaridan ilhomlanib, tumanimizda tikuvchilik tsexi ochgan Tamara Yusupovaning amalga oshirayotgan ishlari bilan tanishish jarayonida ayolning ishbilarmon boʻlishi jamiyatning rivoji uchun qanchalik muhim rol oʻynashiga yana bir karra amin boʻldik.

Mamlakatimizda olib borilayotgan oʻzgarishlardan ilhomlanib yurt ravnaqi uchun oʻz hissasini qoʻshish istagida tadbirkor dastlab 3 mln. soʻm, keyinchalik 40 mln. Soʻmlik bank kreditlari evaziga faoliyatini boshladi.

Tadbirkor ayol kredit evaziga olingan mablagʻga turli tikuv mashinalari, dazmol stollari, tikuv tsexi uchun zarur boʻladigan asbob-uskunalar sotib olib, ish faoliyatini muntazam ravishda kengaytirib bordi.

Ishga astoydil bel bogʻlagan qahramonimiz ishsiz yoshlarning bandligini taʼminlab, koʻplab shogirdlar tayyorladi. Bugungi kunda esa buyurtmalar asosida ayollar, erkaklar va bolalar kiyimlarini sifatli va hamyonbop narxlarda tayyorlab, xaridorlarga yetkazib bermoqda.

Mazkur korxona tomonidan 2019-2021-yillarda jami 671,8 million soʻmlik, jumladan, 2019-yilda 134,8 million, 2020-yilda 217 million, 2021-yilda 320 million soʻmlik kiyim-kechak mahsuloti ishlab chiqarildi. Uning ishni toʻgʻri tashkil etishi natijasida korxona tomonidan keyingi uch yilda 874,8 million soʻm daromad olinib, 203 million soʻm sof foyda olishga erishildi. 2019-2021-yillar mobaynida korxonada ishlab chiqarish tsexlarini ishga tushirish, kengaytirish evaziga 25 ta yangi ish oʻrni yaratildi.

U respublika miqyosida oʻtkaziladigan turli tadbir va koʻrik-tanlovlarda faol qatnashib keladi. Jumladan, 2009-yilda Toshkent shaxrida oʻtkazilgan «Qoʻli guldir oʻzbek ayolin» nomli koʻrgazmasida, 2012-yilda «Taqdirimsan, baxtimsan, erkin va obod Vatan!» tadbirida mamlakatimiz ravnaqiga qoʻshgan hissasi uchun Oʻzbekiston xotin-qizlar qoʻmitasi tomonidan «Tashakkurnoma» bilan taqdirlandi.

2021-yilning noyabr oyida esa «Eng yaxshi ish beruvchi tadbirkor ayol» koʻrik tanlovining Qoraqalpogʻiston Respublikasi bosqichida birinchi oʻrinni qoʻlga kiritdi.

Tamara Yusupova oʻzining yangiliklarga intilishi va ish tajribasi bilan har yili oʻtkazilishi anʼanaga aylangan “Tashabbus” koʻrik-tanlovida faol ishtirok etib, bir necha marta gʻoliblar safidan joy oldi.

Oʻzbekiston Respublikasi Prezidentining 2023-yilning 17-avgustdagi farmoyishiga binoan, milliy iqtisodiyotimizni barqaror yuksaltirish, yurtimizda ishbilarmonlik muhitini yanada yaxshilash, tadbirkorlik rivojini yangi bosqichga koʻtarish, mamlakatimizning ishlab chiqarish va eksport salohiyatini oshirish borasidagi katta xizmatlari, sohaga innovatsion texnologiyalarni joriy etish, ish oʻrinlari yaratish, aholi farovonligini taʼminlashga qoʻshgan munosib hissasi, shuningdek, biznesda erishayotgan amaliy natijalari hamda ijtimoiy hayotdagi faol ishiroki uchun Tamara Yusupova “Faol tadbirkor” koʻkrak nishoni bilan taqdirlandi.

Tadbirkor Xalq deputatlari Amudaryo tumani Kengashi deputati sifatida ham faol ish olib bormoqda.

Tamara Yusupovaning faoliyatini birgina maqolaga sigʻdirish juda qiyin. Uningdek tashabbuskor, tadbirkor ayollar safi kengayib, mamlakatimiz iqtisodiyoti va xalqimiz farovonligi bundanda yuksalaverishiga tilakdoshmiz!

Sevara Ismoilova