EHTIYoJMAND OILALAR FARZANDLARIGA MAKTAB FORMALARI TOPShIRILDI

Maʼlumki, 2021-yil 30-iyul kuni Oʻzbekistan Respublikasi Prezidentining “Kam taʼminlangan va ijtimoiy himoyaga muhtoj oilalar farzandlarini qoʻllab-quvvatlashning qoʻshimcha chora-tadbirlari toʻgʻrisida”gi qarori qabul qilingan edi. Mazkur qaror bilan ijtimoiy himoyaga va har tomonlama koʻmakka muhtoj oilalar farzandlarining bilim olishlari uchun sharoitlar yaratish, ularni moddiy qoʻllab-quvvatlash tizimi joriy etildi.

Qarorda aholini ijtimoiy himoya qilishga qaratilgan tizimli ishlarni izchil davom ettirish hamda moddiy yordam va koʻmakka muhtoj oilalarning farzandlarini maktab formasi va oʻquv qurollari bilan taʼminlash xarajatlarini byudjet mablagʻlari hisobidan qoplash koʻzda tutilgan.

Barchamizga maʼlumki, umumiy oʻrta taʼlim muassasalarida maktab formasining joriy qilinishidan oʻquvchilarning kiyinish madaniyati va tartib-intizomga amal qilish koʻnikmalarini mustahkamlash, salomatliklarini muhofaza qilish uchun tegishli shart-sharoitlar yaratish, ularni maʼnaviy va jismonan sogʻlom boʻlib voyaga yetishlari uchun zarur shart-sharoitlar yaratish maqsad qilingan.

Albatta, yangi oʻquv yili oldidan ota-onalardan maktab yoshidagi farzandlari uchun yangi ust-bosh xarid qilishadi. Bunga barcha oilalarda ham imkon boʻlmasligi mumkin. Shularni inobatga olgan holda Prezidentimizning yuqoridagi qarori asosida ijtimoiy himoyaga va har tomonlama koʻmakka muhtoj oilalar farzandlari oʻquv qurollari va maktab formalari bilan taʼminlanmoqda.

25-avgust kuni Amudaryo tumani Maktab va maktabgacha taʼlim boʻlimiga qarashli 55-sonli maktab binosida ham tumandagi ehtiyojmand oilalarning 200 nafar farzandlariga maktab formasi hamda oʻquv qurollari topshirildi.

Tadbirda tuman hokimi vazifasini bajaruvchi Rashid Salayev, Maktabgacha va maktab taʼlimi boʻlimining maktablar faoliyatini muvofiqlashtirish shoʻʼbasi mudiri Ibragim Rajabov, masʼul xodimlar, shuningdek, oʻquvchi yoshlar hamda ularning ota-onalari ishtirok etdi.

Tadbirda tuman hokimi vazifasini bajaruvchi Rashid Salayev soʻzga chiqib, mazkur xayrli ish tumanimizdagi ehtiyojmand oilalarni yanada qoʻllab-quvvatlash, kam taʼminlangan oilalar farzandlarining sifatli va tizimli umumiy oʻrta taʼlim olishiga amaliy yordam berish, moddiy jihatdan qiynalgan oilalar farzandlarini maktab formasi va oʻquv qurollari bilan taʼminlanishiga yordam berish maqsadida amalga oshirilayotganini taʼkidlab, tumanimizda ushbu masala yuzasidan olib borilayotgan ishlar haqida aytib oʻtdi.

Shu oʻrinda aytish kerakki, bugungi kunda Amudaryo tumani Maktab va maktabgacha taʼlim boʻlimiga qarashli 85 ta umumtaʼlim maktablari faoliyat yuritayotgan boʻlib, ularda 38 ming 476 nafar oʻquvchilar taʼlim-tarbiya olib kelmoqdalar. Oʻquvchilarning yangi oʻquv yilida sifatli taʼlim-tarbiya olishlari uchun umumtaʼlim maktablarida keng koʻlamli tayyorgarlik ishlari olib borildi. Taʼlim maskanlari binolaridagi mavjud kamchiliklar aniqlanib, ularni bartaraf etish boʻyicha ishlar amalga oshirildi.

Tadbirda soʻzga chiqqan masʼullar soʻnggi yillarda yurtimizda ijtimoiy himoyaga muhtoj oilalarni har tomonlama qoʻllab-quvvatlashga qaratilayotgan eʼtibor hamda yoshlarning sifatli taʼlim-tarbiya olishlari uchun yaratilayotgan keng imkoniyatlar, shart-sharoitlar xususida toʻxtalib, oʻquvchi yoshlarni ushbu imkoniyatlardan samarali foydalanib, ustozlari berayotgan bilimlarni chuqur egallashga, yurtimizga munosib farzand boʻlishga chorladilar.

Tuman hokimligining Axborot xizmati