AMUDARYo TELEVIDENIYeSI VA AXBOROT-KUTUBXONA MARKAZI XODIMLARI HAMKORLIGIDA INFOLIB – OʻZBEKISTON-23 HAFTALIGI DOIRASIDA KUTUBXONAGA SAYoHAT UYuShTIRILDI

Mamlakatimizda 23-27-oktyabr kunlari Infolib Oʻzbekiston – 2023  XII milliy Axborot-kutubxona haftaligi haqiqiy kitobsevarlik, ijodkorlik bayrami sifatida keng nishonlanmoqda. Haftalik doirasida ilmiy-amaliy anjumanlar, zamonaviy Axborot-kutubxona xizmatlarini yoʻlga qoʻyish borasidagi innovatsion loyihalar taqdimotlari, kutubxonachilarda yosh kutubxonalar uchun kompyuter texnologiyalaridan samarali foydalanish boʻyicha seminar oʻquv-mashgʻulotlari, taniqli yozuvchilar, shoirlarning yangi asarlari taqdimotiga bagʻishlangan adabiy uchrashuvlar, ijodkorlar bilan dildan suhbat tadbirlari, yosh kitobxonlarning Axborot-kutubxona markazlariga sayohatlari tashkil etilib, bu tadbirlarga koʻplab kitobxon yoshlar qamrab olinmoqda.

Joriy yilning 25-oktyabr sanasida Amudaryo tuman Axborot-kutubxona markazida Infolib Oʻzbekiston – 2023 XII milliy Axborot-kutubxona haftaligi doirasida yosh kutubxonachilar III forumi oʻtkazildi. Amudaryo televideniyesining “Yuksak maʼnaviyatli va axloqli yoshlar – kelajak poydevori” grant-loyihasi ijodkorlaridan biri, Qoraqalpogʻiston Respublikasida xizmat koʻrsatgan jurnalist, Oʻzbekiston Yozuvchilar uyushmasi aʼzosi, shoira Robiya Yoʻldosheva bilan hamkorlikda mazkur haftalik doirasida tashkil etilgan tadbirda Axborot-kutubxona Markazi xodimlari, kitobxon yoshlar, “Jayxun ilhomlari” NNT aʼzosi shoira Zuhra Ahmedova hamda 55-sonli maktab oʻquvchilari ishtirok etdilar.

Tadbirni Axborot-kutubxona markazi xodimi Rohatoy Romanova ochdi va Oʻzbekiston Infolib Oʻzbekiston – 2023 milliy Axborot-kutubxona haftaligi Yosh kutubxonachilar III forumi Amudaryo televideniyesining “Yuksak maʼnaviyatli va axloqli yoshlar – kelajak poydevori” grant-loyihasi ijodkorlari bilan hamkorlikda oʻtkazilayotgani juda katta ramziy maʼnoga ega ekanligini alohida eʼtirof etdi.

Shundan soʻng, “Yuksak maʼnaviyatli va axloqli yoshlar - kelajak poydevori” grant loyihasi koordinatori Robiya Yoʻldosheva hamkorlikda tashkil etilgan mazkur maʼnaviy-maʼrifiy tadbirning yoshlar hayotida tutgan oʻrni va ahamiyati xususida fikr yuritib, taʼlim-tarbiya sohasining bosh manbai – ilm ekanligini, ilm esa kitoblar orqali egallanishini taʼkidladi. Tadbir ishtirokchilariga kitob oʻqishning beqiyos katta ahamiyatini oʻzbek xalqining buyuk qomusiy olimlari hayoti va faoliyatlari misolida taʼsirchan hikoyalar orqali soʻzlab berdi.

Tadbir davomida “Jayxun ilhomlari” NNT aʼzosi, biri-biridan qiziqarli, hayotiy hikoyalar, goʻzal sheʼrlar muallifi Zuhra Ahmedova kitobxon yoshlar va yosh kutubxonachilarga oʻzining ijod maydoniga kirib kelishida kitobning oʻrni katta ahamiyat kasb etganini faxrlanib eʼtirof etdi va yangi sheʼrlaridan oʻqib berdi. Tadbir davomida oʻquvchi-yoshlar kutubxonachi opalari hamrohligida Axborot-kutubxona kitob javonlari boʻylab sayohat qildilar. Sayohat jarayonida “Yuksak maʼnaviyatli va axloqli yoshlar – kelajak poydevori” grant loyihasi koordinatori Robiya Yoʻldosheva, “Jayxun ilhomlari” NNT aʼzosi, shoira Zuhra Ahmedova hamda Axborot-kutubxona markazi xodimlari kitobxon oʻquvchilarga badiiy asarlarni tanlashda yaqindan yordam berdilar. Kitobxon yoshlar kitoblar olamiga sayohat hamda shoira Robiya Yoʻldosheva bilan uchrashuvdan olam-olam zavq oldilar va “Jayxun ilhomlari” NNT aʼzosi Zuhra Ahmedova bilan dildan suhbatlashdilar.

Infolib Oʻzbekiston – 2023 XII milliy Axborot-kutubxona haftaligi Yosh kutubxonachilar III forumi tashkilotchilari – Amudaryo tuman Axborot-kutubxona markazi xodimlari va Amudaryo televideniyesining “Yuksak maʼnaviyatli va axloqli yoshlar – kelajak poydevori” grant loyihasi ijodkorlari hamkorligidagi kutubxonaga sayohat va shoira Robiya Yoʻldosheva bilan ijodiy uchrashuv tadbiri yoshlar maʼnaviyatini yuksaltirish, ularni kitobxonlikka daʼvat etish, ijodga moyil yoshlar iqtidorini rivojlantirish, shuningdek, yosh kutubxonachilar salohiyatini oshirish orqali yosh avlod vakillarining kitob mutolaasiga boʻlgan qiziqish va intilishlarini ragʻbatlantirishga qaratilgani bilan muhim ahamiyat kasb etdi.

Muyassar XALILLAYeVA.