“YaNGI OʻZBEKISTON ARMIYaSI – MAMLAKAT QUDRATI, YuKSAK GʻURUR VA SADOQAT TIMSOLIDIR” ShIORI OSTIDA OʻTKAZILGAN TADBIR YoShLARGA KOʻTARINKI RUH BAGʻIShLADI

Yurtimizda yoshlarda vatanparvarlik tuygʻularini shakllantirish, ularni ona Vatanga sadoqat ruhida tarbiyalash, aholiga mudofaa tizimida amalga oshirilayotgan islohotlarni yetkazish, Qurolli Kuchlarning salohiyatini namoyish etish maqsadida vatanparvarlik oyligi doirasidagi tadbirlar oʻtkazilmoqda. Prezidentimizning 2023-yil 14-dekabr kungi Farmoyishiga asosan Amudaryo tumani Mudofaa ishlari boʻlimi tomonidan ham vatanparvarlik oyligi doirasida Qurolli Kuchlari tashkil etilganining 32 yilligi hamda Vatan himoyachilari kuni bayrami munosabati bilan “Yangi Oʻzbekiston Armiyasi – mamlakat qudrati, yuksak gʻurur va sadoqat timsolidir” shiori ostida tadbirlar tashkil etilmoqda.

2023-yil 22-dekabr kuni 16-sonli umumtaʼlim maktabida shu munosabat bilan boʻlib oʻtgan navbatdagi tadbirda tumanimizdagi Davlat xavfsizlik xizmati chegara qoʻshinlariga qarashli harbiy qism komandirining tarbiyaviy va mafkuraviy ishlar boʻyicha oʻrinbosari, kichik serjant Sherzod Atayev, Mudofaa ishlari boʻlimi boshligʻining tarbiyaviy va mafkuraviy ishlar boʻyicha oʻrinbosari Zokir Saʼdullayev, Mudofaa vazirligi faxriysi Davron Boltaboyevlar ishtirok etishdi. Shuningdek, maktab oʻqituvchilari, 9-11-sinflardagi “Vatan tayanchi” otryadi aʼzolari qatnashdilar.

Tadbirda tumanimizdagi Davlat xavfsizlik xizmati chegara qoʻshinlariga qarashli harbiy qism komandirining tarbiyaviy va mafkuraviy ishlar boʻyicha oʻrinbosari, kichik serjant Sherzod Atayev soʻzga chiqib, Prezidentimizning 2023-yil 14-dekabr kungi Farmoyishiga asosan vatanparvarlik oyligi oʻtkazilayotgani, oylik doirasida oʻtkazilayotgan tadbirlar yoshlar qalbida Vatanga muhabbat, yurtga sadoqat tuygʻularini mustahkamlayotganini aytib oʻtdi. Harbiy xizmatchi Qurolli Kuchlar tizimida amalga oshirilayotgan islohotlar, yurt va xalq xavfsizligini qoʻriqlash yoʻlida mardlarcha xizmat qilayotgan qahramonlar, Vatan tinchligi va osoyishtaligi yoʻlida jon fido qilganlar haqida ham soʻzlab berdi.

Sherzod Atayev Vatan himoyachilari kunini munosib kutib olish va uni umumxalq bayrami sifatida keng nishonlash jarayonida oʻtkazilayotgan vatanparvarlik oyligi xalq va armiya yakdilligini yanada mustahkamlab, yoshlarni vatanparvarlik ruhida tarbiyalash va jahonda Milliy armiyamiz nufuzini yanada oshirishga xizmat qilayotgani bilan yanada ahamiyatli boʻlayotganini alohida eʼtirof etdi.

Tadbir davomida harbiylikka qiziquvchi maktab oʻquvchilari uchun fizika-matematika, geografiya va tarix fanlarini oʻrganish zarurligi, bu fanlardan olgan bilimlaridan harbiylikda muhim ahamiyat kasb etishi tushuntirildi. Oʻquvchi-yoshlar harbiylik yoʻnalishidagi oliy oʻquv yurtlariga qiziqish bildirganligi sababli, ularni oliy taʼlim dargohlariga qabul qilish shartlari, abituriyentlar tomonidan topshiriladigan sinovlar va umuman, harbiy xizmatchilarga beriladigan imtiyozlar haqida koʻplab savollar berib, kerakli maʼlumotlarga ega boʻlishdi. Oʻquvchilar ham oʻz navbatida, mehmonlarga maktab va sportdagi muvaffaqiyatlari, oʻqigan sevimli kitoblari va sevimli mashgʻulotlari haqida soʻzlab berishdi.

Oʻquvchi-yoshlar tumanimizdagi Davlat xavfsizlik xizmati chegara qoʻshinlariga qarashli harbiy qism askarlari tomonidan namoyish etilgan koʻrgazmada harbiy texnikalar va qurol-aslahalar bilan tanishishdi. Harbiy askarlar ularga ushbu texnikalar va qurol-aslahalar, ularning qanday maqsadlarda ishlatilishi toʻgʻrisida batafsil maʼlumotlar, tushunchalar berishdi. Tadbirda “Vatan tayanchi” otryadi aʼzolariga koʻkrak nishonlari ham topshirildi.

Koʻtarinki ruhda oʻtgan mazkur tadbir yoshlar qalbidagi vatanparvarlik hissini oshirib, yurtga sadoqat tuygʻusini yanada mustahkamladi.

O.Xudoyberganova.