XALQQA MADANIY XIZMAT KOʻRSATISh SIFATI YaXShILANMOQDA

Insoniyat hayotida alohida oʻrin tutadigan  madaniyat va sanʼatning millat taraqqiyoti, rivoji yoʻlidagi hissasi beqiyos. Azal-azaldan sanʼat va madaniyat butun xalq, qolaversa, yosh avlod qalbida milliy va umumbashariy qadriyatlarga hurmat, yurtga muhabbat va sadoqat tuygʻularini mustahkamlashda oʻziga xos taʼsir kuchiga ega boʻlib kelgan.

Aytish joizki, mamlakatimizda soʻnggi yillarda mazkur sohani rivojlantirish borasida hukumatimiz tomonidan  keng qamrovli  islohotlar olib borilmoqda. Sohaga qaratilayotgan ulkan eʼtibordan  ruhlangan tuman Madaniyat boʻlimi va hududlardagi Markazlarda faoliyat yuritayotgan xodimlar madaniy bayram tadbirlarining chuqur gʻoyaviy mazmun bilan boyitilishini  taʼminlab, xalqimizga sifatli xizmat koʻrsatib kelmoqda.

Bugungi kunda tuman Madaniyat boʻlimi tasarrufida 7ta  hududiy  madaniyat  markazlari faoliyat olib bormoqda. Ularda jami 91 nafar xodimlar  aholiga madaniy xizmat koʻrsatish sifatini  yaxshilash,  ularning  madaniy ehtiyojlarini qondirish va boʻsh vaqtlari mazmunli oʻtishini taʼminlash boʻyicha  salmoqli  ishlarni  amalga oshirmoqda.

Xususan, Oʻzbekiston Respublikasi Prezidentining 2022-yil 2-fevral kungi “Madaniyat va sanʼat sohasini yanada rivojlantirishga oid qoʻshimcha chora-tadbirlar toʻgʻrisida”gi Qarorida belgilangan vazifalar asosida tumanimizning olis hududlarida “Uchqun” ashula va raqs xalq ansambli jamoasi, “Ofarin” folklor-etnografik xalq jamoasi, “Jayhun moʻʼjizasi” anʼanaviy tsirk xalq jamoalari aholining mazmunli dam olishini tashkil etishga qaratilgan tadbirlarni  amalga oshirdilar.

Tuman Madaniyat boʻlimi tasarrufidagi 7ta madaniyat  markazlarida jami 240 nafar yoshlar 9ta yoʻnalish boʻyicha sanʼat sirlarini oʻrganmoqdalar. 

Shuningdek, yosh avlodni madaniyat va sanʼatga keng jalb etish, ularning boʻsh vaqtlarini mazmunli oʻtkazish maqsadida  qoʻshimcha 12ta toʻgaraklar faoliyati  yoʻlga qoʻyildi. Xususan, maqom, nazm va nasr, sahna tsirki, ovoz yozish studiyasi, raqs, badiiy oʻqish, baxshichilik, estrada va masxarabozlik, kompyuter savodxonligi kabi toʻgaraklarda yoshlarimiz  oʻzlari tanlagan yoʻnalishlarni puxta oʻrganib,  Respublika miqyosida oʻtkazilayotgan tanlovlarda munosib qatnashib kelishmoqda.

Tuman Madaniyat boʻlimining ommaviy-madaniy kalendar rejasi boʻyicha  aholiga  shu kungacha  538ta tadbirlar namoyish  etildi.

Joriy yilning 23-dekabr kuni Nukus shahridagi Qoraqalpogʻiston sanʼat saroyida Qoraqalpogʻiston Respublikasi Madaniyat vazirligi tomonidan tashkil etilgan «Algʻis-2023» yilning eng faollarini taqdirlash marosimida tuman Madaniyat markazi «Yil davomida samarali faoliyat yuritgan madaniyat markazi» nominatsiyasi sohibi boʻldi hamda esdalik sovgʻalarini qoʻlga kiritdi. 

Madaniyat boʻlimi mehnat jamoasi milliy madaniyatimiz  va sanʼatimizni yanada boyitib, yosh avlod ongiga singdirishga, bayram va boshqa muhim sanalarda xalqqa xizmat qilib, koʻtarinkilik bagʻishlashga, yuksak natijalar, yuqori koʻrsatkichlarga erishishga harakat qilmoqda.

Ikromjon Siytimov,

tuman Madaniyat boʻlimi mudiri.