TOʻLQIN OVULIDA MAHALLA, MAKTAB VA OILA HAMKORLIGIDA YoShLARGA “OMMAVIY MADANIYaT”NING ZARARLI TAʼSIRI TUShUNTIRILMOQDA

Yoshlarning taʼlim-tarbiyasida oila va taʼlim muassasasi bilan birgalikda mahallaning ham oʻrni, taʼsiri katta. Xalq orasidagi “Mahalla – ham ota, ham ona” degan gap bejizga aytilmagan. Oʻzaro mehr-oqibat, ahillik va totuvlik kabi xalqimizga xos urf-odat va anʼanalar aynan mahalla muhitida rivojlangan. Bular esa yosh avlodning ongu-tafakkurini shakllantirishda, ularni yot gʻoyalar, “ommaviy madaniyat” taʼsiridan asrashda muhim ahamiyatga ega.

15-yanvar kuni amunews.uz veb-sayti tahririyatining “Sogʻlom muhit – sogʻlom hayot” nomli grant loyihasi doirasida hududda fuqarolar yigʻini, taʼlim muassasalari va oilalar hamkorligida yoshlar tarbiyasi borasida amalga oshirilayotgan ishlar bilan tanishish maqsadida Amudaryo tumanining Toʻlqin ovuliga tashrif buyurdik.

Ovuldagi 33-sonli maktabda boʻlib oʻtgan davra suhbati davomida bu borada yoʻlga qoʻyilgan chora-tadbirlar, ularning samarasi, erishilgan natijalar va kelgusidagi rejalar toʻgʻrisida soʻz yuritildi. Tadbirda tumandagi ommaviy axborot vositalari xodimlari, “Sogʻlom muhit – sogʻlom hayot” nomli grant loyihasi ijrochilari, fuqarolar yigʻini masʼullari, maktab maʼmuriyati va ota-onalar, oʻquvchi-yoshlar ishtirok etishdi.

Tadbirda dastlab grant loyihasi ijrochilari tomonidan rejaga muvofiq amalga oshirilayotgan tadbirlar xususida maʼlumotlar berilib, keng toʻxtalib oʻtildi. Mahallalarda, oilalarda ijtimoiy-maʼnaviy muhit barqarorligiga salbiy taʼsir koʻrsatuvchi holatlar, yaʼni yoshlar oʻrtasida turli zararli illatlarga berilishning oldini olishga qaratilgan mavzulardagi maqolalar, yoshlarning boʻsh vaqtini mazmunli oʻtkazishga hissa qoʻshish maqsadida ularni kitobxonlikka jalb etish, oʻtkazilayotgan tanlovlar, faol qatnashayotgan yoshlar haqida soʻz yuritildi.

Shundan soʻng, maktab direktori Islom Saʼdullayev fuqarolar yigʻini, maktab va ota-onalar bilan hamkorlikda yoshlar tarbiyasini toʻgʻri yoʻlga qoʻyish borasida olib borilayotgan ishlar toʻgʻrisida maʼlumotlar berdi. Shuningdek, fuqarolar yigʻini xotin-qizlar faoli Gavhar Bobotoyeva, maktab psixologi Manzura Saparboyeva, ota-onalardan Ikrom Yesamurodovlar hamkorlikda samarali natijalarga erishilayotganini eʼtirof etishdi.

Tadbir davomida soʻnggi davrlarda “ommaviy madaniyat” niqobi ostida butun dunyoga keng tarqalayotgan maʼnaviy va axloqiy buzuqlik yoshlarimizning dunyoqarashiga ham jiddiy xavf solayotgani, axloqiy buzuqlik, zoʻravonlik, individualizm, egotsentrizm kabi yot va buzgʻunchi gʻoyalarni internet orqali yoshlar ongiga singdirishga urinish kuchayib borayotgani achinish bilan tilga olindi.

Yigit-qizlarimizni ularning taʼsiridan asrash uchun mahallalarda bugungi murakkab mafkuraviy jarayonlarni atroflicha tahlil qila oladigan mutaxassislarni jalb etgan holda yoshlar uchun oʻquv soatlari tashkil etish kerakligi, toki, bunday tadbirlar milliy manfaatlarimizga, hayot tarzimizga zid boʻlgan gʻoya va mafkuraviy xurujlarning mohiyatini ochib berish lozimligi toʻgʻrisida soʻz yuritildi. Bu esa fuqarolarimizning qalbida milliy tafakkur va sogʻlom dunyoqarash asoslarini mustahkamlashda alohida ahamiyat kasb etishi taʼkidlandi.

Davra suhbati tarzida oʻtkazilgan tadbir davomida voyaga yetmaganlar nazoratida oila, mahalla, maktab hamkorligini yoʻlga qoʻygan holda bolalarning ijtimoiy ahvolini oʻrganish, jinoyat sodir etishga moyillarini aniqlab, sogʻlom muhitga qaytarish uchun tegishli chora-tadbirlar belgilash, ushbu jarayonda xizmat intizomi va qonunchilikka ogʻishmay amal qilish lozimligi bugungi kun talabi ekanligi aytib oʻtildi.

Grant loyihasi doirasida oʻtkazilgan tadbir davomida kelgusi rejalar xususida ham toʻxtalib oʻtildi va yoshlarni jalb etgan holda ularning tarbiyasiga ijobiy taʼsir koʻrsatuvchi tadbirlarni muntazam ravishda oʻtkazib borishga kelishib olindi.

O.Xudoyberganova.