11-SONLI MAKTABDA “BIZ NAVOIY AVLODLARIMIZ” MAVZUSIDA TEATRLAShTIRILGAN TADBIR OʻTKAZILDI

Jannatmakon Oʻzbekistonimizda fevral oyi adabiy-badiiy tadbirlarga boy, chinakkam adabiyot bayrami sifatida har bir qalbga maʼnaviyat nurlarini olib kiradi goʻyo. Fevralning ilk kunlaridanoq Navoiyxonlik kechalari Boburxonlik va gʻazalxonlik tadbirlariga ulanib ketadi. Ayniqsa, 9-fevral – Alisher Navoiy  tavalludi arafasidagi bayramona tadbirlar butun xalqimizni qamrab oladi. Shoirning betakror lirikasi sehridan qalblar ziynatlanadi, maʼnan tozaradi.

Ana shunday maʼnaviy-maʼrifiy tadbirlardan biri Qipchoq ShFY hududidagi 11-sonli umumtaʼlim maktabida ham boʻlib oʻtdi.

“Biz buyuklar avlodimiz” shiori ostida oʻtkazilgan teatrlashtirilgan tadbirda maktab pedagogika jamoasi, oʻquvchi-yoshlar ishtirok etishdi. Tadbirni maktab direktorining maʼnaviy-maʼrifiy ishlar boʻyicha oʻrinbosari Qunduzoy Xolmurodova ochdi va barchani ulugʻ bobokalonimiz tavalludining 583 yilligi bilan samimiy muborakbod etdi. Shu bilan birga buyuk davlat va jamoat arbobi, oʻzbek tili va adabiyotining rivojiga juda katta hissa qoʻshgan, turkiy xalqlar adabiyotida yuksak maqomga ega mutafakkir shoir Alisher Navoiyning asrlar osha adabiyot ixlosmandlarini, dunyo xalqlarini oʻziga maftun etib kelayotgan oʻlmas asarlarining badiiy qimmati, yoshlar taʼlim-tarbiyasida tutgan oʻrni xususida batafsil soʻz yuritib, Navoiy dahosiga hurmat-ehtirom – bu milliy-maʼnaviy qadriyatlarimizga cheksiz hurmat va ehtirom ekanligini taʼkidladi.

Tadbir davomida maktabning 7-, 8-, 9-sinflar oʻquvchilari Alisher Navoiy hayoti va ijodiy faoliyati yuzasidan qimmatli maʼlumotlarni berdilar, Navoiy gʻazallarini yoddan, ifodali oʻqib bergan 7- va 9-sinf oʻquvchilaridan keyin sahnada “Xamsa” dostonining tavsifi jarangladi. 9-Bsinf qizlari “Xamsa”da jo boʻlgan har bir dostonga aslohida taʼrif va tavsif  berdilar va Guli monologini maromiga yetkazib ijro etdilar.

Shundan soʻng,7-B sinf oʻquvchi-qizlari shoir qitʼalarini ifodali oʻqishib, tadbir ishtirokchilarini Navoiy  asarlaridagi hikmatlar xazinasidan bahramand etdilar.

Tadbirning musiqiy  qismi qalblarga yanada zavqli, hayajonli lahzalarni baxsh etdi. Unda 7-8-sinflarning oʻquvchi-qizlari Navoiy gʻazali bilan aytiladigan “Ishq ayladi” ashulasiga raqsga tushdilar.

Shundan soʻng, sahnada Navoiy zamondoshlarining fikrlari jarangladi. Buyuk tarixchi olim Davlatshoh Samarqandiy, fors-tojik shoiri, Naqshbandiya tariqatining yirik vakili Abdurahmon Jomiy, tarixchi, davlat arbobi Muhammad Haydar Mirzo, shoh va shoir, buyuk sarkarda Zahiriddin Muhammad Bobur, tarixchi olim Rashidiy, Eron tarixchisi Hakimshoh Qazviniy, tarixchi Xondamir, shoir  va dramaturg, adabiyotshunos Maqsud Shayxzoda hamda Oʻzbekistonning Birinchi Prezidenti I.A.Karimovlar bildirgan qimmatli fikrlar xususida oʻquvchi-yoshlar toʻlqinlanib soʻzladilar.

Tadbirda oʻquvchilar tomonidan sahnalashtirilgan “Sabbaʼi sayyor” dostonidan parcha ham namoyish etilib, “Hayrat-ul abror” dostonidan hikmatli hikoyatlar oʻqilgani oʻquvchi-yoshlarning haqiqatan ham Navoiy dahosiga qalblarida yuksak ehtirom bilan uning buyuk asarlarini oʻrganayotganlarining amaliy ifodasi boʻldi. Goh gʻazal, goh hikmatlarga toʻla dostonlar jarang sochgan “Biz Navoiy avlodlarimiz” adabiy-musiqiy, teatrlashtirilgan bayramona tadbir dilbar kuy-qoʻshiqlar, dilrabo raqslar bilan davom etdi va qalblarga zavq-shavq bagʻishladi.

Robiya YOʻLDOShEVA.