MAʼNAVIYaT MASKANIGA AYLANGAN 1-SONLI MAKTAB KUTUBXONASIDA KITOBXON YoShLAR SAFI ORTMOQDA

Inson bilimni eng avvalo kitoblardan oʻrganadi. Kitoblarni bejizga bilimlar kaliti deyishmaydi. Kimki, kitoblarga oshno boʻlsa, tafakkuri va dunyoqarashi kengayadi, ilmi ortib, maʼnaviyati yuksaladi. Shu sababli yurtimizda aholini, ayniqsa, yoshlarni kitobxonlikka jalb etishga alohida eʼtibor qaratilib, keng imkoniyatlar yaratilmoqda.

Amudaryo tumanidagi amunews.uz veb-sayti tahririyatining “Sogʻlom muhit – sogʻlom hayot” grant loyihasi doirasida ham yoshlarning dunyoqarashini va maʼnaviyatini yuksaltirish, ularni yot gʻoya va illatlardan himoya qilish, ular oʻrtasida kitobxonlikni yanada ommalashtirishga, kitobxon yoshlar safini oshirishga qaratilgan tadbirlar tashkil etilmoqda. Ushbu grant loyihasi doirasida Navoiy nomli mahalla hududidagi 1-sonli umumtaʼlim maktabi kutubxonasi faoliyati bilan tanishish maqsadida mazkur maʼnaviyat maskaniga tashrif buyurdik.

Maktab kutubxonasi nafaqat oʻquvchi-yoshlar balki, shu atrofdagi aholi uchun ham sevimli maskanga aylangan va doim kitobxonlar bilan gavjum. Boisi ushbu fayzli kutubxonada maktab darsliklaridan tashqari, xilma-xil mavzudagi badiiy-ilmiy adabiyotlar ham mavjud. Kutubxonada kitoblar bilan toʻla javonlar joylashtirilgan xonadan tashqari, barcha sharoitlarga ega boʻlgan shinamgina oʻquv zali ham tashkil etilgan. Bu yerdagi darslik va oʻquv-metodik qoʻllanmalar soni 14 ming 323 dona boʻlsa, turli mavzulardagi badiiy adabiyotlar 1236 taga yetkazilgan.

Ushbu kutubxonada 2012-yildan buyon ishlab kelayotgan kutubxona mudirasi Iroda Allaniyozovaning ham kitobxon yoshlar safi ortishida hissasi katta. U yangi kitoblar sonini koʻpaytirishga, shu bilan birga bor kitoblar haqida oʻquvchi-yoshlarga batafsil maʼlumotlar berib borishga harakat qiladi. Undan tashqari, kitobxonlik haftaliklari, adabiy kechalar oʻtkazib, oʻquvchilarning qiziqishlarini yanada oshirib boradi. Hozirga kunda maktabda taʼlim-tarbiya olayotgan 734 nafar oʻquvchidan 689 nafari kutuxonaga doimiy aʼzo boʻlishgan. Qolganlari esa shu yerga muntazam ravishda kelib, kitoblar bilan tanishishadi va ularni oʻquv zalida muotlaa qilishadi.

Deyarli 1 asrlik tarixga ega boʻlgan ushbu 1-sonli maktabda oʻquvchilar taʼlim-tarbiya olishlari uchun barcha sharoitlar yaratilgan. Maktab 2023-yil aprel oyida “Open budget” loyihasida ishtirok etib gʻolib boʻldi va 1 mlrd. 300 ming soʻm evaziga maktab zamonaviy koʻrinishga keltirildi.

Bugungi kunda maktabimizda 84 nafar oʻqituvchi sal kam 800 oʻquvchiga taʼlim-tarbiya bermoqda. Ularning 12 nafari oliy, 34 nafari 1-toifali oʻqituvchilardir. Yaqinda Prezident sovrini uchun “Xorijiy tillarni oʻqitish boʻyicha eng yaxshi maktab” tanlovida maktabimiz ingliz tili fani oʻqituvchilari faol qatnashib, 3-oʻrinni egalladi va 50 mln. soʻmlik sertifikatni qoʻlga kiritishdi. Shuningdek, 2023-2024 oʻquv yilida maktab bitiruvchilari Fan olimpiadalarida ham faol qatnashib, yuqori natijalarni qoʻlga kiritishdi.

Maktabning ona tili va adabiyot oʻqituvchilari Gulchehra Qurbonboyeva, Mubora Xalillayeva, Dildora Hayitboyeva, Mohira Kamolovalar hamda tajribali qoraqalpoq tili fani oʻqituvchilari Aptabida Abdimuradova, Dildora Qoʻchqorovalar ham darsdan tashqari mashgʻulotlar tashkil etib, ularni kutubxonada oʻtkazishadi. Yoshlarga oʻzbek mumtoz adabiyoti, 20-asr adabiyoti va hozirgi zamon adabiyoti rivojiga hissa qoʻshgan adib va shoirlar haqida qiziqarli maʼlumotlar berib, ularning asarlari bilan tanishtirib borishadi.

Eʼtirof etish joizki, maktab kutubxonalari axborot va bilimga tobora koʻproq asoslanib borayotgan zamonaviy dunyoda muvaffaqiyatli faoliyat olib borish uchun fundamental ahamiyat kasb etuvchi maʼlumot va gʻoyalarni taqdim etadi. Navoiy mahallasidagi 1-sonli maktab kutubxonasi ham oʻquvchilarni taʼlim olish koʻnikmalari bilan qurollantirib, ularning tasavvurlarini rivojlantirishda muhim ahamiyat kasb etib, bolalarning komil insonlar boʻlib yetishishlarida alohida ahamiyat kasb etmoqda.

O.Xudoyberganova.