Nogironligi boʻlgan shaxslar uchun mehnat yarmarkasi tashkil qilindi

Oʻzbekistonda nogironligi boʻlgan shaxslarning bandligini taʼminlash va ularning jamiyatdagi ishtirokini kengaytirish maqsadida tizimli ishlar amalga oshirilmoqda. Bu borada mustahkam huquqiy baza yaratilgan. 2020-yil 15-oktyabrda qabul qilingan va 2021-yil 16-yanvarda kuchga kirgan Oʻzbekiston Respublikasining “Nogironligi boʻlgan shaxslarning huquqlari toʻgʻrisida”gi Qonuni shular jumlasidandir.

Bundan tashqari, 2021-yil 21-dekabrda Prezidentning “Nogironligi boʻlgan shaxslarni har tomonlama qoʻllab-quvvatlash, ularning bandligiga koʻmaklashish hamda ijtimoiy faolligini yanada oshirishga oid qoʻshimcha chora-tadbirlar toʻgʻrisida”gi qarori ham qabul qilingan boʻlib, ushbu qaror bilan nogironligi boʻlgan shaxslarni ishga qabul qilgan ish beruvchilarga moliyaviy yordam va soliq imtiyozlari berish koʻzda tutilgan.

Amudaryo tumani Kambagʻallikni qisqartirish va bandlik boʻlimi tomonidan ham nogironligi boʻlgan shaxslarning bandligini taʼminlash masalasiga katta eʼtibor qaratib kelinadi. 14-may kuni boʻlim binosida oʻtkazilgan mehnat yarmarkasi ham aynan shu toifa shaxslarni ishga joylashtirishda muhim vosita boʻldi.

Tuman Kambagʻallikni qisqartirish va bandlik boʻlimi hamda “Inson” ijtimoiy xizmatlar markazi bilan hamkorlikda tashkil qilingan mehnat yarmarkasida 39 ta korxona va tashkilotlar oʻzlarida mavjud boʻlgan 339 ta boʻsh ish oʻrinlari bilan ishtirok etishdi.

Aytish joizki, nogironligi boʻlgan shaxslarning jamiyatga moslashuvi va ijtimoiy faolligini taʼminlashda ularning ish bilan band boʻlishi juda muhim ahamiyatga ega. Bandlik har bir insonning oʻzini namoyon qilishi va jamiyat uchun kerakli ekanligini his qilishi uchun nihoyatda zarurdir. Shu sababli ham mamlakatimizda nogironligi boʻlgan shaxslarning bandligini taʼminlash va ularning ijtimoiy faolligini oshirishga qaratilgan bir qator davlat dasturlari amalga oshirilmoqda. Bu dasturlar imkoniyati cheklangan yurtdoshlarimizga ish topishda, kasb-hunarga oʻqishda va tadbirkorlik faoliyati bilan shugʻullanishda imtiyoz va amaliy yordamlar berishni koʻzda tutadi. Ish beruvchilarga ham nogironligi boʻlgan shaxslarni ishga qabul qilganligi uchun subsidiyalar va soliq imtiyozlari berilishi esa ularning ishga kirishini yanada osonlashtiradi.

Amudaryo tumanida oʻtkazilgan mehnat yarmarkasi orqali 16 nafar ishsiz fuqarolar doimiy ishga joylashtirildi, shundan 2 nafari nogironligi boʻlgan shaxslardir. Shuningdek, 4 nafar nogironligi boʻlgan shaxslar qayta tayyorlov kurslariga oʻqishga jalb qilindi.

Bu kabi mehnat yarmarkalari nogironligi boʻlgan shaxslarning jamiyatdagi oʻrnini mustahkamlash, ularning iqtisodiy mustaqilligini oshirish yoʻlidagi muhim qadam boʻldi.

Amudaryo tumani Kambagʻallikni qisqartirish va bandlik boʻlimi tashabbusi bilan oʻtkazilayotgan mehnat yarmarkalari nafaqat ish izlovchilar, balki muassasa, korxonalar va tashkilotlar uchun ham foydali boʻlmoqda. Chunki yarmarkalar vositasida ish beruvchilar oʻz jamoalariga yangi va qobiliyatli xodimlarni tanlab olish imkoniyatiga ega boʻlishdi. Eng muhimi bu kabi tadbirlar ish beruvchilar va ish izlayotganlarni uchrashtiruvchi muhim platforma vazifasini oʻtamoqda.