Soliq inspektsiyasi xodimlari tomonidan korruptsiyaga qarshi targʻibot tadbirlari tashkil etildi

Keyingi yillarda mamlakatimizda korruptsiyaga qarshi kurashish sohasida muhim tashkiliy-huquqiy islohotlar amalga oshirildi. Aholining huquqiy ongi va huquqiy madaniyatini oshirishga, jamiyatda korruptsiyaga murosasiz munosabatni shakllantirishga yoʻnaltirilgan tizimli choralar koʻrilmoqda.

Maʼlumki, davlat byudjetining katta qismini soliq toʻlovchilaridan tushgan daromadlar tashkil etadi. Bu tizim eng koʻp manfaatlar kesishgan, pul mablagʻ aylanmalari hajmi katta boʻlgan sohalardan biri hisoblanadi. Sohaning korruptsiyadan xoli boʻlishi, shaffof faoliyat yuritishi mamlakatning iqtisodiy mustahkamligi va rivojida muhim omil sanaladi.

Soliq tushumlarini, asosan tadbirkorlar tamonidan toʻlangan mablagʻlar shakllantiradi. Tadbirkorlar soni ortishi va qonuniy faoliyati byudjed daromadini oshiradi. Yashirin iqtisodiy faoliyat mamlakat iqtisodiga jiddiy zarar yetkazib, mulkiy tabaqalanish keskinlashuviga, aholini ijtimoiy himoya qilishda koʻplab muammolarga sabab boʻladi.

Har bir insonda, ayniqsa, davlat tashkilotlarida faoliyat yuritayotgan xodimlarda korruptsiyaga qarshi immunitet – “halollik vaktsinasi” bilan emlangan boʻlishi zamon talabidir. Davlat va jamiyatni korruptsiyadan xoli qilish maqsadida doimiy ravishda tashkilotlar, tadbirkorlar va aholi orasida targʻibot ishlari, profilaktik suhbatlar amalga oshirilyapti. Korruptsion holat haqida xabar berish uchun ishonch telefonlari faoliyati yoʻlga qoʻyilgan.

29-may kuni Qoraqalpogʻiston Respublikasi Soliq boshqarmasi shaxsiy xavfsizlik boʻlimi bosh inspektori Elyor Eshnazarov amudaryolik tadbirkorlar bilan uchrashib, profilaktik suhbat oʻtkazdi. Mazkur tadbir davomida boshqarma xodimi tadbirkorlarning faoliyati bilan yaqindan tanishish bilan birga sohadagi soliq tizimiga doir mavjud muammolar va kamchiliklarni oʻrgandi. Agar Soliq inspektsiyasi xodimlari tamonidan taʼmagirlik holatlari kuzatilsa, ishonch telefonlariga xabar berishi soʻraldi.

Shuningdek, korruptsiya va boshqa qonun buzilish holatlariga qarshi mamlakatimizda olib borilayotgan murosasiz kurash haqida va korruptsiyaga qarshi kurashish boʻyicha Oʻzbekiston Respublikasi Qonunchiligidagi yangiliklar hamda mazkur hujjatlarning mazmun-mohiyati toʻgʻrisida tadbirkorlarga atroflicha maʼlumot berilib, maxsus amaliy qoʻllanmalar topshirildi. Bu kabi targʻibot-tashviqot tadbirlari aholining huquqiy madaniyatini oshirishda muhim omil sanaladi.

Shu kuni Amudaryo tumani Soliq inspektsiyasi faollar zalida xodimlar oʻrtasida korruptsiya va boshqa huquqbuzarliklarga qarshi murosasiz munosabatni shakllantirish yuzasidan yigʻilish boʻlib oʻtdi. Unda Qoraqalpogʻiston Respublikasi Soliq boshqarmasi shaxsiy xavfsizlik boʻlimi bosh inspektori Elyor Eshnazarov, Amudaryo tumani Soliq inspektsiyasi boshligʻining birinchi oʻrinbosari Odilbek Ashirboyev, tuman prokurorining yordamchisi Ogʻabek Yuldashev, tuman Ichki ishlar boʻlimi boshligʻining oʻrinbosari Umid Oʻrazaliyev hamda Soliq inspektsiyasining shaxsiy tarkib xodimlari ishtirok etdi.

Yigʻilishni tuman Soliq inspektsiyasi boshligʻining oʻrinbosari Odilbek Ashirboyev ochdi va yigʻilganlarni kun tartibidagi masalalar bilan tanishtirdi. Tadbirda soʻz olganlar har bir xodim faoliyatida korruptsion holatlarning oldini olishi, kasbiga sadoqat bilan xizmat qilishi, tadbirkorlar va fuqarolar tamonidan bildiriladigan noqonuniy takliflarga yoʻl qoʻymasli va shu kabi boshqa masalalarda fikr-mulohazalarini bayon etdilar.

Taʼkidlanganidek, korruptsiyaga moyil xodim davlat va jamiyat rivojiga jiddiy toʻsiq sanaladi. Korruptsion muhitda raqobat va ishbilarmonlik rivojlanmaydi hamda mehnat adolatli baholanmaydi. Oqibatda esa mamalakatimizda amalga oshirilayotgan islohotlar kutilgan samarani bermaydi.

Toʻgʻri, kishilik jamiyati mavjud ekan bu illatni butunlay tag-tomiri bilan quritish imkonsizdir. Ammo har bir inson korruptsiyaga qarshi kurashishni bosh vazifasi deb bilsagina, uni jilovlash mumkin. Jamoatchilik nazorati faol boʻlmas ekan, belgilangan qonuniy normalar hayotimizda amaliy natija bermaydi. Shunday ekan, mamlakatimiz rivoji, xalqimizning farovon turmushi oʻz qoʻlimizda ekanligini unutmaylik.

Yodgorbek Ashirboyev, tuman Soliq inspektsiyasi xodimi