Kitobxonlik madaniyati va mutolaaga ehtiyoj bolalikdan boshlansin!

Koʻngil ziyosi boʻlgan kitoblarga mehr qoʻyish va kitobxonlik madaniyati yosh tanlamaydi. Farzandlarimiz butun vaqtini telefon bilan oynai jahon oldida oʻtkazib ulgʻayishmasin. Zero, bugun kitob oʻqigan bir bola ertaga televizor koʻrib oʻtirgan oʻnta bolani boshqarishi hayot haqiqatiga aylangan. Qolaversa, bunday uskunalardan doimiy foydalanish bola sogʻligʻiga jiddiy ziyon yetkazishi ham sir emas.

Bolalarda kitobxonlik madaniyatini shakllantirishda maktabgacha taʼlim tashkilotlari va axborot kutubxona markazlarining samarali faoliyati muhim ahamiyat kasb etadi. Bola yoshiga mos har xil qiziqarli ertaklar, sheʼrlar hamda qoʻshiqlar muhitida tarbiyalanar, ekan nutq shakllanishi, tasavvur dunyosi kengayishi, xotira koʻnikmalari rivojida ijobiy taʼsir koʻrsatadi. Shu sababli Amudaryo tumani Axborot-kutubxona markazida tomonidan bolalarni kitobxonlikka jalb qilish boʻyicha turli tadbirlar, aktsiyalar oʻtkazilmoqda.

Markaz tomonidan 1-iyun Xalqaro bolalarni himoya qilish kuni munosabati bilan ham “Bolalar kitob festivali” doirasida maʼnaviy-maʼrifiy tadbir tashkil etildi. Mazkur tadbirda Amudaryo tumanidagi “Raduga” nodavlat maktabgacha taʼlim tashkiloti rahbari Feruza Tajiboyeva bogʻchaning bitiruvchi bolalari bilan mehmon boʻldi. “Ezgulik – shiorimiz, marifat - qurolimiz” shiori ostida oʻtkazilgan tadbir bolajonlarga unitilmas quvonch bagʻishladi.

Tabir avvalida tuman Axborot-kutubxona markazi xodimi Rohatoy Ramanova bolalarni bayram bilan samimiy tabriklab, tashkilot rahbari Feruza Tajiboyevaga markazda bolalar uchun yaratilgan sharoit va rang-barang chiroyli ertak kitoblar haqida maʼlumot berdi. Shuningdek, markaz xodimlari tomonidan bolalarda kitobxonlik madaniyatini shakllantirish maqsadida bogʻchalarda oʻtkazilayotgan kitob koʻrgazmalari, axborot-kutubxona markazida bolalarga bagʻishlab tashkil etilgan ekurkursiyalarning ahamiyati alohida taʼkidlandi.

Shundan keyin, markaz mutaxassisi Munojat Safarboyeva tamonidan bolalar ishtirokida oʻyinlar oʻtkazildi. Oʻyin shartiga koʻra yosh rassomlar maxsus tayyorlangan rasmlarga rang berishdi. Kimdir mashinga rang bersa, boshqa ishtirokchi oʻzi sevgan ertak qahramonini jonlantirishga harakat qildi. Bolalarning rasmlarni begʻubor tilda tasvirlashi, qahramonlar obraziga kirib aytgan soʻzlari barchaning koʻngliga xush kayfiyat bagʻishladi. Munojaat Safarboyeva tamonidan obrazga kirib aytilgan qiziqarli ertaklar bolalarga manzur boʻldi.

Shundan keyin bolalar bogʻchada yod olgan oʻzbek va rus tilidagi sheʼrlarni ifodali oʻqishdi. Mazkur sheʼrlarda ularning ulgʻayganda kim boʻlishi, qaysi kasbni yaxshi koʻrishi, tabiat manzalari hamda ertak qahramonlari bayon etildi. Sheʼr oʻqish tasavvurni boyitib, nutqiy shakllanishni ham yaxshilaydi. Qizlar tomonidan tayyorlanib ijro etilgan rasqlar esa, tadbirga bayramona fayz bagʻishladi. Raqs nafaqat kayfiyatni koʻtaradi, balki bolaning sogʻlom rivojlanishida ham muhim ahamiyat kasb etadi.

Tadbir yakunida bolajonlarga tashkilotchilar tamonidan bayram sovgʻalari bilan faxriy yorliqlar topshirildi. Maktabgacha taʼlim tashkiloti rahbari Feruza Tajibayeva koʻtarinki ruhda oʻtkazilgan maʼnaviy-marifiy tadbir uchun tuman Axborot-kutubxona xodimlariga minnatdorchilik bildirdi.

Maʼlumot oʻrnida aytish joizki, bugungi kunda axborot-kutubxona markazi fondida har xil janrdagi umumiy soni 65ming 300dan ziyod ilmiy, badiy, publitsistik kitoblar hamda gazeta-jurnallar mavjud. Shundan 3mingga yaqinini bolalarga bagʻishlangan kitoblar tashkil etadi. Yozgi taʼtil vaqtida axborot-kutubxona markazi xodimlari joylarga borib, ochiq osmon ostida – tabiat qoʻynida tadbirlar, davra suhbatlari, kitob koʻrgazmalari, shoir-yozuvchilar bilan uchrashuvlar tashkil etishni rejalashtirmoqdalar.

Bola bamisoli niholga oʻxshaydi. Ularni qanday muhitda tarbiya qilish oʻzimizga bogʻliq. Zero, kitoblarni doʻst bilib ulagʻaygan insondan yomonlik chiqmaydi. Fursatdan foydalanib, tumanimizdagi barcha yoshlarni hamda aholini Axborot-kutubxona markaziga taklif qilamiz.

Rohatoy Ramonova, Amudaryo tumani Axborot kutubxona markazi Axborot bibliografiya xizmati rahbari