“Biz bir boʻlsak yagona xalqmiz – birlashsak Vatanmiz!” shiori ostida maʼnaviyat festivali oʻtkazildi
Bugun mamlakatimizda Yangi Oʻzbekistonni barpo etishdek ezgu maqsad yoʻlida keng qamrovli islohotlar olib borilyapti. Taraqqiyotning muhim asoslari boʻlgan maʼnaviyat va marʼrifatga jiddiy eʼtibor qaratilyapti. Shu jihatdan respublikamizning barcha shahar va tumanlarida joriy yilning iyul-avgust oylarida “Biz bir boʻlsak yagona xalqmiz – birlashsak Vatanmiz” shiori ostida maʼnaviyat fesivallari oʻtkazilmoqda. Ushbu madaniy-maʼrifiy tadbirlar jamiyatda maʼnaviy muhitni yaxshilash, yosh avlodni bilimga chorlash, har bir fuqaroning yurt taqdiriga daxldorlik hissini kuchaytirish, qolaversa qalblardagi shukronalik tuygʻusini namoyon etishi bilan ahamiyatli boʻlmoqda.
Ana shunday ezgu maqsadlarning mazmun-mohiyatini amudaryolik yurdoshlarimizning qalbiga yetkazish va xalqimizga xush kayfiyat ulashish maqsadida bir guruh elimiz suygan shoir-yozuvchilar, mashhur aktyor va sanʼatkorlar, taniqli jurnalistlar va madaniyat namoyandalaridan iborat “Maʼnaviyat karvoni” Amudaryo tumaniga tashrif buyurdi.
Dastlab mehmonlar Amudaryo ustida yangi qurilgan mahobatli koʻprik oldida tumanimiz mutasaddilari tomonidan kutib olindi. Mehmonlar ulugʻvor daryoning qudratini his qilish, betakror tabiatimizdan bahra olish maqsadida koʻprikdan yayov yurib oʻtishdi.
Barchamizga yaxshi maʼlumki, ushbu mahobatli koʻprikning tantanali ochilish marosimida ishtirok etish uchun Prezidentimiz Shavkat Mirziyoyev Amudaryo tumaniga tashrif buyurgan edi. Bu koʻprik davlat rahbarining xalqimizga boʻlgan cheksiz mehr-muhabbatini ramziy ifoda etishi bilan barchamizni faxrlantiradi.
Ushbu koʻprik qirgʻoqlarni bir-biri bilan birlashtiradi va iqtisodiy rivojimizda muhim vosita sifatida xizmat qiladi. Shu maʼnoda Vatanimiz mustaqilligining 33 yilligi munosabati bilan tashkil qilingan “Maʼnaviyat festivali” ham dillarni dillarga, ellarni ellarga bogʻlashi, shuningdek, qalbimizdagi Vatanga boʻlgan buyuk muhabbatimizni namoyon etishi bilan ahamiyatlidir.
Amudaryo tumani Madaniyat boʻlimi oldida mehmonlar tuman hokimi Sobir Xoʻjametov, sektor rahbarlari, hokim oʻrinbosarlari, soha masʼullari tomonidan karnay-surnay sadolari ostida tantanali qarshi olindi. Milliy liboslar kiygan qizlarimiz mehmonlarga ming yillik oʻlmas qadriyatimiz ifodasi – non-tuz tutishdi.
Tuman Madaniyat boʻlimida oʻtkazilgan maʼdaniy-maʼrifiy tadbirda filologiya fanlari nomzodi, professor Rahimboy Jumaniyazov, Qoraqalpogʻiston xalq shoiri Rustam Musurmon, teatr aktyori Tohir Raximov va qoraqalpogʻistonlik taniqli ijodkorlar soʻzga chiqib, “Maʼnaviyat festivali” doirasida oʻtkazilayotgan madaniy-maʼrifiy tadbirlarning mazmun-mohiyati, shuningdek, sanʼat va maʼdaniyatning xalq tafakkurini oshirishda muhim ahamiyatga ega ekanligini taʼkidlashdi.
Professor Rahimboy Jumaniyozov tomonidan yurt taqdiriga daxldorlik, xalqimiz birdamligi, millatlararo totuvlik, inson maʼnaviy kamolotida bu kabi madaniy-maʼrifiy tadbirlarning oʻrni toʻgʻrisida bildirilgan falsafiy fikrlari yigʻilganlarni chuqur mulohazaga chorladi. Qoraqalpogʻiston xalq shoiri Rustam Musurmon tomonidan xalqona ohanglarda oʻqilgan yurt madhini ulugʻlovchi sheʼrlar qalblarga Vatanni begʻaraz sevish kabi musaffo tuygʻularni olib kirdi. Shuningdek, teatr aktyori Toxir Raximov va Gulsara Jumaniyozovalarning oʻziga xos zalvorli fikrlari yurtdoshlarimizga olam-olam ziyo ulashdi.
Tadbir davomida nuroniy Bekman Allaberganov va shoira Zulfiya Olloyorovalar soʻzga chiqib, tumanimizga tashrif buyurgan ijodkorlarga oʻzlarining samimiy minnatdorchiliklarini izhor etishdi.
Xushovoz xonandalarimiz ijrosida yangragan koʻngilochar, shoʻx qoʻshiqlar barchani raqs davrasiga chorladi. Nuroniy onaxonlarimiz mehmonlar bilan birgalikda jozibador kuy-qoʻshiqlarga goʻzal xirom aylashdi.
“Maʼnaviyat festivali” doirasidagi tadbirlarning navbatdagi qismi Olmazor mahallasida tuman Madaniyat boʻlimi xodimlari, mehmon xonandalar va estradamiz yulduzlari ishtirokidagi gala kontsert bilan davom etdi.
Oqshom tushgan payt. Tumanimizdagi Xotira maydoni aholi, ayniqsa yoshlar bilan gavjum. Barchaning yuzida bayramona kayfiyat hukmron. Serqirra ijodkorlarning chiqishlari qalblarga quvonch olib kiryapti.
Ijodkorlar soʻzga chiqib, xalqimizni, yoshlarni bugungi shodiyona bayram va farahbaxsh kunlar bilan samimiy muborakbod etishdi. Xalqimiz sevgan ijodkorlar Rustam Musurmon va Toxir Raximov tomonidan oʻqilgan Vatan va oilani ulugʻlovchi ajoyib sheʼrlar, professor Rahimboy Jumaniyazov tomonidan bildirilgan fikrlar biz yagona xalq ekanligimizni, birlashib buyuk Vatanga aylanishimizni yana bir bor anglatdi. Shuningdek, Qoraqolpogʻistonda xizmat koʻrsatgan artist Gulsara Jumaniyazovaning bolalar obrazini gavdalantirgan oʻzgacha chiqishlari tadbir ishtirokchilariga xush kayfiyat bagʻishladi.
Xonandalar ijrosida yoshlik va muhabbatni tarannum etuvchi shoʻx qoʻshiqlar yangradi. Qoraqalpoqcha va xorazmcha diltortar navolar barchani zavqlantirib, raqsga chorladi. Ayniqsa, xonanda Iroda Iskandarova xalq orasiga kirib borib, kuylagan shoʻx qoʻshiqlari davralarni yanada jonlantirdi. Xonandaning cheksiz muhabbati amudaryoliklarning davomli olqishlariga sazovor boʻldi.
Kontsert estradamiz yulduzlari va yosh sanʼatkorlarimizning oʻziga xos goʻzal chiqishlari bilan koʻtarinki kayfiyatda davom etdi.
Darhaqiqat, Oʻzbekiston bizning yagona Vatanimiz. Malakatimizda boʻylab oʻtkazilayotgan mana shunday festivallar bizni yanada jipslashtiradi. Xalqimiz bir butun boʻlib, yurtga daxldorlik tuygʻulari bilan ezgu maqsadlarimiz yoʻlida hamjihatlikda harakat qilar ekan, mustaqilligimiz yanada mustahkam boʻlishiga zamin yaratadi. “Maʼnaviyat festivali” doirasidagi madaniy-maʼrifiy tadbirlar 15-iyulga qadar Qoraqalpogʻistonning barcha tumanlarida davom etadi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
