Qoraqalpogʻistonda "Fuqarolik jamiyati haftaligi" boshlandi

Mamlakatimizda fuqarolik jamiyati institutlarining rolini yanada oshirish va ularni davlat tomonidan qoʻllab-quvvatlash tizimini mustahkamlash borasidagi islohotlar doirasida 2025-yil 17-noyabr kuni Qoraqalpogʻiston Respublikasida “Fuqarolik jamiyati haftaligi”ga start berildi. Ushbu muloqot maydonining asosiy maqsadi sohada amalga oshirilgan ishlarni tahlil qilish va uni yanada rivojlantirish boʻyicha takliflar ishlab chiqishdan iborat. Taʼkidlash joizki, Prezidentning maxsus farmoniga muvofiq, mazkur haftalik har yili dekabr oyining birinchi haftasida oʻtkazilishi belgilangan.

Haftalik doirasida 17-noyabr kuni Qoraqalpogʻiston Respublikasi Adliya vazirligida yuzga yaqin soha vakillari ishtirokida “Fuqarolik jamiyati institutlari bilan ochiq muloqot va milliy forumi” oʻtkazildi. Forumda Qoraqalpogʻiston Respublikasi Joʻqorgʻi Kengesining qoʻmita raisi Sharapat Otemisov soʻzga chiqib, yigʻilganlarni  fuqarolik jamiyati haftaligi bilan tabriklab  bugungi forumni ochib berdi.

Forumda sohaga doir milliy qonunchilik, nodavlat notijorat tashkilotlarining moliyaviy barqarorligi, uning faoliyatida fuqarolar ishtiroki va jamoatchilik nazorati, davlat va fuqarolik jamiyati institutlari oʻrtasidagi hamkorlik hamda fuqarolik jamiyati institutlarining salohiyatini oshirish va raqamlashtirish kabi mavzular muhokama qilindi.

Taʼkidlanganidek, soʻnggi yillarda Oʻzbekistonda fuqarolik jamiyati institutlari uchun tom maʼnoda yangi davr boshlandi. 2023-yilda qabul qilingan yangi tahrirdagi Oʻzbekiston Respublikasi Konstitutsiyasida jamoat birlashmalari va boshqa nodavlat notijorat tashkilotlari, fuqarolarning oʻzini oʻzi boshqarish organlari, ommaviy axborot vositalari fuqarolik jamiyatining asosini tashkil etishi belgilab qoʻyildi. Birgina joriy yilda sohaga oid 20 ga yaqin normativ-huquqiy hujjat qabul qilindi , shu jumladan, 2025-yil 21-avgustdagi qonun bilan fuqarolik jamiyati institutlari faoliyatiga doir 10 ta qonunga oʻzgartirishlar kiritildi.

Sohani moliyaviy qoʻllab-quvvatlash tizimi ham tubdan takomillashtirildi. Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondi qayta tashkil etilib, Fond mablagʻlarini boshqarish uchun Oliy Majlis Senatining 8 nafar aʼzosi va Qonunchilik Palatasining 8 nafar deputatidan iborat Parlament komissiyasi faoliyati yoʻlga qoʻyildi. Natijada, joriy yilda fuqarolik jamiyati institutlarini qoʻllab-quvvatlashga 1 trillion 200 milliard soʻm mablagʻ jalb qilindi. Xususan, Qoraqalpogʻiston Respublikasida Jamoat fondi tomonidan 2 ta davlat ijtimoiy buyurtmasi va 19 ta davlat granti loyihalari 3 mlrd 724 mln soʻmlik mablagʻ evaziga moliyalashtirilib, ularning 14 tasi muvaffaqiyatli yakunlandi.

Forum doirasida Oliy Majlis huzuridagi Jamoat fondi Qoraqalpogʻiston Respublikasi boʻlinmasi bilan davlat tashkilotlari oʻrtasida hamkorlik memorandumlari imzolandi. Shuningdek, forumning Respublika bosqichida ishtirok etish uchun delegatlar saylanib, ommaviy axborot vositalari vakillariga haftalik davomida oʻtkaziladigan tadbirlar haqida batafsil maʼlumotlar berildi.