Agrosanoat sohasida faoliyat yurituvchi kasaba uyushmasi tashkilotlari raislarining malakasini oshirish maqsadida oʻquv seminari oʻtkazildi
Soʻnggi yillarda mamlakatimiz qishloq xoʻjaligi sohasida olib borilayotgan keng koʻlamli islohotlar nafaqat iqtisodiy koʻrsatkichlarni oshirishga, balki ushbu tizimda mehnat qilayotgan minglab ishchi-xodimlarning ijtimoiy himoyasini kuchaytirishga ham xizmat qilmoqda. Bu borada jamiyatning eng muhim boʻgʻinlaridan biri boʻlgan kasaba uyushmalarining roli beqiyosdir. Aynan shu maqsadlarni hayotga tatbiq etish, joylardagi mutaxassislarning bilim va malakasini oshirish maqsadida Qoraqalpogʻiston Respublikasida faoliyat yuritayotgan fermer xoʻjaliklarining 103 ta hududiy boshlangʻich kasaba uyushmasi tashkilotlari raislari ishtirokida oʻquv-seminar boʻlib oʻtdi.
Amudaryo tumani hokimligi binosida tashkil etilgan ushbu seminar Oʻzbekiston Respublikasi Prezidentining 2025-yil 17-oktyabrdagi uchrashuvida belgilab berilgan ustuvor vazifalar hamda “2026-yil – Mahallani rivojlantirish va jamiyatni yuksaltirish yili” Davlat dasturi doirasida oʻtkazildi. Undan koʻzlangan asosiy maqsad – Qoraqalpogʻiston Respublikasi hududida faoliyat yuritayotgan fermer xoʻjaliklaridagi hududiy boshlangʻich kasaba uyushmasi tashkilotlari faoliyatini bugungi zamon talablari asosida samarali yoʻlga qoʻyishdan iboratdir. Shu bilan birga, tashkiliy-meʼyoriy ishlarni toʻgʻri va tizimli tashkil etish, shuningdek, joylardagi kasaba uyushmalari raislariga bevosita amaliy koʻmak berish masalalari ham kun tartibidagi asosiy mavzulardan biri boʻldi.
Oʻzbekiston kasaba uyushmalari Federatsiyasining Qoraqalpogʻiston Kengashi raisi oʻrinbosari Muratbay Daniyarov, Oʻzbekiston Agrosanoat majmui xodimlari kasaba uyushmasi Respublika Kengashi raisi oʻrinbosari Husan Begmatov, Respublika Kengashi tashkiliy ishlar boʻlimi mudiri Turgʻunbay Sanayev hamda mazkur Kengashning Qoraqalpogʻiston Respublikasi boʻyicha masʼul tashkilotchisi Yergʻali Seytnazarov va Amudaryo tumani hokimi Sobir Xoʻjametovlar tadbirda qatnashib, ishtirokchilarga oʻzlarining qimmatli tavsiyalarini berdilar.
Seminar davomida bir qator dolzarb masalalar muhokama qilindi. Xususan, kasaba uyushmalari faoliyatini yanada takomillashtirish va uning samaradorligini oshirish yoʻllari, agrosanoat majmui xodimlarining mehnat huquqlarini munosib himoya qilish hamda ularning ijtimoiy manfaatlarini taʼminlash mexanizmlari boʻyicha batafsil tushuntirishlar berildi.
Bundan tashqari, tizimda amalga oshirilayotgan soʻnggi islohotlarning tub mazmun-mohiyati yuzasidan muhim va amaliy maʼlumotlar taqdim etilib, ishtirokchilarning huquqiy savodxonligini oshirishga alohida urgʻu qaratildi.
Ushbu amaliy oʻquv-seminar barcha qatnashchilar uchun ochiq muloqot va oʻzaro tajriba almashish maydoniga aylandi. Ishtirokchilar oʻzlarini qiziqtirgan savollarga javob olibgina qolmay, kasaba uyushmalari faoliyatini yanada samarali tashkil etish boʻyicha yangi bilim va zamonaviy koʻnikmalarga ega boʻldilar.
Tadbir soʻngida barcha ishtirokchilarga Oʻzbekiston kasaba uyushmalari Federatsiyasining Malaka oshirish instituti tomonidan maxsus sertifikatlar tantanali ravishda topshirildi. Ushbu hujjat ularning kasbiy salohiyati oshganligini tasdiqlash bilan birga, kelgusida qishloq xoʻjaligi xodimlarining manfaatlarini yanada ishonchli himoya qilish yoʻlidagi masʼuliyatli faoliyatlariga ham turtki boʻlib xizmat qiladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
