Fidoyi ustoz Farhod Bekchanovning 60 yillik yubileyi nishonlandi

Jamiyat taraqqiyoti va millatning porloq kelajagi fidoyi ustozlar, oʻz kasbiga mehr qoʻygan muallimlarning mashaqqatli mehnati bilan chambarchas bogʻliq. Yosh avlod qalbiga ilm-fan ziyosini taratadigan, ularni vatanparvarlik va insonparvarlik ruhida tarbiyalaydigan ustozlar har doim xalqimizning cheksiz ehtiromi va yuksak ardogʻida boʻlib kelgan. Oramizdagi ana shunday fidoyi insonlarning mehnatini eʼtirof etish maqsadida oʻqituvchilikdek sharafli va masʼuliyatli kasb egalaridan biri, oʻz umrini yoshlar taʼlim-tarbiyasiga bagʻishlagan Farhod Bekchanovning 60 yillik yubileyi munosabati bilan katta tadbir tashkil qilindi.

Amudaryo tumanidagi Uyshin mahallasi hududida joylashgan 75-umumtaʼlim maktabida oʻtkazilgan ushbu tadbir nafaqat bir insonning qutlugʻ yoshini nishonlash, balki koʻp yillik halol mehnat, ustozlik maqomiga koʻrsatilgan yuksak ehtiromning yorqin namunasi boʻldi.

Taʼkidlash joizki, Farhod Bekchanov shu maktabning oʻzida 37-yil davomida boshlangʻich taʼlim oʻqituvchisi boʻlib faoliyat yuritgan. 37 yillik faoliyat bu – minglab murgʻak qalblarga ilk harflarni tanitgan, ularning qoʻliga qalam tutqazib, hayotning katta oqimlari sari yoʻllagan beminnat mehnat demakdir.

Farhod Bekchanovning bosib oʻtgan hayot yoʻli faqatgina maktab va taʼlim berish mashaqqatlari bilan chegaralanib qolmaydi. Bu fidoyi oʻqituvchi harbiy xizmatni Afgʻonistonda oʻtab, Afgʻon urushida ishtirok etib, yigitlik burchini mardonavor bajargan haqiqiy jasorat egasidir. Urushning ogʻir va suronli yillari uning irodasini tobladi, tinchlikning qadrini va musaffo osmonning nechogʻlik ulugʻ neʼmat ekanligini chuqur his qilishga oʻrgatdi. Aynan shu hayotiy tajriba va qatʼiyat keyinchalik uning oʻqituvchilik faoliyatida, oʻquvchilarga vatanparvarlik tuygʻularini singdirishida muhim poydevor boʻlib xizmat qildi.

Tantanali tadbirda Oʻzbekiston Veteran va faxriylar birlashmasi Qoraqalpogʻiston Respublikasi boʻlimining Amudaryo tumani boʻyicha vakili Bahodir Jumaniyozov ishtirok etib, ustozning yosh avlodni maʼnaviy yetuk va haqiqiy vatanparvar qilib voyaga yetkazishdagi ulkan hissasini alohida eʼtirof etdi. Ushbu fidokorona mehnatlarining munosib eʼtirofi sifatida Farhod Bekchanovga “Yoshlarni vatanparvarlik ruhida tarbiyalash uchun” koʻkrak nishoni, yaʼni maxsus medal tantanali ravishda topshirildi. Bunday yuksak mukofot ustozning taʼlim sohasidagi koʻp yillik mashaqqatli va sharafli yoʻliga berilgan eng adolatli va haqli baholardan biri boʻldi.

Tadbir davomida soʻzga chiqqan mehmonlar va hamkasblar ustozning insoniy fazilatlari, kasbiga boʻlgan sadoqati haqida iliq fikrlarni bildirib oʻtdilar. Xususan, Uyshin mahalla fuqarolar yigʻini raisi Rustam Rajabov va tadbirda ishtirok etgan faxriylar hamda jamoatchilik vakillari soʻzga chiqib, oʻzlarining samimiy tabriklarini va eng ezgu tilaklarini izhor qildilar.

Yigʻilishda maktabning yuqori sinf oʻquvchilari ham faol ishtirok etib, oʻzlarining sevimli ustozlarini qutlugʻ 60 yoshlik yubileyi va yuksak mukofot bilan qutlashdi. Ularning yuzlaridagi quvonch va koʻzlaridagi minnatdorchilik hissi ustoz mehnatining oʻziga xos aks-sadosi, yillar davomida qilingan mehnatning shirin mevasi boʻldi.

Tantanali marosim soʻngida koʻp yillik tajribaga ega, fidoyi muallim Farhod Bekchanov soʻzga chiqib, oʻziga koʻrsatilgan bunday yuksak eʼtibor va ehtirom uchun barcha yigʻilganlarga, tashkilotchilarga va jamoatchilikka oʻzining cheksiz minnatdorchiligini bildirdi.

Bu kabi maʼnaviy-maʼrifiy tadbirlar jamiyatimizda ustoz va murabbiylarga boʻlgan hurmat-eʼtiborning tobora ortib borayotganligini, ularning halol mehnati hech qachon eʼtibordan chetda qolmasligini yana bir bor namoyon etadi. Zero, millat kelajagini yaratuvchi insonlarning qadri baland boʻlgan yurtda yuksalish, maʼnaviyat va taraqqiyot bardavom boʻladi.