AVLODLAR EHTIROMI

Xotira – kechagi kun bilan bugunni bogʻlab turuvchi maʼnaviy koʻprik, tarix solnomasiga bitilgan ulugʻ va ezgu ishlarga avlodlar ehtiromi.

Mana bir necha kundirki, butun mamlakatimizda, shu jumladan tumanimizda  ham buyuk Vatan qurgan, oʻzi sevgan xalqining baxt-saodati, erk va ozodligi uchun kurashgan, taʼbir joiz boʻlsa, Oʻzbekiston mustaqilligi yoʻlida umrini bagʻishlagan Birinchi Prezidentimiz, Oʻzbekiston Qahramoni I.A.Karimov tavallud topgan kunga bagʻishlangan xotira tadbirlari boʻlib oʻtmoqda.

Ana shunday xotira tadbiri 30-yanvar – I.A.Karimov tavallud topgan kunda Amudaryo akademik litseyida ham boʻlib oʻtdi. Avvalo tadbir ishtirokchilari boʻlgan tumanimiz faollari va oʻquvchi-yoshlarga buyuk oʻzbek farzandi, Birinchi Prezidentimiz I.A.Karimovning joʻshqin va kurashchan hayoti va faoliyati haqida hikoya qiluvchi hujjatli film namoyish etildi. Film namoyishidan soʻng I.A.Karimovning kelajakni  koʻra oladigan yengilmas va qatʼiyatli davlat rahbari sifatidagi ulugʻvor xizmatlariga bagʻishlangan «Mustaqillik meʼmori» mavzusida ilmiy-maʼrifiy xotira anjumani oʻtkazildi.

Ilmiy-maʼrifiy Xotira anjumanida tuman hokimi oʻrinbosari, tuman xotin-qizlar qoʻmitasi raisi M.Ahmedova, Berdaq nomidagi Qoraqalpoq Davlat Universiteti rektori, Qoraqalpogʻiston Respublikasi Joʻqorgʻi Kengesi deputati Murodboy Jumanov, Qoraqalpogʻiston xalq shoiri Xalila Davlatnazarovlar I.A.Karimovning Oʻzbekistonni tubdan oʻzgartirib yuboruvchi iqtisodiy, siyosiy hamda madaniy-maʼrifiy islohotlarni amalga oshirish yoʻlidagi buyuk xizmatlari xususida toʻlqinlanib gapirdilar.

Qoraqalpogʻiston Xalq shoiri Xalila Davlatnazarov "Bizlar hech kimdan kam boʻlmasligimiz kerak” mavzusida soʻz yuritib, oʻzbek xalqining hech kimdan kam emasligini tarannum etuvchi sheʼrlaridan oʻqib berdi.

Shuningdek, "Mustaqillik meʼmori” deb nomlangan xotira tadbirida bir guruh yoshlar ham soʻzga chiqib, oʻzlarining buyuk Yurtboshimiz xotirasiga boʻlgan chuqur hurmat va ehtiromlarini izhor etdilar.

* * *

27-yanvar kuni 31-sonli umumtaʼlim maktabida xalqimizning buyuk va sadoqatli farzandi, Birinchi Prezidentimiz I.A.Karimov xotirasiga bagʻishlangan "Mustaqillik meʼmori” mavzusidagi xotira  tadbiri boʻlib oʻtdi.

Oʻzbekiston milliy tiklanish demokratik partiyasi, "Kamolot” YoIH tuman Kengashi hamkorligida oʻtkazilgan ushbu tadbirda OʻzMTDP tuman Kengashi raisi Shirin Yangiboyeva, "Taraqqiyot koʻzgusi” gazetasi maxsus muxbiri Robiya Yoʻldoshevalar soʻzga chiqishib, istiqlolning ilk yillarida I.Karimov koʻrsatgan buyuk jasorat va matonat haqida, mamlakatimizda mustaqillik tufayli erishilgan mislsiz gʻalabalar, ayniqsa, oʻquvchi-yoshlarning oʻz qobiliyat va iqtidorlarini amalda namoyon etishlari uchun yaratilgan jahon andozalariga mos shart-sharoitlar xususida batafsil hikoya qildilar. Oʻquvchilarga monitor orqali I.A.Karimovning hayoti va faoliyati haqida hikoya qiluvchi xronik maʼlumotlar namoyish etildi.

Tadbirda maktab oʻquvchilari ham soʻzga chiqishib, I.A.Karimov xotirasi oldida hamisha ehtiromda ekanliklarini, Yurtboshimiz boshlab bergan ulugʻvor ishlarning  davomchilari boʻlish uchun oʻzlarining aʼlo oʻqishlari bilan javob berajaklarini bildirib, oʻzlarining Islom Karimov xotirasiga bagʻishlangan sheʼrlarini oʻqib berdilar.

M.ShOMURODOV.

* * *

28-yanvar kuni Mangʻit iqtisodiyot kollejida Oʻzbekiston Respublikasining birinchi Prezidenti Islom Abdugʻaniyevich Karimovning tavallud kuniga bagʻishlab xotira tadbiri oʻtkazildi. Mazkur tadbirda Milliy tiklanish demokratik partiyasi tuman Kengashi raisi Sh.Yangiboyeva, "Nuroniy” jamgʻarmasi tuman boʻlimi raisi B.Allabergenov, "Mahalla” xayriya jamoat fondi tuman boʻlinmasi masʼul kotibi O.Ibragimov, "Kamolot” YoIH tuman Kengashi mutaxassisi G.Nurjanova va tuman ichki ishlar boʻlimi inspektori, katta serjant A.Yoʻldoshevlar ishtirok etishib, buyuk davlat va siyosat arbobi, Oʻzbekistonning Birinchi Prezidenti I.Karimovning mamlakatimizda olib borgan keng salohiyatli ishlari haqida oʻquvchi-yoshlarga gapirib berdilar.

Tadbirda kollej oʻquvchi-yoshlari ham soʻzga chiqishib, I.A.Karimov oʻzi hayotligida ilgari surgan tinchlikparvar, xalqparvar va adolatparvar gʻoyalarga sadoqatda yashashga,  Oʻzbekiston kelajagi uchun fidoyilik bilan mehnat qilishga tayyor ekanliklarini bildirdilar.

***

Yurtimizning bugungi istiqboli va tinchligining asoschisi boʻlmish Oʻzbekiston Respublikasining Birinchi Prezidenti  I.A.Karimovning tavallud kuniga bagʻishlab Amudaryo transport va xizmat koʻrsatish kasb-hunar kollejida ham "Mustaqillik meʼmori” mavzusida tadbir oʻtkazildi. Tadbirda kollej direktori Oʻ.Qoʻshnazarov I.A.Karimovning hayoti va faoliyati, amalga oshirgan keng koʻlamli ishlari haqida maʼruza qildi. Maʼrifiy tadbirda "Qurilish xizmat” MChJ rahbari  B. Toʻraboyev ham ishtirok etib, Yurtboshimizning ezgu ishlari haqida toʻlqinlanib gapirdi. Tadbir davomida maʼnaviy-maʼrifiy ishlar boʻyicha direktor oʻrinbosari  B.Shomurotov, tarix fani oʻqituvchisi H.Matyusupov, huquqshunoslik fani oʻqituvchisi Oʻ.Gafurovlar Birinchi Prezidentimiz amalga oshirgan bunyodkorlik ishlari xususida oʻquvchilarga soʻzlab berdilar. Kollej oʻquvchilari Yurtboshimizni  madh etuvchi sheʼrlar oʻqidilar. 

B. Saparboyev,

Amudaryo transport va xizmat koʻrsatish kasb-hunar kolleji ijtimoiy fanlar kafedrasi mudiri.