YaXŞILAR YoDI ZAVOL BILMAYDI
Yaxşi insonlarning umri tugamaydi, balki qalblarga, xotiralarga köçadi. Butun umrini xalq xizmatiga, sanʼatga baxşida etgan betakror sozanda, zarb usullari ustasi, jonkuyar ustoz Rajabboy Bobojonovning hayoti bunga misol böla oladi.
U umr böyi Respublikamizdan taşqari Xorazm viloyati, Turkmaniston Respublikasi sanʼat şinavandalarini öz sozi, yoqimli ovozi bilan bahramand etib yaşadi, zarbli çolğularni eng nozik pardada, inson ruhiyatidagi mudroq tuyğularni ham junbuşga keltira oladigan darajada çalib, bu borada öziga xos maktab yaratgan inson.
Ustoz sanʼatkor Manğit şahrining hozirgi Navoiy mahallasida 1927-yilda dunyoga kelgan. Örta maktabni tugatgaç, avval haydovçilik qilgan, sanʼat sohasidagi faoliyati 1965-yildan boşlangan. Dastlab, Madaniyat uyida xodim, söng “Uçqun” aşula va raqs dastasi rahbari lavozimida işlagan. Bozorgul Şerimbetova bilan turmuş qurib, 9 nafar farzandni ilmli, kasb-hunarli qilişgan.
Ot izini toy bosar, deganlaridek, öğli Hamza Bobojonov ota kasbining davomçisi sifatida 9-sonli BMSMda musiqa öqituvçisi bölib işlab, nafaqaga çiqdi. Nevarasi Ötkirbek Bobojonov esa ayni şu maktabda hozir yoşlarga sanʼat sirlarini örgatmoqda.
Rajabboy Bobojonovning faoliyatini beqiyos isteʼdod sohibi, xalqimiz qalbida öz qöşiqlari bilan öçmas iz qoldirgan Nazir Rahimov va sozanda Usmon Ahmedov faoliyatidan ayro tasavvur etiş qiyin. Ular uçovi göyo bir butun edi, çarçaşni, xizmatini minnat qilişni yo xizmatiga haq aytişni bilişmasdi.
Rajabboy Bobojonov “Uçqun” aşula va raqs dastasiga rahbarlik qiliş barobarida, Nazir Rahimovning doiraçisi, qöşiqlarini eng avj pardaga kötarişda jörovoz hamkori edi.
Ötgan asrning 70-yillarida Nazir Rahimov, Rajabboy Bobojonov, Usmon Ahmedovlarning tumanda oyoği tegmagan hudud yöq, degan gap yurardi. Çindan-da, bu hokisor insonlar çorlaganning töyida, kontsertlarda elga xizmat qilişdan çarçamagan, şinavandalarining könglini olişni özlariga ulkan baxt deb bilişgan.
Yaqinda tuman Madaniyat bölimi tomoşalar zalida benazir ustoz sanʼatkor Rajabboy Bobojonovning xotira keçasi ötkazildi.
Avvalo şu örinda tuman Madaniyat bölimi maʼmuriyatining soha rivojiga ulkan hissa qöşib, hayotda özidan ulkan maʼnaviy saboq qoldirgan insonlarni xotirlab, ularning sobiq kasbdoşlari, oila aʼzolari, döstlari iştirokida ana şunday tadbirlarni ötkazib kelayotgani eʼtiborga loyiq ekanligini aytiş joiz. Bu sanʼat sohasini tanlagan yoşlar uçun sanʼatning, sanʼatkorning qadr-qimmatini çuqur anglaşlari uçun ibrat desak, xato bölmas.
Rajabboy Bobojonovning hayoti va ijodiy faoliyatiga bağişlangan xotira keçasida farzandlari, soha xodimlaridan taşqari, tumanimizning jamoat taşkilotlaridan vakillar, sanʼatkorning kuy-qöşiqlarini hurmat-ehtirom bilan eslaydigan muxlislari, döstlari, şogirdlari iştirok etdilar.
Ulkan anjuman tusini olgan xotira keçasida söz olgan ilk şogirdlaridan biri, Qoraqalpoğistonda xizmat körsatgan madaniyat xodimi Gulmirza Nurmatov Rajabboy Bobojonovning tumanimiz sanʼati rivojiga qöşgan hissasini, elga qilgan xizmatlarini söz bilan ifodalaş qiyin, deb taʼkidladi.
- Bir voqeani aytay, keç kuzakda, tongda armiyadan keldim. Hademay xabar topib, Nazir aka Rahimov, Rajabboy aka Bobojonov, Usmon aka Ahmedovlar uyimizga kirib kelişdi. Ota-onamga “Köz oydin” aytib, ozgina ötirişdi-da, otamga qarab Rajabboy aka:
- Kuz oxirlayapti, hali tumanning paxta rejasi bajarilişiga ança bor. Kolxozçilarga hormasinga ketayotgan edik, öğlingizni ham olib ketsak, - dedi. Otam bizni duo qilib qoldilar.
Şu kuni neça xöjaliklarda, dala boşida neça joyda kontsert qöydik, esimda yöq, esimda bori - qoronği tuşib, yulduzlar çaraqlab turgan vaqtda uyga qaytdik. Kelsam, meni körgani kelgan qarindoşlarim, döstlarim tarqalişib bölişgan ekan. Men ana şunday hokisor ustozlar yetovida yurib, sohaga hissa qöşganimdan juda baxtiyor hisoblayman özimni.
Tadbirda köngil qatlaridagi xotiralar tilga olindi. Şogirdlarning dil ehtiromi aks etgan qöşiqlari davraga özgaça ruh bağişladi. Ayniqsa, Rajabboy Bobojonovning öğli, Hamza Bobojonovning ijrosidagi qöşiqlarni yiğilganlar miriqib tingladilar.
Xotira! Köngillarimizga köçgan yaxşilar yodini ana şunday nom bilan ataymiz, eslaymiz, soğinamiz.
Ha, ibratli umr sohibi Rajabboy Bobojonov ham köngillarimizda barhayot.
Oygul RAJABOVA.

▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶