“El desa Navoiyni” deb nomlangan adabiy-musiqiy tadbirda ulugʻ shoirga ehtirom koʻrsatildi

Alisher Navoiy! Bu nom qaysi davrada, qanday minbarda yangrashidan qatʼiy nazar, barcha uchun sevimli, aziz. Chunki yer yuzida oʻzbek degan buyuk millatni ana shu nom bilan bilguvchi davlatlar, el-u elatlarda ham Navoiy, desalar qalblarida ezgu tuygʻular junbushga kelguvchi, Navoiy dahosiga yuksak ehtirom bilan yashaguvchi insonlar bisyor. Mamlakatimizda ulugʻ shoirga ehtirom, shoirning bebaho merosiga muhabbat har bir vatandoshimiz uchun shon-sharaf, faxrdir.

Yurtimizning barcha hududlarida ayni kunlarda boʻlib oʻtayotgan A.Navoiy tavalludining 579 yilligiga bagʻishlangan maʼnaviy-maʼrifiy, adabiy-musiqiy tadbirlarda  ham ulugʻ shoir dahosiga beqiyos katta hurmat va eʼtibor, ehtirom koʻrsatilmoqda.

9 fevarl – Alisher Navoiy tavalludi kuni munosabati bilan 22-sonli umumtaʼlim maktabida boʻlib oʻtgan adabiy-musiqiy tadbirda oʻquvchi-yoshlarning Navoiy asarlarini qay darajada oʻzlashtirayotganlari, shu barobarida Navoiy asarlaridan olgan taassurotlari turli sahna koʻrinishlari, shoir gʻazallari, ruboiy va tuyuqlari, masnaviy hamda muxammaslari talqinida oʻz ifodasini topdi.

Maktabning ona tili va adabiyot fani oʻqituvchisi Nasiba Matsafoyeva rahbarligida tashkil etilgan, “El desa Navoiyni” deb nomlangan tadbirning maʼnaviy-maʼrifiy qismida 9-sinf oʻquvchilari ikki guruh boʻlib oʻzaro bellashdilar. Oʻquvchilar Alisher Navoiyning nihoyatda insonparvar, vatanparvar, elparvar shaxs sifatida yuksak obroʻ-martabaga  erishganligini sahna koʻrinishlari orqali koʻrsatib berdilar.

Yirik davlat va jamoat arbobi sifatida qilgan bunyodkorlik ishlari, madrasa talabalari uchun oʻz hisobidan nafaqalar ajratib, ularni darsliklar bilan taʼminlagani, kutubxonalar, maʼnaviyat va maʼrifat maskanlari, koʻpriklar hamda masjidlar qurib, yetim-yesirlarga, ehtiyojmand insonlarga koʻrsatgan beminnat yordamlari xususida oʻquvchilar havas va hayrat, iftixor bilan soʻzladilar.

Tadbirning adabiy-badiiy qismida Choykoʻl madaniyat markazi xodimi Rahima Xudoyberganova soʻzga chiqib, maktab oʻquvchilarining Navoiy dahosiga yuksak ehtirom ila tashkillashtirgan ushbu tadbiri jamiyatimizda Navoiy asarlarining bilimdonlari safi oshishiga xizmat qilishini taʼkidladi. Shu bilan birga navoiyxonlik kechalarini tashkil etish anʼanaga aylangani yoshlarning ongu tafakkurini yuksaltirish, ularni vatanparvarlik, insonparvarlik va milliy qadriyatlarimizga hurmat ruhida tarbiyalashga xizmat qilayotganini soʻzladi. Oʻz oʻrnida taʼlim dargohlarida oʻtkazilayotgan bu kabi xayrli ishlar ulugʻ mutafakkir asarlari mazmunini chuqur anglashga, yoshlarni Vatanga muhabbat, yurtga sadoqat ruhida tarbiyalashga, mehr-oqibat va oʻzaro hurmat tuygʻularini mustahkamlashga xizmat qilishini ham aytib oʻtdi.

Shundan soʻng, oʻquvchi-yoshlar “Navoiy va Guli”, “Navoiy va Husayn Boyqaro” adabiy kompozitsiyalarini mahorat bilan ijro etishdi. Navoiy gʻazallari, ruboiy va tuyuqlari asosida bahri-baytlar aytishib, tadbirga fayz bagʻishladilar.

Robiya Yoʻldosheva.