NAMUNAVIY OChIQ MAShGʻULOT BOLAJONLARGA MANZUR BOʻLDI

Inson hayotida ilmiy-ommabop, badiiy-maʼrifiy kitoblarning oʻrni soʻzsiz, ulkan. Kitoblar tufayli dunyoni anglaymiz, ruhiy ozuqa olamiz, bilimimizni oshiramiz. Shuning uchun ham  kitoblar chop etishga, bosma nashrlarga ehtiyoj insoniyatning  ilk rivojlanish davrlaridan paydo boʻlgan. Qadimgi ajdodlarimizning ilk yozuvlari toshlarga, qoyalarga, devorlarga oʻyib bitilgan boʻlib, ular harf, soʻz  shaklida emas, rasmlar va belgilar koʻrinishida boʻlgan.

Biroq davrlar oʻtishi natijasida yozuvlar paydo boʻlgan, turli joylarga yozilgan xabarlarni bir hududdan ikkinchi hududga yetkazish iloji boʻlmaganligi uchun hayvonlar terisiga yozishgan va bir-birlariga joʻnatishgan. Kitoblarning oʻziga xos taraqqiyot yoʻli haqida oʻsib kelayotgan yosh avlodga oʻrgatmogʻimiz, biz koʻrib yurganlarimiz turli rang-barang kitoblar ota-bobolarimizning yuksak aql-zakosi mevasi ekanligini chuqur anglab yetishlariga erishmogʻimiz lozim.

Shu yilning 26-fevralida Mangʻit shahrida faoliyat koʻrsatayotgan 40-sonli maktabgacha taʼlim tashkilotida Dilfuza Yoʻldoshevaning “Kitoblar tarixi”, “Gʻaroyib olam” mavzularida oʻtkazgan namunaviy ochiq darsi shu maqsadga qaratildi.

Tashkilotning katta guruhida boʻlib oʻtgan namunaviy ochiq  darsda koʻpgina maktabgacha taʼlim tashkilotlarining  katta guruhlari tarbiyachilari ishtirok etdilar.
Oʻziga xos tajriba almashuv, doʻstona hamkorlikka asoslangan tadbirda Dilfuza Yoʻldosheva bosma nashr kitoblarning  paydo boʻlishi tarixi haqida maʼruza qildi. Shuningdek, ulkan taraqqiyot pillapoyalarini bosib oʻtgan kitoblarning inson hayotidagi oʻrniga ham keng toʻxtaldi. Shuningdek, yoshlarning baxtu kamoli, osoyishta va farovon hayotida kitobning alohida oʻrni borligini, yaxshi kitob insonda Vatanga muhabbat, milliy va umuminsoniy qadriyatlarga hurmat tuygʻularini yuksaltirib, yaxshilik hamda ezgulikka undashini alohida taʼkidladi. Soʻnggi yillarda maʼnaviyatni yuksaltirish va kitobxonlikni kuchaytirishga qaratilayotgan eʼtibor va ragʻbat kitobxon xalq degan azaliy yuksak mavqeimizni nafaqat qaytarib bergani, ayni chogʻda, bu boradagi intellektual salohiyatimiz va imkoniyatlarimizni tubdan oshirishning asosiy omili ham boʻlganini ham soʻzlab oʻtdi. Bolajonlarga necha ming yillardan buyon sayqallanib, ne-ne avlodlarga yoʻlchi yulduzdek toʻgʻri yoʻlni koʻrsatib kelayotgan ana shu xalqona hikmatlar negizidagi asl haqiqat insonning bilimli, tarbiyali, kasb-hunarli va albatta, baxtli va davlatli boʻlishining muhim omili – bu kitobga doʻst boʻlish, hamisha kitob oʻqish va kitob mutolaasini umr boʻyi kanda qilmaslik ekanligini tushuntirdi.
Bizni oʻrab turgan olam gʻaroyibotlarga toʻladir. Unda jamiki  jonzotlarning umrguzaronligi tabiat bilan bogʻliqdir.

Tarbiyachining bu boradagi maʼruzasini ham jajji bolajonlar qiziqib tingladilar.
Maʼruzalardan soʻng guruh tarbiyalanuvchilari orasida kitoblarning  ahamiyatini targʻib etuvchi, atrofimizni oʻrab turgan olamni eʼzozlash, tabiatga ozor bermaslik, chor-atrof ozoda, obod boʻlishiga erishish lozimligi xususida sheʼrlar aytdilar.

Shunisi eʼtiborliki, mazkur muassasada bolajonlarning puxta taʼlim-tarbiya olishlari, sogʻlom ovqatlanishlari va jismoniy tarbiya bilan shugʻullanishlari uchun barcha sharoitlar yaratilgan. Turli toʻgaraklar tashkil etilib, ularning  iqtidori yuksalishiga xizmat qilayapti.

Taʼlim-tarbiyaning ilk bosqichi hisoblanmish maktabgacha taʼlim tashkilotidagi bu kabi amalga oshirilayotgan saʼy-harakatlar kelgusida oʻzining ijobiy samaralarini berishiga ishonamiz.

Oygul RAJABOVA.