Jamiyat 25.03.2020 👁 178

BOLALAR ONAJONLARI VA BUVIJONLARIGA ShODLIK ULAShDILAR

Har gal bahor fasli oʻzining biri-biridan dilbar bayramlari, koʻngilochar tadbirlari, ayniqsa, yashnash-yasharish fasli - Navroʻzona qadriyatlar madh etiluvchi turli xil adabiy-badiiy, musiqiy kechalari bilan xalqimiz qalbiga olam-olam zavq bagʻishlaydi.

Butun mamlakatimizda boʻlgani kabi tumanimizda ham bahorning ilk kunlaridan tantanalar, tadbirlar boshlab yuborildi. Oilalarda, mahallalarda, umumtaʼlim maktablarida, idora va tashkilotlarda sogʻinib kutilgan bahorni, Ayolni, Navroʻzi olamni sharaflovchi sheʼr-u qoʻshiqlar, ezgu tilaklar jarangladi.

36-sonli umumtaʼlim maktabida esa bu nafosatli ayyomni 2-“B”sinf oʻquvchilari boshlab berishdi. “Onajonim – Onam!” deb nomlangan adabiy-musiqiy tadbirga oʻquvchilar oʻz ustozlari Saragul Yusupova bilan puxta taraddud koʻrdilar. Bayram oʻtkaziladigan xona Onani, Ayolni sharaflovchi shiorlar, gullar, bahor koʻkatlari bilan bezatildi. Boshlangʻich sinf oʻqituvchisi Saragul Yusupova ayolning nafosati va nazokati, vafo va sadoqati, aql-zakovati va fidoyiligi asrlar mobaynida yer yuzida hayot davomiyligi va abadiyligiga asos boʻlib kelayotganligini gapirdi. Dunyodagi eng buyuk sanʼat asarlari, qoʻshiq va qasidalar, meʼmoriy obidalar onalar, ayollar shaʼniga bagʻishlanganini, yurtimizda xotin-qizlarni har tomonlama qoʻllab-quvvatlash, onalik va bolalikni muhofaza qilish, oila mustahkamligini taʼminlash davlat siyosati darajasida ekanligini faxr bilan toʻlqinlanib soʻzladi.

Shundan soʻng, bolajonlar oʻz onalariga bagʻishlab, sheʼr va qoʻshiqlar kuyladilar. Oʻquvchilardan Zilolaxon Adilova, Behzodjon Rahimboyev, Farangiz Aminboyeva hamda Boburjon Qadamboyevlar tomonidan ijro etilgan ashula va raqslar, ona soʻzi ishtirokidagi sheʼrlar, maqol va hikmatlar barchaning qalbiga quvonch va hayajon bagʻishladi.

Oʻquvchilar taniqli oʻzbek shoirlari qalamiga mansub sheʼrlarni ifodali oʻqiganlarida ularning aziz onajonlari hayajon bilan tingladilar. Muhtarama onaxonlarga sheʼriy tilaklar bildirgan oʻgʻil-qizlarning ijrolaridan bayram ishtirokchilari boʻlgan onajon va buvijonlar qalblari cheksiz quvonchlarga toʻldi.

Ayniqsa, “Onajonim”, “Buvijonim” qoʻshiqlari oʻquvchilarning onalari va buvijonlari uchun haqiqiy bayram sovgʻasi boʻldi.

Onaning oʻz farzandiga mehr-muhabbatini quyosh taftiga qiyoslaydilar. Farzandning onaga boʻlgan mehri ham shu qadar buyuk boʻlmogʻi uchun farzand oʻz ota-onasi oldidagi burch va masʼuliyatlarini chuqur anglab yetmogʻi joiz. Xususan, u goʻdakligida onasi uzun tunlarni bedor oʻtkazib, yoshligini, kuch-quvvatini oʻgʻil-qizlari kamoloti uchun baxsh etganini har bir farzand yurakdan his etib, bu buyuk zotning qadrini dunyoning hamma moddiyatlaridan baland tutmogʻi lozimligini oʻquvchilar oʻzlari oʻqigan sheʼrlar, kuylagan qoʻshiqlari orqali ifodalab berishgani barchaga manzur boʻldi.

Tadbirning musiqiy qismi yanada hayajonli quvonchli lahzalarga boy tarzda oʻtdi. Bolalar “Andijon polkasi” “Lazgi” kuylariga raqslarga tushdilar. Yuzlarida quvonch va baxtiyorlik aks etib turgan bolalar ijrosidagi shoʻx raqslar barchaga xush kayfiyat bagʻishladi.