TAʼLIM SOHASINI RIVOJLANTIRIShGA DOIR PREZIDENT FARMONI KENG JAMOATChILIK IShTIROKIDA OʻRGANILDI

Sharq donishmandlari “Ilm-maʼrifatsiz najot yoʻq va boʻlmagay ham” deganlarida nechogʻliq haq ekanliklarini bugungi kun misolida anglash mumkin. Shu yil 6-noyabrda Oʻzbekiston Respublikasi Prezidentining “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida”gi PF-6108-son Farmoni qabul qilindi. Loyihasi dastlab keng jamoatchilik ishtirokida muhokama qilingan ushbu Farmonda taʼlim tizimini yanada takomillashtirish koʻzda tutilgan.

Muhokamaga qoʻyilgan “Mamlakatimiz taʼlim-tarbiya tizimini yanada takomillashtirish, ilm-fan sohasi rivojini jadallashtirishga oid qoʻshimcha chora-tadbirlar toʻgʻrisida”gi Prezident Farmoni loyihasi aholi tomonidan juda iliq kutib olindi. Chunki, Farmon loyihasida mamlakatimizda taʼlim-tarbiya tizimining sifati va samaradorligini oshirish, yosh avlod egalarida zamonaviy bilim va koʻnikmalarni shakllantirish, taʼlimning uzviyligi va uzluksizligini taʼminlash borasida tizimli ishlarni olib borish koʻrsatilgan. Shuningdek, tizimni yangidan isloh qilish, mamlakatimizda taʼlim-tarbiya va ilm-fan sohalarini takomillashtirish jamiyatimizda oʻqituvchi va pedagog xodimlar, ilmiy va ijodkor ziyolilarga boʻlgan hurmat eʼtiborni yanada oshirish, taʼlim oluvchilarning kasbiy mahoratini rivojlantirish, tizimga xususiy sektor ishtirokini kengaytirish kabi ezgu maqsadlar aks ettirilgan.

Tumanimizda ham ushbu Farmon loyihasi boʻyicha joylarda targʻibot ishlari amalga oshirildi va uchrashuvlarda takliflar oʻrganildi.

Jumladan, “Qilichboy” saylov okrugida joylashgan 32-sonli maktab jamoalari va aholi bilan Farmon loyihasining mazmun va mohiyatini muhokama qilib, bildirilgan takliflarni yozib oldik. Shuningdek, Xalq deputatlari Amudaryo tuman Kengashi sessiyasida va tumandagi maktab rahbarlari bilan uchrashuvlarida bildirilgan fikr-mulohazalardan kelib chiqib, Joʻqorgʻi Kenges qarori loyihasiga oʻz takliflarimizni kiritdik.

Farmon loyihasining 3-bandi ikkinchi xatboshisida tayanch oʻquv rejasini takomillashtirish va umumiy haftalik oʻquv yuklamasini kamaytirish hamda oʻzaro uzviy bogʻliq fanlarni birlashtirish hisobiga ularning sonini optimallashtirish koʻrsatilgan. Bunda umumiy haftalik yuklamasini qisqartirish umumiy oʻrta taʼlim maktab oʻquvchilarining sinflar va fanlar kesimida tasdiqlangan davlat taʼlim standartlarini bajarishida muammolar yuzaga keladi. Shu sababli hozirgi tayanch oʻquv reja asosida haftalik oʻquv yuklamalarini saqlab qolishni taklif etdik.

Shuningdek, Farmon loyihasining 8-bandi ikkinchi xatboshida oʻquvchilari xalqaro fan olimpiadalarida gʻoliblikni qoʻlga kiritgan umumtaʼlim taʼlim muassasalari pedagoglariga toʻgʻridan-toʻgʻri oliy malaka toifasi berish belgilangan boʻlib, bunga qoʻshimcha fan olimpiadasining Oʻzbekiston Respublikasi bosqichida gʻoliblikni qoʻlga kiritgan fan oʻqituvchilarining malaka toifalarini bir pogʻonaga koʻtarish taklifini kiritdik.

Shuni quvonch bilan alohida eʼtirof etishimiz kerakki, biz va keng jamoatchilik tomonidan bildirilgan ushbu takliflar inobatga olindi va Oʻzbekiston Respublikasi Prezidentining 6-noyabr kungi “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida”gi PF-6108-son Farmonida qayd etildi. Oʻz navbatida bu bilan biz kabi taʼlim jonkuyarlari zimmasiga yanada kattaroq masʼuliyat yuklandi.
Biz ishonamizki, ushbu Farmon asosida sohadagi samaradorlik yanada ortishi taʼminlanadi.

S. Xoʻjamurodova, 40-sonli maktab direktori, Qoraqalpogʻistan Respublikasi Joʻqorgʻi Kengesi deputati.