ТАЪЛИМ СОҲАСИНИ РИВОЖЛАНТИРИШГА ДОИР ПРЕЗИДЕНТ ФАРМОНИ КЕНГ ЖАМОАТЧИЛИК ИШТИРОКИДА ЎРГАНИЛДИ
Шарқ донишмандлари “Илм-маърифатсиз нажот йўқ ва бўлмагай ҳам” деганларида нечоғлиқ ҳақ эканликларини бугунги кун мисолида англаш мумкин. Шу йил 6 ноябрда Ўзбекистон Республикаси Президентининг “Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида”ги ПФ-6108-сон Фармони қабул қилинди. Лойиҳаси дастлаб кенг жамоатчилик иштирокида муҳокама қилинган ушбу Фармонда таълим тизимини янада такомиллаштириш кўзда тутилган.
Муҳокамага қўйилган “Мамлакатимиз таълим-тарбия тизимини янада такомиллаштириш, илм-фан соҳаси ривожини жадаллаштиришга оид қўшимча чора-тадбирлар тўғрисида”ги Президент Фармони лойиҳаси аҳоли томонидан жуда илиқ кутиб олинди. Чунки, Фармон лойиҳасида мамлакатимизда таълим-тарбия тизимининг сифати ва самарадорлигини ошириш, ёш авлод эгаларида замонавий билим ва кўникмаларни шакллантириш, таълимнинг узвийлиги ва узлуксизлигини таъминлаш борасида тизимли ишларни олиб бориш кўрсатилган. Шунингдек, тизимни янгидан ислоҳ қилиш, мамлакатимизда таълим-тарбия ва илм-фан соҳаларини такомиллаштириш жамиятимизда ўқитувчи ва педагог ходимлар, илмий ва ижодкор зиёлиларга бўлган ҳурмат эътиборни янада ошириш, таълим олувчиларнинг касбий маҳоратини ривожлантириш, тизимга хусусий сектор иштирокини кенгайтириш каби эзгу мақсадлар акс эттирилган.
Туманимизда ҳам ушбу Фармон лойиҳаси бўйича жойларда тарғибот ишлари амалга оширилди ва учрашувларда таклифлар ўрганилди.
Жумладан, “Қиличбой” сайлов округида жойлашган 32-сонли мактаб жамоалари ва аҳоли билан Фармон лойиҳасининг мазмун ва моҳиятини муҳокама қилиб, билдирилган таклифларни ёзиб олдик. Шунингдек, Халқ депутатлари Амударё туман Кенгаши сессиясида ва тумандаги мактаб раҳбарлари билан учрашувларида билдирилган фикр-мулоҳазалардан келиб чиқиб, Жўқорғи Кенгес қарори лойиҳасига ўз таклифларимизни киритдик.
Фармон лойиҳасининг 3-банди иккинчи хатбошисида таянч ўқув режасини такомиллаштириш ва умумий ҳафталик ўқув юкламасини камайтириш ҳамда ўзаро узвий боғлиқ фанларни бирлаштириш ҳисобига уларнинг сонини оптималлаштириш кўрсатилган. Бунда умумий ҳафталик юкламасини қисқартириш умумий ўрта таълим мактаб ўқувчиларининг синфлар ва фанлар кесимида тасдиқланган давлат таълим стандартларини бажаришида муаммолар юзага келади. Шу сабабли ҳозирги таянч ўқув режа асосида ҳафталик ўқув юкламаларини сақлаб қолишни таклиф этдик.
Шунингдек, Фармон лойиҳасининг 8-банди иккинчи хатбошида ўқувчилари халқаро фан олимпиадаларида ғолибликни қўлга киритган умумтаълим таълим муассасалари педагогларига тўғридан-тўғри олий малака тоифаси бериш белгиланган бўлиб, бунга қўшимча фан олимпиадасининг Ўзбекистон Республикаси босқичида ғолибликни қўлга киритган фан ўқитувчиларининг малака тоифаларини бир поғонага кўтариш таклифини киритдик.
Шуни қувонч билан алоҳида эътироф этишимиз керакки, биз ва кенг жамоатчилик томонидан билдирилган ушбу таклифлар инобатга олинди ва Ўзбекистон Республикаси Президентининг 6 ноябр кунги “Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида”ги ПФ-6108-сон Фармонида қайд этилди. Ўз навбатида бу билан биз каби таълим жонкуярлари зиммасига янада каттароқ масъулият юкланди.
Биз ишонамизки, ушбу Фармон асосида соҳадаги самарадорлик янада ортиши таъминланади.
С. Хўжамуродова, 40-сонли мактаб директори, Қорақалпоғистан Республикаси Жўқорғи Кенгеси депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
