QORAQALPOQ TILI BAYRAMIGA BAGʻIShLAB, “ANA TILIM – DANA TILIM” TADBIRI OʻTKAZILDI
Xalqimiz uchun baynalmilal tarbiya, biri-biriga qon-qarindosh xalqlar doʻstligini ulugʻlash, ularning tili, milliy-madaniy yodgorliklariga, anʼana va urf-odatlariga hurmat va eʼtibor koʻrsatish bobomeros qadriyat hisoblanadi. Ayniqsa, qon-qardosh xalqlarning tilini oʻrganishga boʻlgan eʼtibor tufayli koʻp millatli mamlakatimiz xalqi oʻrtasidagi oʻzaro mehr-oqibat tuygʻulari tobora mustahkamlanib bormoqda. Birgina bizning tumanimizda rus, qozoq, qoraqalpoq va turkman tillarida oʻqitiladigan umumtaʼlim maktablari faoliyat yuritayotganining oʻzi millatlararo totuvlik, har bir millatning tili va adabiyotiga nechogʻlik eʼtibor qaratilayotganidan dalolatdir.
Maʼlumki, 1-dekabr – qoraqalpoq tiliga davlat tili maqomi berilgan kun sifatida nafaqat Qoraqalpogʻistonda, balki mamlakatimizda ham keng nishonlanadi. Sana munosabati bilan davlat va jamoat tashkilotlarida, oʻquv muassasalarida bayramona tadbirlar boʻlib oʻtadi.
Joriy yilning 28-noyabr sanasida ana shunday tadbirlardan biri 16-sonli umumtaʼlim maktabida ham oʻtkazildi. “Ana tilim – dana tilim” deb nomlangan mazkur adabiy-musiqiy tadbirda maktab sahnasi bezatilishiga alohida eʼtibor qaratildi. Qoraqalpoq tili va adabiyoti namoyondalarining suratlari, asarlari hamda qoraqalpoq xalq ogʻzaki ijodi namunalari, qoraqalpoq xalqining urf-odat va anʼanalarini aks ettiruvchi sahna bezaklari bilan bezatildi.
Tadbirni maktabning qoraqalpoq tili va adabiyoti fani oʻqituvchisi Aziza Jannazarova mahorat bilan olib bordi. Qoraqalpoq xalq raqslari, sheʼr va qoʻshiqlari bilan kechada faol ishtirok etgan maktabning 4- va 5-sinf oʻquvchilarining har bir chiqishi tadbir qatnashchilariga zavq-shavq bagʻishladi. Ayniqsa, maktabning qoraqalpoq tili va adabiyoti fani oʻqituvchisi Ziynegul Siytimova Qoraqalpoq mumtoz va hozirgi zamon adabiyoti hamda qoraqalpoq adabiy tilining rivojlanish bosqichlariga bagʻishlangan maʼruzasi orqali oʻquvchi-yoshlarga juda koʻp maʼlumotlar berib oʻtdi.
Shuningdek, tadbirda Uyshin madaniyat uyi xodimi Polzoda Ubbiniyozova qoraqalpoqcha allalar kuylab berdi. Maktabning 7-sinf oʻquvchisi Shohinur Madaminova dutorda ijro etgan qoraqalpoq xalq kuylari, maktab oʻquvchilaridan Munisa Xudoyberganova, Guliraʼno Oʻrinboyeva, Gulnoza Gulmonovalar ijrosidagi qoraqalpoq va oʻzbek xalq raqslari kechaga oʻzgacha fayz bagʻishladi. Qoraqalpoq tili va adabiyoti fani oʻqituvchilari Ziynegul Siytimova, Aziza Jannazarova, Sanobar Xalillayeva, Nigora Ismoilova, Nasiba Xudoyberganova hamda maktab direktorining maʼnaviy-maʼrifiy masalalar boʻyicha oʻrinbosari Rahima Saparboyevalar hamkorligida tayyorlangan “Ana tilim – dana tilim” deb nomlangan adabiy-musiqiy tadbir barchaga juda manzur boʻldi.
Ushbu tadbirda maktab oʻquvchi-yoshlari taʼlim mobaynida nafaqat qoraqalpoq tili va adabiyoti, balki qoraqalpoq xalqining oʻziga xos urf-odat va anʼanalari ham mehr-muhabbat bilan oʻrganilayotganini adabiy-badiiy chiqishlar orqali ifoda etishdi. Shu bilan birga mazkur tadbir orqali oʻquvchi-yoshlarning qardosh xalqlar tili va adabiyotiga boʻlgan hurmat va eʼtibori, shu barobarida qiziqishlari yanada mustahkamlandi.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
