Istiqlolning otashin kuychisi
Yurakka yaqin sheʼrlari bilan xalqimiz qalbini zabt etgan shoir Muhammad Yusufdir. Shoir haqida Oʻzbekiston Qah-ramoni, Oʻzbekiston xalq yozuvchisi Said Ahmad shunday yozgan edilar: "Muhammad Yusuf pokiza inson edi. U odamlarning esini ogʻdirgan, oʻylatgan, kuldirgan, yigʻlatgan, topgan-tutganini odamlar ustidan sochgan saxiylik timsoli edi. Endi shoirning oʻzi yoʻq. Ammo Muhammad Yusuf deb atalmish Sheʼriyat bor. Bu Sheʼriyat aslo zavol bilmaydi”.
Maktabimizning yuqori sinf oʻquvchilari orasida shoir ijodi chuqur oʻrganilib, insho, buklet va referatlar tanlovi boʻlib oʻtdi. Gʻolib oʻquvchilar "Mehr qolur, muhabbat qolur” mavzusidagi Muhammad Yusuf tavalludining 60 yilligiga bagʻishlangan adabiy-badiiy kechada faxriy yorliqlar bilan taqdirlandilar.
Kechani maktab direktori Zulfiya Yusupova ochib berdi va u oʻz nutqida shoir ijodi haqida gapirar ekan, unga "Istiqlolning otashin kuychisi” deya taʼrif berib oʻtdi.
Bayram dasturida barcha oʻquvchilar faol qatnashdilar. Ular Muhammad Yusuf haqidagi maʼruzalari, sheʼrlari va raqslari bilan kechaga koʻtarinki ruh bagʻishladilar.
Muhammad Yusuf qalamiga mansub "Vatanim”, "Chamanistonim”, "Tilak”, "Azizimsan”, "Menga bering”, "Mehr qolur” kabi sheʼrlarining oʻquvchilar tomonidan ifodali oʻqib berilishi yigʻilganlarning shoirga boʻlgan mehr-muhabbatini yanada oshirdi. Buyuk shoir qalami bilan yaratilib, hofizlar tomonidan kuylangan qoʻshiqlar guldastasi namoyish etildi. Ayniqsa, raqqosa qizlarimizning "Koʻklamoyim” qoʻshigʻiga tushgan raqslari hammaga manzur boʻldi.
Buyuk shoirning betakror ijodiga oʻquvchilarimizning befarq emasliklari "Shoir ijodi asosida bahri-bayt” aytishuvlarida yaqqol namoyon boʻldi. Isteʼdodli yoshlar har bir chiqishlarida buyuk shoirga boʻlgan yuksak ehtiromlarini koʻrsatib berdilar.
Tadbirga tuman maktablaridan ham mehmonlar tashrif buyurdilar. Ular ham Muhammad Yusuf haqida iliq-iliq fikrlar bildirishdi.
Otashqalb shoirning 60 yillik tavallud ayyomi juda chiroyli va mazmunli boʻlib oʻtdi.
Sevimli shoir Muhammad Yusuf bizning qalbimizda hamisha barhayotdir. Shoir taʼbiri bilan aytganda:
Oʻzi oʻlsa oʻlar, soʻzi oʻlmaydi,
Hamisha barhayot nasl shoirlar.
Haqiqiy shoirning qabri boʻlmaydi,
Yurakka koʻmilar asl shoirlar.
Muhabbat Abdukarimova,
11-maktabning ona tili va adabiyoti oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
